भांगरभूंय | प्रतिनिधी
हणजूणां पुलिसांचो मुखेल सचीवाक अहवाल
पणजी, बातमीदार ः आसगांव प्रकरणांत पुलीस महासंचालक डॉ. जसपाल सिंग हांचें (डीजीपी) चेपण आशिल्लें असो अहवाल हणजूणां पुलिसांनी मुखेल सचीवाक सादर केला.
महासंचालक सिंग हांणी म्हाका 24 जूनाक पणजे मुख्यालयांत येवपाचें निर्देश दिलें. ते प्रमाण हांव तांच्या कार्यालयांत गेलो. त्या वेळार अर्शद ख्वाजा हाका घर मोडपाचें काम पुराय करपाक दिवंक नाशिल्ल्यान तांणी म्हाका तापयलो. तशेंच उच्च पांवड्यावेली समिती म्हजेर कारवाय करतली आनी गोंयांतल्यान बदली जाल्यार, थंय म्हजी नेमणूक जातली थंय ‘एनडीपीएस’ कायद्या खाला म्हजे आड फटीचो गुन्यांव दाखल करुन हणजुणां पुलिसांच्या सहकारान ड्रग्साचो वेव्हार करता अशें त्या आरोपी कडल्यान नोंद करुन घेवन ड्रग्ज प्रकरणांत आडकायतलो अशी धमकी महासंचालकान दिली अशें हणजूणां पुलीस निरिक्षक प्रशल नायक देसाय हांणी अहवालांत सांगलां.
प्रदीप आगरवाडेकार हांचे घर मोडपाच्या दिसा महासंचालकान केल्ल्या सगळ्या संवादाची म्हायती उत्तर गोंय अधीक्षक आनी म्हापशेंच्या उपअधीक्षकाक हांवेन दिली. हांव महासंचालकाचो फोन घेतालो तेन्ना उपनिरिक्षक संकेत पोखरे, योगेश कोरगांवकार आनी हवालदार सत्येंद्र नास्नोडकार हे थंय हाजीर आशिल्ले.
ह्या संवादांत महासंचालकान म्हाका विचारलें की घर मोडपाचें काम कित्याक थांबयलें. ते प्रमाण तांका पीसीआर पणजेच्यान आयल्लो फोन आनी घरांतले लोक घर मोडपाच्या कामाक आक्रमक विरोध करतात अशी म्हायती दिली. त्या वेळार तांणी म्हाका तापोवपाक सुरवात केली. कितें जालें तरी घर मोडपाचे कामाक सुरवात करची आनी कोणूय आडखळ हाडटा तांकां उखलून पुलीस स्टेशनांत हाडपाचो आदेश तांणी म्हाका दिलो. घर मोडपाचें काम चालू आसतना घरांत कोणूच नाशिल्लो. आपूण स्वता ते पळयल्ले अशेंय प्रशल नायक देसाय हांणी अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
