भांगरभूंय | प्रतिनिधी
फोंडें: आशेवाडो-बेतोडच्या कावलां अड्ड्याक शेनवारा सकाळीं सुमार ३ वरांचेर उजो लागलो. रातच्या वेळार उज्यान भिरांकूळ रूप धारण केले उपरांत फोंडें, कुंडय आनी मडगांव उजो पालोवपी दळाचे कर्मचारी थंय पावले. हो उजो पालोवपा खातीर सुमार २० परस चड बंबचो वापर केलो. कावलां अड्ड्याक अनवळख्यांनी उजो लायिल्ल्याचो दुबाव उक्तायतात. ह्या उज्यांत अड्ड्याचें लाखांनी रुपयांचें लुकसाण जालां. पंचायत वाठारांतले बेकायदेशीरपणान सुरू आशिल्ले कावलां अड्डे बंद करपाची मागणी थळाव्यांनी केल्या.
आशेवाडा-बेतोडच्या कावलां अड्ड्याक शेनवारा सकाळीं लागिल्ल्या उज्यांत व्हड प्रमाणांत गुदांवांत सांठोवन दवरिल्लो माल तशेंच प्लास्टीक लासून गोबोर जालो. उजो लागिल्ल्याची म्हायती मेळटांच सकाळीं ३ जावन २० मिनटांनी उजो पालोवपी दळाक म्हायती दिली. उपरांत फोंडें, मडगांव आनी कुंडयच्या उजो पालोवपी दळाचीं वाहनां घडणुके सुवातेर पावलीं. गुदांवां लागसार वचपी रस्तो अशीर आशिल्ल्यान एकूच उजो पालोवपी दळाचें वाहन उजो लागिल्ले सुवातेर व्हरून तो पालोवपाक सुरवात केली. तेन्ना गुदांवां लागसार आशिल्लो एक टॅम्बो लासून गोबोर जालो. उजो पालोवपी दळाच्या कर्मचार्यांनी उज्याचेर नियंत्रण दवरपा खातीर जायते यत्न केले. शेनावारा सांजेवेळार मेरेन उज्याचेर निमंत्रण दवरपाक कर्मचार्यांक येस आयलें.
नाझिर सिद्धीकी ह्या कावलां अड्ड्याच्या धनयान दिल्ले म्हायती प्रमाण, फाटल्या कांय म्हय्यां पसून रातच्या वेळार गुदावांतली वीज पुरवण पुरायेन बंद करताले. हाका लागून शॉर्ट सर्किटाक लागून उजो लागपाकूच शकना. अनवळख्यान कोणीतरी निश्चीत उजो लायला. ह्या वाठारांत बसयिल्ल्या सीसीटीव्ही कॅमेरे तपासतले. ह्या उज्यांत लाखांनी रुपयांचें लुकसाण जाल्ल्याचें तांणी सांगलें.
शेनवारा सकाळीं उजो लागिल्ल्याची म्हायती मेळ्ळे उपरांत ग्रामस्थांनी वाठारांत वचून तपासणी केली. तेन्ना आदले सरपंच बाबुराव सालेलकार हांणी दिल्ले म्हायती प्रमाण, ह्या वाठारांतले कावलां अट्टे बंद करपाची सामकी गरज आसा. थळावे लोक कावलां अड्डे बंद करपाची मागणी केल्ल्यान हे विशीं ग्रामपंचायतीन दखल घेवपाची गरज आशिल्ल्याचें तांणी सांगलें.
थळावे पंच उमेश गावडे हांणी सांगलें, आपूण सरपंचपदार आसतना पंचायत वाठारांतल्या सगल्या कावलां अड्ड्यांक नोटीस धाडिल्ली. मात ताचे उपरांत सरपंच बदल्ले उपरांत प्रक्रिया पुराय जावंक नाशिल्ल्याची शक्यताय आसा. शेनवारा सकाळीं कावलां अड्ड्याक उजो लागलो. हाका लागून सगल्या पंचायत वाठारांतल्या कावलां अड्ड्यांक परत नोटीस काडपा खातीर यत्न करतलों अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
