आश्वें- मांद्रेंच्या एका रिसॉर्टाक उजो लागून तीस लाखांचें लुकसाण
भांगरभूंय | प्रतिनिधी
पेडणें : आश्वें, मांद्रेंच्या आजोबा देवळाच्या दर्यादेग वाठारांत टेन सेंड ह्या रिसॉर्ट वाठारांत जनरेटराक शॉर्टसर्कीट जाल्ल्यान जनरेटर आनी हेर सामान जळून सुमार ३० लाखांचें लुकसाण जालें. हातूंत कोणाक कांय जावंक ना.
हे विशीं चड म्हायती प्रमाण, आयज सकाळीं धा वरांचेर लायट गेल्ल्यान ह्या रिसाॅर्टाचो जनरेटर सुरू केलो. उपरांत कांय वेळान लायट आयली. मात जनरेटर बंद जावंक ना. हाका लागून लायट आनी जनरेटर हांचे मदीं संघर्श जावन शॉर्टसर्कीट जालें. उपरांत हॉटेलाच्या २ जनरेटरांक आनी वाठाराक उजो लावन तीस लाखां परस चड लुकसाण सोंसचें पडलें.
हे विशींची म्हायती पेडणें उजो पालोवपी दळाच्या अधिकार्यांक मेळटांच अधिकारी आनी जवान घडणुके सुवातेर दाखल जाले. तांणी उजो पालोवपाचो यत्न केलो. उजो लागींच्या हेर वाठारांत वचून व्हडा प्रमाणांत लुकसाण जावपाचें आशिल्लें. मात जवानांनी उजो नियंत्रणांत हाडिल्ल्यान आनीक लुकसाण जावपा पसून वाटवले. ताचे पयलीं हॉटेलाचे दोनूय जनरेटर लासून काबार जाल्ले. कांय प्रमाणांत हड्स च्या पांख्यान उजो लागून तेंय जळिल्ल्याचें चित्र दिसलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
