आसगांवां सामुदायीक शेतीचो उपक्रम

भांगरभूंय | प्रतिनिधी

20 हॅक्टर पडीक शेतजमनीर कसतले शेतां

भांगरभूंय । प्रतिनिधी

म्हापशें: बार्दैश म्हालांत सामुदायीक शेत लागवडीक चालना दिवपाच्या उद्देशान विभागीय कृशी कार्यालयान आसगांवच्या 20 हॅक्टर शेतजमनीर सामुदायीक लागवडी खाला हाडल्या. हेडग्या गोरवांच्या उपद्रवाक लागून ही शेतजमीन फाटलीं 10 वर्सां शेतकार भावांक पडीक दवरची पडिल्ली.

मेळिल्ले म्हायती प्रमाण आसगांव गांवांत शेतकार भावांनी दोन व्हज सामुदायीक शेती प्रकल्प हातांत घेवन चालीक लायल्यात. ह्या प्रकल्पा वरवीं शेत जमनीची राखण आनी पुर्वजांचें शेतीचें दायज फुडें व्हरचे खातीर 60 परस अदीक शेतकार भाव एकठांय आयल्यात.

सामुदायीत शेतीचो लाव घेवन शेतकार गटांनी तांच्या पिकांचें हेडग्या गोरवांच्या उपद्रवा पसून राखण करचे खातीर 20 हॅक्टर शेती भोंवतणी वंय घातल्या. हे शेतजमनीर खूब प्रमाणांत गोरवां येतालीं. लुवणे खातीर तयार जाल्ल्या पिकाचीं हीं गोरवां नासाडी करतालीं. ताका लागून फाटल्या 15- 20 दसका सावन शेतकारांनी थंय शेतां रोवपाचें बंद केल्लें.

हरीश सावंत हांच्या फुडारपणा खालच्या रेडिसाल फार्मर युजर ग्रूप ह्या पयल्या सामुदायीक गटांत सुमार 39 शेतकार एकठांय आयल्यात. ह्या गटान सुमार 1.52 लाख चौखण मिटर जमीन सामुदायीक शेती लागवडी खाला हाडल्या. ही जमीन 14 हॅक्टरां परस चड आसा.

दुसरो लाम शेतकार गट. ह्या गटांत मंगलदास सावंत हांच्या फुडारपणा खाला 24 शेतकारांनी एकठांय येवन हो सामुदायीक शेती लागवड गट तयार केला. तातूंत 4.5 हॅक्टरा परस चड जमीन लागवडी खाला हाडल्या.

गांवांत 200 परस अदीक हेडगीं गोरवां आसात. ताका लागून शेती लागवड करपाक ह्या शेतकारांक आडखळींक फुडो करचो पडटालो. लागवड केल्लें पीक गोरवां खावन
उडयतालें, पूण शेतकारांक कसलीच भरपाय मेळनाशिल्ली.

शेतकार हरीश सावंत हांणी सांगलें, खूब वर्सांच्यान आमची शेतजमीन पडीक आशिल्ली. कारण हेडग्या गोरवांक लागून पिकांचें लुकसाण जातालें. ताका लागून शेतकारांनी शेतां रोवपाचीं सोडून दिल्लीं. मात बार्देस विभागीय कृशी अधिकारी आनी विभागाच्या अधिकाऱ्यांच्या तेंक्याक लागून आमकां शेतकारांक उर्बा मेळ्ळ्या आनी आमचे खातीर सामुदायीक शेती येवजण लागू केल्या.

आमचे कडेन दोन सैमीक उदकाचीं तळीं आसात. पूण हेडग्या गोरवांक लागून शेती करप शक्य जायनाशिल्लें. आतां शेतां भोंवतणी वंय घातिल्ल्यान आनी फावोशें उदक आशिल्ल्यान तिनूय मोसमांत शेतीची लागवड करपाचो निर्णय घेतला, अशें सावंत हांणी सांगलें.

रमेश सावंत हांणी सांगलें, ह्या उपक्रमाक लागून गांवांत शेती वेवसायाक चालना मेळटली. आमी सगळे शेतकार गांवांतल्या सगळ्या शेतजमनीर लागवड करपाक शकतात. एकाद्या शेतजमीन धनयाक शेत रोवपाचें कसपाचें नासत जाल्यार थंय लेगीत आमी शेत कसतले.

गांवांतले शेतीक चालना मेळटलीः राहूल जोंधळे

आमी आसगांवां शेतकारांचे मजतीन दोन सामुदायीक शेती लागवड प्रकल्प हातांत घेतल्यात. हाका लागून गांवांतले शेतीक चालना मेळटली.  ह्यो शेतजमनी फाटल्या 10- 15 वर्सांच्यान पडीक पडल्यात हें शेतकारांनी आमचे नदरेक हाडून दिलें. राज्य सरकारा कडल्यान सामुदायीक शेती खातीर 90 टक्के अनुदान दितात, ताका लागून आमी शेतकारां वांगडा बसका घेतली आनी तांकां उर्बा दिली. हो पयलो वर्साचो वंय प्रकल्प. हाचे उपरांत शेतकार यंत्रसामुग्री खरेदी करपाक शकतात. शिंपणावळी खातीर स्प्रिंकल बसोवपाक शकतात वा सध्या शिंपणावळ सुविधा दिवपी दोनूय तळीं दुरुस्त करपाक शकतात. कारण वैयक्तीक शेतीचे तुळेंत शेतकारां खातीर सामुदायीक शेती खर्च उणो जाता, अशें बार्देशचे सहाय्यक कृशी अधिकारी राहूल जोंधळे हांणी सांगलें.