भांगरभूंय | प्रतिनिधी
म्हापशें, प्रतिनिधी ः आसगांवच्या आमाडो विस्तास व्हिलांत रावपी मुंबयच्या पर्यटकांचे एक लाख रूपया आनी भांगराच्यो वस्ती चोरल्यो. हे विशीं हणजूण पुलिसांनी हे व्हिलाच्या कर्मचार्यां आड गुन्यांव नोंद केला.
ही चोरयेची घडणूक सोमारा फांतोडेर ५ ते सांजेवेळार ५.३० मजगतीं घडली. कागाळदार जय खूबचंदानी हांणी हे विशीं पुलिशेंत कागाळ केल्लो कागाळदार आनी ताचो एक इश्ट आनी तिग इश्टीणी मेळून पांच जाणां शुक्रारा २९ डिसेंबराक व्हिलांत देंविल्लीं
चोरयेच्या दिसा तीं पांचूयजाणां हॉटेलांतल्यान भायर सरिल्लीं. तीं परतलीं तेन्ना तांच्या बॅगांतल्यान एक हिरे आनी भांगराचें ब्रासलेट, कुर्णफुलां आनी इमिटेशनाच्यो वस्ती आनी १ लाख रूपया गायब आशिल्ल्याचें कळ्ळें. चोरी जाल्लें सामान ४ लाखां परस चड मोलाचें आशिल्लें.
व्हिलाच्या दाराचें लॉक तोडूंक नाशिल्लें. तशेंच व्हिलांत हेर कोणेंच भितरल्यान प्रवेश करूंक ना. ताका लागून ही चोरी व्हिलाच्या
कर्मचार्यांनीच केल्या आसूं येता, असो दुबाव कागाळदारांनी उक्तायला.
ते प्रमाण हणजूण पुलिसांनी भा.दं.सं.च्या ३८० कलमा खाला आमाडो विस्तास व्हिलाच्या कर्मचार्यां आड चोरयेचो गुन्यांव नोंद केला. फुडलो तपास पुलीस उपनिरीक्षक साहील वारंग करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
