आसगांव प्रकरणाचेर 2 ऑगस्टाक सुनावणी

भांगरभूंय | प्रतिनिधी

पुलीस अधिक्षक, येरादारी संचालकां कडेन मानवाधिकार आयोगान मागलो अहवाल

भांगरभूंय । प्रतिनिधी

पणजी: आसगांवच्या प्रदीप आगरवाडेकार हांचें घर मोडपाच्या प्रकरणांत मानवाधिकार आयोगान उत्तर गोंय पुलीस अधिक्षक आनी येरादारी संचालकां कडेन सविस्तर अहवाल मागला. हो अहवाल 2 ऑगस्ट मेरेन सादर करचो पडटलो. अहवाल सादर केले उपरांत 2 ऑगस्टाक आयोगा मुखार सुनावणी जातली.

थियेचे सुशमा कारापूरकर हे बायलेन कागाळ केले उपरांत आयोगान उत्तर गोंय पुलीस अधिक्षक आनी येरादारी संचालकांक नोटिसो जारी केल्यात. सविस्तर अहवाल दिवपा सयत 2 ऑगस्टाक सुनावणेक हाजीर रावपाचो आदेश दिला.

हणजूणचे निलंबीत पुलीस निरिक्षक प्रशल नायक देसाय हांचे सयत पुलीस अधिक्षक आनी येरादारी संचालनालया आड कागाळ दाखल जाल्या.

आसगांवां 24 जुनाक प्रदीप आगरवाडेकार हांचें घर मोडपाची घडणूक घडली. पूजा शर्मा हे बायलेन बावंसराच्या मजतीन घर मोडिल्ल्याचो गुन्याव नोंद जाला. सरकारान तपास गुन्यांव फांट्या कडेन दिला. निलंबीत पुलीस निरिक्षक प्रशल नायक देसाय हाणें पुलीस महासंचालकांचें चेपण आशिल्ल्याचो अहवाल मुखेल सचिवांक दिल्ल्यान खवदळ निर्माण जाला. हाका लागून पुलीस महासंचालक जसपाल सिंग हे अडचणींत आयल्यात.

घर मोडपा खातीर ज्या जेसीबी मशिनाचो वापर जालो ताका येरादारी खात्याचो परवानो आसा काय? घर मोडपाच्या आदेशाची प्रत ताचे कडेन आशिल्ली काय? हाची चवकशी आयोग करतलो. पुलीस तशेंच येरादारी संचालनालयाच्या भुमिकेची म्हायती घेतले उपरांत सुनावणेक सुरवात जातली.

आसगांव हांगा प्रदीप आगरवाडेकार हांचें घर मोडपाची कृती बेकायदो आसा. घर मोडपाचो आदेश पुलिसां कडेन आसलो काय? घर मोडपा खातीर ज्या जेसीबी मशिनाचो वापर जालो, ताचे कडेन परवानो आशिल्लो काय? हाचो तपास करपाची मागणी कागाळेंत केल्या. प्रदीप आगरवाडेकार हांकां सरकारा कडल्यान योग्य त्या प्रमाणांत लुकसाण भरपाय मेळपाक जाय, अशी मागणी आसा. पुराय प्रकरणांत पुलिसांचो हात कितल्या प्रमाणांत आसा, हाचे तपासाचे आदेश दिवपाची मागणी आसा. कागाळेची दखल घेवन गोंय मानवाधिकार आयोगान उत्तर गोंय पुलीस अधिक्षक आनी येरादारी संचालकांक नोटिसो जारी करपाक सांगलां. घर मोडपा खातीर बावन्सरांचो वापर जावपाच्या कृतीक लेगीत कागाळेंत हरकत घेतल्या.