भांगरभूंय | प्रतिनिधी
गोंयांत, खास करून दर्यादेग वाठारांत सध्या जें कितें चल्लां, ताच्यो बऱ्यो- वायट खबरो येत आसतात. मदीं स्वामी बह्मेशानंद हांणी, ‘कळंगुटे गेल्ले कडेन आपणाक थायलॅण्डाकूच गेल्ले सारकें दिसलें. थंय कितें चल्लां तें पळोवन काळजांत धस्स जालें. हें आमी सुदारपाक जाय. आमच्या गोंयचें नांव इबाडपाक दिवंक जायना’, अशें वक्तव्य केलें. दर्यादेग वाठारांत गुन्यांवांचें प्रमाणूय बरेंच वाडलां. सगल्योच खबरो दिसाळ्यांनी वा खबरां चॅनलांचेर येनात. थळाव्यां कडेन उलयल्यार एकूण चित्र दोळ्यां मुखार उबें जाता आनी आंगाक घाम सुटले बगर रावना. ताका लागून आतां कांय नागरीक जागृत जाल्ले दिसतात. अर्थांत तांणी उक्तायिल्ली भिरांत खरी काय फट तें तांकांच खबर आसतलें. हालींच आसगांवां नायट क्लब सुरू करपाचें थारलां. तो जाल्यार लोकांचे शांतिकायेचेर परिणाम जातलो. येरादारीची कोंयडी जातली. पबांनी येवपी रंगेल गिरायकांचें आनी थळाव्यांचें पेट्टलें. मागीर केस्तांवां, मारामारी जातली. शिंदळकी धंदो, हेर नाका जाल्ल्यो गजाली वाडटल्यो. गांवांत शाळा, देवळां, चर्ची आसात. नर्सींग सेंटर आसा. सगल्यांचेर हाचो परिणाम जातलो. गांवची संस्कृताय इबाडटली, अशें थळाव्या नागरिकांनी म्हणिल्लें. हे सभेंत गांवांतले मुखेल नागरीक आशिल्ले. आतां तांणी आनीक एक बसका आपोवपाची थारायल्या. मजगतीं, पंचायतीन ह्या प्रकरणाक पयर वेगळें मोडण दिलें.
आसगांव पंचायत वाठारांत कसल्याच डान्सबार वा नायट क्लबाक पंचायतीन परवानगी दिवंक ना. कोणाक दुबाव आसल्यार म्हायती हक्क कायद्या खाला अर्ज करून खात्री करून घेवची, अशें आव्हानूच सरपंचान दिलें. साबार जाग्यांचेर बसका घेवन अपप्रचार करपाचें काम सध्या चालू आसा. पोरूं बार- रॅस्टोरंण्ट बांदपाक परवानगी दिवपाची मागणी केल्ली. ती आमी दिल्ली. 31 मार्च 2024 मेरेनूच ती आसली. मजगतीं, बार धनयान ती फाटीं घेवची अशी लेखी विनवणी केली. ताका लागून पंचायतीन मुखार पावल उखल्लें ना, अशेंय तांणी सांगलें. आमचे कडेन सगलीं कागदां आसात, जाय जाल्यार खात्री करून घेवची, अशें खुद्द पंचायत म्हणटा, हाचो अर्थ ते खरें उलयतात, अशें म्हणचें पडलें ना? हाचेर नायट क्लब विरोधकांनी आपली भुमिका स्पश्ट करपाची गरज आसा.
पंचायतीचे पत्रकार परिशदेंत दोगां पंचांनी एक म्हत्वाचो विशय मांडलो. तो म्हणल्यार विवीध समाजीक विशय घेवन जागृताय करपी समाजवावुरप्यांनी भाटकारांची भेट घेवची आनी तांकां गांवांतल्यो जमनी विकपा पसून आडावचें. तशें जाल्यार गांवांत कसल्याच प्रकारचे नाका जाल्ले वेवसाय, धंदे येवचे नात, अशें त्या पंचांक दिसता. ताळगांव पंचायत वेंचणुकेच्या निकाला उपरांत मंत्री बाबूश मोंसेरात हांणीय कांयशी अशीच प्रतिक्रिया शेतजमनीं विशीं दिली. जर ताळगांवांतलो कोणूय स्वताचें शेत, पोरसूं विकता जाल्यार आपूण ताका आडावपाक शकता, असो प्रस्न तांणी केलो. सध्या आसात तीं शेतां कोमुनिदाद जमनींचेर आसात. तीं विकपाक मेळनात, थंय इमारतीय बांदपाक मेळनात, अशेंय तांणी सांगलें. कोण आपली मालमत्ता कायद्यान विकता जाल्यार ताका आडावपाक मेळना. पूण तो ती आपखोशयेनूच विकता, अशेंय म्हणपाक मेळचें ना. कारण कोण चेपण घालून ताका ती विकपाक लावंक शकता. ही शक्यताय सामकीच न्हयकारूं नजं. आसगांवांय कोण तरी जमनी विकतात आसतले, कोण तरी आपले वेवसायूय भाड्यान दितात आसतले. फाटीं थंयचो चलोवपाक घेतिल्लो एक पब राष्ट्रीय पांवड्यार गाजिल्लो.
आसगांवचे जागृत नागरीक फुडाराक कसलोच धोको नाका म्हूण नायट क्लबा आड लोकांक जागे करतात आसतले. कारण तांणी आशिकुशीच्या दर्यादेग, दर्यावेळ वाठारांत नेमकें कितें चलता, तें पळयलां. थोड्यांनी ताचो प्रत्यक्ष अणभव पसून घेतला आसतलो. म्हणून ते आमच्या गांवांत नाका, आमच्या भुरग्यांक, फुडाराचे पिळगेक ताचो उपद्रव नाका, अशें तांकां दिसता आसतलें. हातूंत तांकां दोशी धरपाक मेळचें ना. कारण कांय कडेन इझी मनीच्या नादाक लागून फुडाराची पिळगी इबाडल्या. हिंसक जाल्या. घराघरांनी वाद जावपाक लागल्यात. थोड्यांक पुलीस स्टेशनाचीं सोंपणा झरोवचीं पडल्यांत. म्हणटकच कोणूय पयलींच भियोवन विरोध हो करतलोच. आतां पंचायत आनी नागरिकांनी एकठांय बसून हे समस्येचेर उपाय काडपाची गरज आसा. खरेंच नायट क्लब येता, काय ती वावडी, हाचो सोक्षमोक्ष लागुदी. लोकप्रतिनिधींनीय हे बाबतींत समाजसेवा, गांवाची, गांवकारांची उदरगत हाचेर चड लक्ष केंद्रीत करूंक जाय. भायले वेवसायीक येतले आनी जोडून वतले. ताचो गांवकारांक प्रत्यक्ष व्हडलोसो फायदो जातलोच अशें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
