भांगरभूंय | प्रतिनिधी
बांगलादेशान चेन्नय टॅस्टीच्या पयल्या दिसा टॉसा सावन पयल्या दोन सत्रां मेरेन येजमान भारताचेर शेक दवरिल्लो. पूण, निमाण्या सत्रांत भारताच्या दोन बॅट्समनांनी बांगलादेशाच्या यत्नांचेर उदक रकयलें.
आर आश्विनान आपले टॅस्ट कारकिर्दींतलो सवो आनी जलद शेंकडो नोंदयलो. तशेंच चेन्नयच्या मैदाना वयलो ताचो हो सेगीत दुसरो शेंकडो लेगीत आसा. सचीन तेंडुलकरा उपरांत चेन्नच्या एम ए चिदम्बरम मैदानाचेर सेगीत दोन शेंकडे मारपी भारताचो फकत दुसरो बॅट्समन थारलो.
रवींद्र जडेजा लेगीत शेंकड्याच्या लागसार आसा. दोगांयनी अजून मेरेन नाबाद 195 धांवड्यांची भागिदारी केल्या. पूण, अशे बरे स्थितींत पावप भारता खातीर सोंपें नाशिल्लें. एका वेळार ताणें 144 धांवड्यांचेर 6 विकेटी व्हगडायिल्ल्यो. ओपनर यशस्वी जयस्वाल लेगीत अर्द शेंकडो पुर्ण करून तंबूंत परतून गेल्लो.
सर्वसादारणपणान भारतांत चवथ्या डावांत बॅटींग करपाक चडश्या पंगडांक आवडना. पूण, बांगलादेशाचो मुखेली नजमूल हसन शान्तो हाणें टॉस जिखून पयलीं बॅटींग करपाचो निर्णय घेतलो. भारताचो मुखेली रोहीत शर्मान लेगीत म्हणलें की तो टॉस जिखिल्लो जाल्यार पयलीं बॉलींगूच घेवपाचो.
बांगलादेशाचो निर्णय ताच्या बॉलरांनी योग्य थारायलो. दुसरें सत्र सोंपलें त्या वेळार भारताचो एकूय मुखेल बॅट्समन खेळपट्टीचेर बाकी उरूंक नाशिल्लो. पूण, तिसऱ्या सत्रांत जें घडलें ताचो बांगलादेशान लेगीत विचार करूंक नासतलो. भारताची स्पीन जोडी आश्विन आनी जडेजा हांणी फकत भारताक संकश्टांतल्यान भायर काडूंक ना जाल्यार पयल्या दिसाचो खेळ सोंपलो भारताची स्थिती बांगलादेशा परस बरी करून दवरिल्ली.
हसन महमूदान भारताक चार धपके दिल्या उपरांत यशस्वी जयस्वाल आनी लोकेश राहुल हांणी भारताचो डाव सांबाळपाक सुरवात करता थंय आसा सेगीत दोन ओव्हरींनी दोगूय वळेरेन नाहिद राणा आनी मेहदी हसन मिराज हांचे शिकार थारले. भारताचो डाव पयल्याच दिसा सोंपतलो अशें दिशिल्लें. पूण, जडेजा आनी आश्विन हांणी प्रती हल्लो सुरू केलो. दुसऱ्या सत्रांत तांणी आनीक विकेट पडपाक दिली ना. तिसऱ्या सत्रांत लेगीत दोगांयचे बॅटींग शैलींत कसलोच बदल जावंक ना. तांचे बॅटिंगे मुखार बांगलादेशाच्या बॉलरांचो आत्मविस्वास ल्हवल्हव उणो जायत गेलो.
पयल्या दोन सत्रांनी भारतान 3-3 विकेटी व्हगडावन 88 धांवड्यो केल्ल्यो. पूण, तिसऱ्या सत्रांतल्या 19 ओव्हरींनी भारतान 95 धांवड्यो केल्ल्यो. दोगांयनी आपले अर्द शेंकडे लेगीत पुर्ण केल्ले. पयल्या दोन सत्रांनी 48 ओव्हरी खेळून वट्ट 176 धांवड्यो केल्ल्यो. पूण, तिसऱ्या सत्रांत भारतान 163 धांवड्यो केल्यो.
जडेजा 13 धांवड्यांचेर आशिल्लो त्या वेळार महमूदाचे बॉलिंगेचेर अंपायरान ताका एलबीडब्ल्यू बाद दिल्लो. जडेजान डीआरएस घेतलो. तातूंत बॉल ताच्या बॅटाक लागून उपरांत पांयाक लागिल्ल्याचें स्पश्ट जालें.
मजगतीं, भारताक मुखेली रोहीत शर्माच्या रुपान पयलो धपको बसलो. ते उपरांत फुडले दोन धपके 20 धांवड्यां भितर बसले. 34 धांवड्यांचेर भारतान तीन विकेटी व्हगडायिल्ल्यो.
दावखुसो जयस्वाल खेळपट्टीचेर आशिल्लो. तरी आसतना पंगड वेवस्थापनान राहुला बदला ऋषभ पंताक वयले सुवातेर बॅटिंगेक धाडलो. पंचान सदचे भशेन सुरवात केली आनी जयस्वाला वांगडा मेळून डाव सांबाळ्ळो. जेवणाच्या विसवा मेरेन पंत 33 आनी जयस्वाल 37चेर खेळटाले.
दुसऱ्या सत्रांत भारत बरे स्थितींत पावतलो अशें दिसता आसतना पंत बाद जालो. विराट कोहली लेगीत चड वगत खेळपट्टीचेर तग धरपाक शकलो ना. महमूदान चार विकेटी घेतल्यो. तातूंतले तीन बॅट्समन स्वताचे चुकीक लागून बाद जाल्ले. शुभमन गील लेगीत लेग स्टम्पा भायर वचपी बॉलाक क्लीक करपाच्या यत्नांत विकेटकीपराक कॅच दिवन परतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
