आसामांत एका परस चड लग्नां केल्यार बंदखण; विधेयक मंजूर

भांगरभूंय | प्रतिनिधी

गुवाहाटी, खबरां संस्था ः आसाम विधानसभेन आसाम बहुपत्नीत्व प्रतिबंध विधेयक, 2025 मंजूर केले. हो कायदो सवे अनुसुची क्षेत्रांक आनी अनुसुचीत जमातींक लागू जावचो ना. सरकाराच्या म्हणण्या प्रमाण ह्या क्षेत्रांतल्यो थळाव्यो चालीरिती मतींत दवरून सुट दिल्या.
विधेयका प्रमाण, पयलें लग्न वैध आसतना दुसरे लग्न करप हो गुन्यांव आसतलो. हे खातीर सात वर्सां मेरेन बंदखण आनी दंड भरपाची ख्यास्त आसतली. पयलें लग्न लिपोवन दुसरे लग्न केल्यार ख्यास्त 10 वर्सां मेरेन वाडटली. गुन्यांव परतून केल्यार दर खेपे ख्यास्त दुप्पट जातली.
विधेयकाचेर चर्चा करतना मुख्यमंत्र्यान विरोधी पक्षांक तांचे दुरुस्तीचे प्रस्ताव फाटीं घेवचे अशें आवाहन केलें. पूण एआययूडीएफ (AIUDF) आनी सीपीआय(एम) (CPI(M)) हांचे प्रस्ताव सभाघरान आवाज मतदानान न्हयकारले.

एका परस चड लग्नां करुन दिवपी लोकांक ख्यास्त

० ह्या कायद्या प्रमाण, हातूंत दोन लग्नांक प्रोत्साहन दिवपी वा मजत करपी लोकांचोय आस्पाव जातलो. हातूंत मुखिया, काझी, पुजारी, पालक आदी हांचो आस्पाव आसा.
० अशा लोकांक दोन वर्सां मेरेन बंदखण आनी एक लाख रुपया मेरेन दंड भरपाची ख्यास्त आसतली. कोणेंय जाणूनबुजून अवैध लग्नाची वेवस्था केल्यार तांकां देड लाख रुपया मेरेन दंड आनी दोन वर्सां मेरेन बंदखणीची ख्यास्त आसतली.
० नव्या कायद्या प्रमाण बहुविवाह खातीर गुन्यांवकार थारिल्ले लोक सरकारी नोकरे खातीर पात्र थारचे नात. तांकां सरकारी येवजण्यांचो लाव मेळचो ना. तांकां खंयच्याच थळाव्या संस्थांच्या वेंचणुकेंत वांटो घेवंक मेळचो ना.
० बळी पडपी बायलांक लुकसाण भरपाय, कायदेशीर संरक्षण आनी हेर मजत मेळटली, जाका लागून तांकां अर्थीक आनी समाजीक नदरेन सुरक्षीतताय मेळटली अशेंय विधेयकांत म्हणलां.