भांगरभूंय | प्रतिनिधी
खबरां संस्था
नवी दिल्लीः आशिया कप क्रिकेट सर्तीं खातीर अजीत आगरकर हांच्या फुडारपणा सकयल्ले निवड समितीन सोमाराक 17 वांगड्यांच्या भारतीय पंगडाची घोशणा केली. कॅप्टन रोहीत शर्मा आनी व्हायस कॅप्टन हार्दिक पंड्या हांच्या फुडारपणा खाला भारतीय पंगडाची बांदणी केल्या. विकेटकीपर केएल राहुल, बॅट्सम श्रेयस अय्यर, फास्ट बॉलर जसप्रीत बुमराह आनी प्रसिद्ध कृष्णान पंगडांत पुनरागमन केलां. स्पीनर युजवेंद्र चहलाक पंगडांत सुवात मेळ्ळी ना.
पंगडांत नंबर 4चे सुवातेर श्रेयस अय्यर हाच्या वांगडा सूर्यकुमार यादव आनी 20 वर्सा पिरायेच्या तिलक वर्माची निवड केल्या. संजू सॅमसनाक राखीव विकेटकीपर म्हणून पंगडांत सुवात मेळ्ळ्या.
आशिया कप सर्त 30 ऑगस्टाच्यान पाकिस्तान आनी श्रीलंकेंत जातली. भारताची पयली मॅच 2 सप्टेंबराक पाकिस्ताना आड श्रीलंकेंत जातली. ह्या सर्तींत भारताक पाकिस्तान आनी नेपाळा सयत अ गटांत घातलां. श्रीलंका, बांगलादेश आनी अफगाणिस्तान ब गटांत आसात.
ईशान किशन पंगडाचो विकेटकीपर आसतलो. टॉप आर्डरींत रोहीत शर्मा वांगडा शुभमन गील आसतलो. राहुलान भारता खातीर निमणी वन-डे अंदू 22 मार्चाक खेळल्लो. मे म्हयन्यांत फिल्डींग करतना ताका दुखापत जाल्ली. शस्त्रक्रिया केल्या उपरांत तो आतां फीट आसा आनी आंतरराष्ट्रीय क्रिकेट खेळपाक तयार जाला.
भारताच्या फास्ट बॉलराचें फुडारपण जसप्रीत बुमराह करतोलो. तांच्या वांगडा मोहम्मद शमी, प्रसिद्ध कृष्णा आनी मोहम्मद सिराज आसतले. शमी फाटल्या 7 जूनाक ऑस्ट्रेलिये आड वर्ल्ड टॅस्ट चॅम्पियनशीपीचे फायनली उपरांत आंतरराष्ट्रीय मॅच खेळो ना. सिराज वेस्ट इंडिजांत टॅस्ट माळे उपरांत भारतांत आयिल्लो. प्रसिद्ध कृष्णा सध्या आर्यलण्डा आड भारतीय पंगडांत आसा. आर्यलंण्डा आड जसप्रीत बुमहार भारतीय पंगडाचें फुडारपण करता. ताचे आडचे दुसरे टी-20 मॅचीत ताणे दोन विकेटी घेतल्यो. ताचो खेळ पळोवन तांका आशिया कप सर्ती खातीर भारतीय पंगडांत घेतला. 14जुलय 2022 दिसा तो भारता खातीर इंग्लंडांत इंग्लंडा आड खेळल्लो. 13 म्हयन्यां उपरांत तो वन-डेत खेळटना दिसतोलो. रवींद्र जडेजा, अक्षर पटेल आनी शार्दुल ठाकूर अश्टतासी खेळगडे आसात. स्पीनर म्हणून कुलदीप यादवाक पंगडांत घेतला.
पाकिस्तानात मुल्तान हांका 30 ऑगस्टाक पाकिस्तान आनी नेपाळ हाचे मदले मॅचीन आशिया कप सर्तीक सुरवात जातली. सर्तींतल्यो चार मॅची पाकिस्तानांत आनी 9 मॅची श्रीलंकेंत जातल्यो. भारतीय पंगड आपल्यो सगल्यो मॅची श्रीलंकेंत खेळटलो. तांची पयली मॅच 2 सप्टेंबराक पाकिस्ताना आड आनी 4 सप्टेंबराक नेपाळा आड जातली
आशिया कप खातीर भारतीय पंगड
रोहित शर्मा (कॅप्टन), हार्दिक पंड्या (व्हायस कॅप्टन) शुबमन गील, विराट कोहली, श्रेयस अय्यर, सूर्यकुमार यादव, तिलक वर्मा, केएल राहुल, इशान किशन, रवींद्र जडेजा, शार्दुल ठाकूर, अक्षर पटेल, कुलदीप यादव, जसप्रीत बुमराह, मोहम्मद. शमी, मोहम्मद. सिराज प्रसिद्ध कृष्ण राखीव खेळगडो: संजू सॅमसन
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
