भांगरभूंय | प्रतिनिधी
पणजी, प्रतिनिधी ः आसगांव घर मोडून उडोवपाच्या प्रकरणांत गोंय पुलीस महासंचालक जसपाल सिंह हांचो सरळ संबंद आयिल्ल्यान गोंयभर बरोच बोवाळ जाला. पुलीस महासंचालक गुन्यांवांत तितलोच वाटेकार आसा आनी तांका काडून उडोवपाची मागणी विरोधक करपाक लागल्यात. हे वींशी जसपाल सिंह हांकां विचारल्यार आपलो पिआरओ हाचें स्पश्टीकरण दितलो अशी जाप तांणी दिली.
आसगांव प्रकरणांत आयपीएस पातळेवेलो अधिकारी गुंतला हो म्हजो दावो खरो थारलो. ही व्हडली भानगड जावन आसा देखून हें प्रकरण सिबीआयकडेन दिवचें, अशें हळदोणचे आमदार कार्लुस फेरेरा हांणी सांगलें.
डीजीपीन फोन करून ज्यो सुचोवण्यो दिल्यात ताचे रेकोर्ड मागोवपाक जाय. जे उलोवप फोनांचेर जालां तांची नोंद दवरपाक जाय तशेंच डीजीपी, कंत्राटदार, बावन्सर आनी हेर गुंथिल्ल्या मनशांचे फोन जप्त करपाक जाय. सगळ्यांचे भुमिकेची पडताळणी जावपाक जाय, अशी मागणी फेरेरा हांणी केली.
डीजीपीचो ह्या गुन्यांवांत आस्पाव आसा म्हण वळेरेंत घालचो आनी तांकां काडून उडोवचे. जर खाकींतले मनीस असले भानगडींत गुंतल्यात जाल्यार सामान्य गोंयकारांक केन्नाच न्याय मेळचो ना. ह्या प्रकरणांत व्हड मनीस गुंतल्यात देखून हाची कारवाय सीबीआय वरवीं जावपाक जाय, अशें फेरेरा हांणी सांगलें.
डिजीपी विशीं सरकारान सामकें स्पश्टी करण दिवपाक जाय. कोणूच ह्या प्रकरणांतल्यान सुटचोना अशें आस्वासन मुख्यमंत्र्यान दिल्लें. देखून मुख्यमंत्र्यान आतां कारवाय करपाची गरज आसा. आमी ह्या प्रकरणाची फाटपुरवण करतलेच, अशें फरेरा हांणी सांगलें.
तशेंच डिजीपींक काडून तांकां गुन्यांवकारांचे वळेरेंत घालचे अशीय मागणी गोंय प्रदेश कॉंग्रेसीचे उपाध्यक्ष सुनिल कवंठणकार हांणी केली.
सरकारान डिजीपींक निलंबीत करचें. जो मेरेन तांकां निलंबीत करून तांची चवकशी जायना तो मेरेन हाचे फाटलो मुखेल सुत्रधार मेळपाचो ना. हें प्रकरण दामून दवरपा खातीर मुखेल आरोपींक अटक करचे सोडून मुख्यमंत्री आगारवाडेकार हांचें घर भौशीक बांदकाम खात्या वरवी बांदून दिवपाचें आश्वासन दिता, असो आरोप कवठणकार हांणी केलो.
बेकायदेशीर गजालींत भायल्या मनशांक राखपाक डीजीपीन आपल्या पदाचो गैरवापर केला हें हणजूण पुलीस निरिक्षकान उक्तें केलां. आसगांव प्रकरणांत डिजीपी काडपाचें मुख्यमंत्र्यान केंद्रीय गृह मंत्र्यांक सांगपाक जाय. जेन्ना उच्च पदाचेर आशिल्लो अधिकारी आपल्या कर्मचार्यांचेर चेंपण हाडता जाल्यार पुलीस खात्यांचेर आमी कसो विस्वास दवरप. कायदो आनी सुवेवस्था सामकीच कोसळ्ळ्या, अशें गोंय प्रदेश कॉंग्रेसीचो उपाध्यक्ष अमित पाटकार हांणी सांगलें.
मुख्यमंत्री प्रमोद सावंत पुराय प्रशासन आयपीएस आनी आयएएस लॉबीचेर सोडून दिल्ल्यान तेच आतां मुख्यमंत्र्याच्या माथ्यार नाचतात. ह्या अधिकार्यांक भाजपाच्या भ्रश्टाचाराची म्हायती आसा आनी ते तोंड उगडीत म्हण मुख्यमंत्री भियेला देखून तांचेर कसलेंच नियंत्रण ना. देखून मुख्यमंत्री आसगांव विशयाचेर ओगीच रावन पुलीस अधिकार्यांक बळीचो बकरो केला. आयपीएस अधिकार्यांक कुशीक दवरून ह्या प्रकरणाची स्वतंत्र चवकशी करची, अशी मागणी आम आदमी पक्षाचे गोंय संयोजक अमित पालेकार हांणी केल्या.
आसगांव प्रकरणा वेल्यान जनतेचो पुलिसांचेर विस्वास उणो जाला. पुलीस अधिक्षक पांवड्यावेले अधिकारी डीजीपीची चवकशी करतले तरी कशे? एकदंर प्रकरणाची सामकी चवकशी जावप गरजेचें अशें उत्पल पर्रिकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
