भांगरभूंय | प्रतिनिधी
म्हापशें ः भोवतावाडो, आसगांवां सोर्याच्या गुदांवाचो लोखणाचो खांबो आनी ट्रकाचें दार हांचे मदीं चिड्डल्ल्यान गंभीर जखमी जाल्लो मसिह हंगरा लुगून (३७, रा. हणजूण आनी मूळ झारखंड) ह्या लोडर कामगाराक मरण आयलां. अपघाताक कारण थारिल्लो दुबावीत ट्रक चालक रत्नाकर ठाकूर (रा. मयडे) हाका हणजूण पुलिसांनी अटक केली. जाल्यार न्यायालयान ताची जामिनाचेर सुटका केली.
हो अपघात सोमार ६ जानेवारीक सांजेवेळार सुमार ६.२० वरांचेर घडिल्लो. आसगांवच्या स्वंगई डिस्ट्रीब्यूटरच्या गुदांवांतलो माल ट्रकांत भरले उपरांत मरण आयिल्लो लोडर कामगार घडणुके सुवातेर राविल्लो. दुबावीत ट्रक चालकान ट्रकाचें दार बंद करिनासतना निश्काळजीपणान गाडी मुखार व्हेली. तेन्ना मरण आयिल्लो लोडर दार आनी गुदांवाच्या शेडच्या लोखणाच्या खांब्या मदीं चिड्डलो. उपरांत ताका रोखडोच म्हापशें जिल्लो हॉस्पिटलांत दाखल केलो. मागीर फुडल्या उपचारा खातीर ताका गोमेकॉंत धाडलो. थंय उपचार सुरू आसतना मसिह लुगून हाका मरण आयलें.
पुलीस हवालदार विशाल गांवस हांचे कागाळीच्या आदाराचेर ह्या अपघाताक कारण थारिल्ल्या ट्रक चालका आड पुलिसांनी गुन्यांव नोंद केलो आनी ताका अटक केली.
उपरांत म्हापशें न्यायालयान दुबाविताची जामिनाचेर सुटका केली. फुडलो तपास पुलीस उपनिरीक्षक नितेश शिंगाडी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
