भांगरभूंय | प्रतिनिधी
पणजी ः आसगांवां घर मोडून उडोवपाच्या प्रकरणांत गुन्यांव फांट्यान स जाणांक अटक केल्या. हाचे आदीं हंणजूणां पुलिसांनी दोगांक अटक केल्ली. मेळिल्ले म्हायती प्रमाण स जाणांतले 5 जाण घडणूक सुवातेर हाजीर आशिल्ले जाल्यार एका मनशान घर मोडपा खातीर जेसीबी मशीन दिल्लें. मजगतीं, गुन्यांव फांट्यान उल्लेख केल्ल्या घडणुकेंत वापरिल्लीं 2 मशीनांय जप्त केल्यांत.
अटक केल्ल्या स जाणा मदीं तीन बायलां बाउन्सरांचो आस्पाव आसा. शाहीन सौदागर (38), बिस्मिल्ला गोरगुंडगी (44) आनी शालन कल्लाप्पा मोरेकार (42) अशी अटक केल्ल्या बायल बाउन्सरांची नावां आसा. मजगतीं, एसआयटीक कागाळ फाटीं घेवपाचें प्रतिज्ञापत्र मेळ्ळां. तेच प्रमाण पुलीस महासंचालका संबंदीत मेळिल्ल्या म्हायती पत्राचेर कोणाचीच सय ना अशी म्हायती गुन्यांव फांट्याचे अधीक्षक राहुल गुप्ता हांणी प्रसार माध्यमांक दिली.
अनामिक आनी सय नाशिल्ल्या अप्रमाणीत दस्तावेजा वयल्यान कसलेय निश्कर्श काडप चुकीचें थारतलें अशें तांणी सांगलें. तेच प्रमाण ह्या प्रकरणांत मुक्त, निश्पक्ष आनी बेगीन न्याय मेळचो म्हूण आपूण कटिबद्ध आसा अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
