आसगांव प्रकरणः न्यायालयान थाकाय दिवची, चवकशेक तयारः पूजा शर्मा

भांगरभूंय | प्रतिनिधी

म्हापशेंः आसगांवां आगरवाडेकार हांचे घर मोडपाचे प्रकरण हे राजकी नदरेन प्रेरीत आसा. ह्या प्रकरणा कडेन आपलो कितेच संबंद ना. आपूण घडणूक सुवातेर नासतना विनाकारण आपणाक हातूंत घुस्पायल्या. आपूण पुलीस चवशेक सहकार्य करपाक तयार आसून न्यायालयान आपणाक अंतरीम थाकाय दिवची, अशी विनवणी पूजा शर्मा हांचे वतीन ज्येश्ठ वकील अॅड. सुरेंद्र देसाय हांणी न्यायालया कडेन केल्या.

शेनवारा पणजे उत्तर गोंय प्रधान आनी सत्र न्यायाधीश ईर्शाद आगा हाचे मुखार पूजा शर्मा हांच्या अटकपूर्व जामिनाचेर सुनावणी जाली.
तांचे वतीन युक्तीवाद करतना अॅड. सुरेंद्र देसाय हांणी सांगलें, हे एकंदरीत राजकी प्रेरीत प्रकरण आशिल्ल्याचो दावो केलो. आमदार डिलायला लोबो, आमदार मायकल लोबो आनी मुख्यमंत्री हे घडणूक सुवातेर केन्ना गेल्ले ताचो पुराव्या सयत तपशील तांणी न्यायालया मुखार दवरलो. पुलिसांच्या नोटिशेक आपूण जाप दिल्या. ते दिसा आपूण हजर रावपाक शकना, अशें कळयिल्ले. कारण तेन्ना आपूण मुंबय भायर अमृतसर आनी​ हिमाचल प्रदेशांत आशिल्ले​. जुलयच्या दुसऱ्या सप्तकांत हजर रावपाची दुसरी तारीख दिवपाची​ विनवणी पुलीस अधिकाऱ्यां कडेन केल्या, अशें आपल्या वकीलाचे वती पूजा शर्मा हांणी निदर्शनाक हाडून दिले.

आपूण ही मालमत्ता ख्वाजा हाचे कडल्यान खरेदी केल्या. हे मालमत्तेंत आगरवाडेकार कुटुंबियांनी अतिक्रमण केलां. हे घर मोडपाच्या घडणुकेंत कसलोच सहभाग ना. हो दिवाणी स्वरूपाचो आसून आपणाक कारणाविणें तातूंत घुस्पायतात.

आगरवाडेकार कुटुंब हे शापोरा रावता. तांणी विदेशी नागरिकां कडेन पॉवर अॉफ अथोरिटी केल्ल्याचे समजता. हाचो अर्थ आगरवाडेकार कुटुंबी थंय बेकायदो रावता. पूण मालमत्ता खरेदी केल्ल्यान तांकां जमनींतल्यान भायर काडपाचो आपल्या अशिलाक कायदेशीर अधिकार आसा.
पुलिसांच्या दाव्या प्रमाण, वयले घडणुकेचो मुख्य सुत्रधार अर्शद ख्वाजा आसून घडणूके वेळार तो थंय उपस्थी आशिल्लो. पुलिसांनी अटक केले उपरांत न्यायालयान ताची जामिनाचेर सुटका केल्या. ही गजाल युक्तीवादा वेळार अॅड. देसाय हांणी न्यायालयाच्या निदर्शनाक हाडून दिली.
मजगतीं, ह्या अटकपूर्व जामीन अर्जा वयल्या दोनूय वटेनच्या युक्तीवादा उपरांत न्यायाधिशांनी गुन्यांवां संदर्भांत केस डायरी सादर करपाचे निर्देश पुलिसांनी दिले. तशेंच फुडली सुनावणी सोमार 8 वेर दवरल्या.