भांगरभूंय | प्रतिनिधी
पेडणें: पेडणेंच्या उपनगराध्यक्षपदा खातीर आश्विनी पालयेंकार हांचो एकमेव अर्ज आयिल्ल्यान वेंचणूक अधिकारी तशेंच पेडणें म्हाल उपजिल्होधिकारी दीपक वायंगणकार हांणी आश्विनी पालयेंकार हांची बिनविरोध निवड जाल्ल्याचें जाहीर केलें.
बुधवारा सकाळीं पेडणें पालिकेची उपनगराध्यक्षपदा खातीर वेंचणूक जाली. ह्या वेळार पेडणें पालिका मुख्याधिकारी अनील राणे सरदेसाय, नगराध्यक्ष माधव सिनाय देसाय, नगरसेविका उषा नागवेंकार, नगरसेविका विशाखा गडेकार, नगरसेवक शिवराम तुकोजी, नगरसेविका तृप्ती सावळ देसाय, नगरसेवक सिद्धेश पेडणेंकार, नगरसेवक मनोज हरमलकार हाजीर आशिल्ले. नगरसेवक विष्णू साळगांवकार, नगरसेविका राखी कलशांवकार हे दोग जाण वेंचणूक प्रक्रियेचे बसकेक गैरहाजीर रावले. तृप्ती सावळ देसाय हांणी उपनगराध्यक्षपदाचो राजिनामो दिले उपरांत तें पद रितें जाल्लें. आश्विनी पालयेंकार हांचो ह्या पदा खातीर एकमेव अर्ज आयिल्ल्यान तांची ह्या पदा खातीर बिनविरोध निवड जाली.
दीपक वायंगणकार हांणी वेंचणूक अधिकारी म्हूण हाजीर राविल्ले. नगराध्यक्ष माधव सिनाय देसाय आनी हेर नगरसेवकांनी आश्विनी पालयेंकार हांकां फुलां तुरो दिवन परबीं भेटयली.
पेडणें मतदारसंघाचे आमदार प्रवीण आर्लेकार हांणी आश्विनी पालयेंकार हांकां परबीं दिली. तांणी सांगलें, पेडणें पालिकेचे सर्वांगी उदरगती खातीर आपलो पुराय तेंको आसा. पेडणें पालिका मंडळान बरें काम करून लोकांचीं काळजां जिखचीं. नगरसेवकांनी दिल्ल्या तेंक्याक लागून आपली उपनगराध्यक्षपदार निवड जाल्या. आपूण तांची खूब खूब उपकारी. पेडणें पालिका वाठाराची उदरगत करतन आमदार प्रवीण आर्लेकार हांचो आदार घेतली, अशें आश्विनी पालयेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
