भांगरभूंय | प्रतिनिधी
गोंयांत भूंय माफिया आसात, ते दादागिरी करतात, हाचो अणभव थळावे वा जांकां हें प्रत्यक्ष भोगचें पडटा, ते सोडल्यार हेर लोकांक सहजा येनाशिल्लो. पूण, आसगांवचे घडणुकेन गोंयकार हादरून गेल्यात. आसगांवचे व्हिडियोय व्हायरल जाल्यात. कोण चूक कोण बरोबर हें स्वताच थारावन कायदो हातांत घेवपाचो हक्क अजून तरी ह्या देशांत कोणाक ना. तरीय हजारांनी लोक कायदो आनी तो चालीक लावपी अधिकारी आपल्या बोल्सांत आशिल्ले भशेन वागतात. बळिश्ट दुबळ्याक चिड्डिता. कांय राज्यांनी तर ताका जिवेशीं मारून उडयता. प्रसार माध्यमांनी असल्यो खबरो अदींमदीं वाचूंक मेळटात. पूण, गोंयांत अशें दिसनाशिल्लें. निदान बुलडोझर आनी बावन्सर घेवन लोकांचीं घरां मोडपाचें धाडस कोणाक जावंक नाशिल्लें. आसगांवां तें जालें. हें करपी दिल्लीची, पूण मुंबय रावपी एक बायल अशें म्हणटात. हे घडणुकेची दखल मुख्यमंत्री, केंद्रीय राज्यमंत्री, आमदार, सरपंच, विरोधी आमदार सगल्यांनीच घेतली. म्हणटकच हें प्रकरण बरेंच गंभीर आसतलें. सगलेच ओगी रावल्यार ही बुलडोझर प्रवृत्ती गोंयांत वाडीक लागतली. कारण कोणेंय कितेंय केल्यार गोंयकार ओगी रावतात, असो समज कांय भायल्या लोकां मदीं तयार जाला. फुडाराक हें घातक थारूं येता.
गोंयकार आयज- काल उठसूठ जमनी विकपाक लागला. मेळटा ताका जमनी विकतकच कितें जाता, ताची ही शिटकावणी. तेन्ना हाचे मुखार जमनी, भाटां विकतना गोंयकारांनी चार फावटी विचार करचो, अशें विरोधी पक्ष फुडाऱ्यान म्हणलां, तातूंत तथ्य आसा. फाटलीं 20- 25 वर्सां गोंयकारां मदीं हें फॅड सुरू जालां. बऱ्या पगाराची नोकरी, बायलूय जोडटा. म्हणटकच घरची जमनी कसपाक कोण ना. ती पडीक दवरचे परस एक- देड कोटींक (आयज ताचें मोल 20 कोटीं वयर पावलां आसतलें!) विकप आनी राजा- राणी कशें रावप. खावप, पिवप, मजा करप. आज्या- पणज्यांच्यो जमनी विकून नोकरी करिनासतना व्याजाचेर जगपी गोंयकार दरेका तालुक्यांत मेळटले. बरें, ह्यो जमनी विकत घेवपी कोण तर चडशे परप्रांतीय. गोंयकारां मदीं विरगळून वच्चे बदला ते जुंवीं करून रावतात. कांय जाण तर वर्साक एकदां सुटी मनोवपाक येतात. अश्यो जमनी विकत रावले वा देड- दोन कोटींच्या बंगल्यांचें गांव, काॅलनी वसयत रावले जाल्यार एक दीस गोंयकार आपलेच भुंयेंत परकी जातले.
मुळावे म्हायती प्रमाण, आसगांवच्या त्या घरांत आगरवाडेकार कुटुंब फाटलीं 24 वर्सां रावता. पंचायत घरपट्टी बी तांच्या नांवान दिता. सेलडीड जावपाचें आसा. घरधनयान ती जमीन परस्पर विकली आनी जाका विकली तांणी बावन्सरांचे मजतीन आगरवाडेकार आनी ताच्या पुताचें अपहरण केलें, बुलडोझरान घराचो कांय भाग मोडलो. मोडटनाचो व्हिडियो व्हायरल जाला. कांय बावन्सर त्या कुटुंबाक धमकायतना दिसतात. तुमी मालक जाल्यार कागदां दाखयात, अशें एकलो म्हणटनाय दिसता. घरांत मनशां आसतना बुलडोझरान घर उडोवप, भितर रावपी बायलेक धुकलून उडोवप ही दादागिरी जाली. घरा विशीं कितें तें थारावपाचो अधिकार ह्या दादांक कोणे दिलो? न्यायालय कितें तें थारायतलें. आतां सरकार मोडिल्लें घर बांदून दितलें आनी तो खर्च हें कर्म करपी लोकां कडल्यान वसूल करतले, अशें मुख्यमंत्र्यान जाहीर केलां. हातूंत पुलीस घुस्पल्यात अशें कळटा. मुख्य सचिवान तशी चवकशी चालू केल्या. दोशी सांपडल्यार पुलिसांक निलंबीत जावचें पडटलें. ताचे परस तांकां लाखांनी रुपया दंड घालप योग्य. कायद्याचे राखणदार जर अशे वागपाक लागले जाल्यार सामान्य मनशान कोणाच्या तोंडा कडेन पळोवपाचें? गोंयांतल्या दर्यादेग वाठारांनी दादागिरी, खंडणी, मारामारी, धमक्यो असले प्रकार बरेच वाडल्यात. हे करपी कोण? ते एकले एकसुरे आसात कांय तांचो कोण डाॅन, भाई बी आसा? ताची चवकशी करप ही काळाची गरज.
राज्यांत बेकायदेशीर जमनी हडप करपाचीं 110 प्रकरणां सांपडल्यांत. तातूंतल्यो धनी नाशिल्ल्यो जमनी सरकार ताब्यांत घेतलें जाल्यार उरिल्ल्या जमनींचो निर्णय न्यायालय घेतलें. जमनी ताब्यांत घेवपा विशीं फुडल्या विधानसभा अधिवेशनांत कायदो दुरुस्ती जावपाची आसा. बोगस कागदां करून जमनी भलत्यांकूच विकपाचे प्रकार उक्ताडार येतात. फाटीं कांय जाणांक अटकूय जाल्ली. भितर सरकारी अधिकारीय आशिल्ले. भरपूर पगार आसतना तांकां हे भिकेचे दुवाळे कित्याक लागतात, तेंच कळना. आसगांव प्रकरणाच्या मुळांत वचून ताचो सोक्षमोक्ष लागूंक जाय. कितें तें कायद्यान जावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
