भांगरभूंय | प्रतिनिधी
खबरां संस्था
दुबयः पोरूं भारताक थॉमस कप, राष्ट्रकूल सर्ती आनी वर्ल्ड चॅम्पियनशीप सर्तींत भारताक पदक मेळोवन दिवपी चिराग शेट्टी आनी सात्विकसाईराज रंकीरेड्डी जोडयेन आनीक एक कामगिरी करून भारताक आशियाई बॅडमिंटन सर्तीचे दोट्टींत भारताक पयलें भांगरा पदक जोडून दिलें.
आशियाई बँडमिंटन सर्तींच्या 61 वर्सांच्या इतिहासांत भारतीय जोडयेन भांगरा पदक मेळोवपाची ही पयलीच खेप आसा. इतलेंच न्हय जाल्यार हे जोडयेन भारताक 1965 उपरांत चॅम्पियशीपीचें दुसरें भांगरा पदक मेळोवन दिलां. हाचे पयलीं दिनेश खन्नान एकोडीत देशाक पयलें भांगरा पदक मेळोवन दिल्लें.
दुबयंत आयतारा जाल्ले दोट्टीचे फायनलींत चिराक आना सात्विकान ओंग यू सीन आनी तेओ ईओ यी की हे मलेशियन जोडयेक 21-16, 17-21, 21-19 अशें हारयलें. ही गेम 1 वर 7 मिनटां चल्ली. हे कामगिरी उपरांत बॅडमिंटन असोसिएशन ऑफ इंडियाचो अध्यक्ष हेमंत विस्वा सरमान सात्विक-चिरागाक 20 लाख रुपयाचें इनाम जाहीर केलां.
निमाणे गेमींत जैत
दोट्टीच्या फायनलींत ओंग यू सीन- तेओ ईओ पी आड सात्विक-चिरागान 2-1 अश्या गेमीनी जैत मेळयलें. पयली गेम सात्विक-चिरागान 21-16 अशी एकतर्फी जिखली. दुसरे गेमीत मलेशियन जोडयेन 21-17 अशें जैत मेळोवन बोरोबोरी केली. तिसरे आनी निर्णायक गेमींत सात्विक-चिरागान नेटान पुनरागमन केलें, सुरवेक भारतीय जोडी 11-15 अशें फाटीं आशिल्ली. उपरांत तांणी 21-19 अशें जैत मेळोवन भांगरा पदक आपल्या नांवार केलें.
सात्विक-चिराग जोडयेक तायवानच्या जोडयेन वॉक ओव्हर दिल्लें. पयले गेमीत सात्विक-चिरागान 21-18 अशें जैत मेळयल्लें. दुसरे गेमी वेळार ची लीनाक दुखापत जाल्ल्यान लीन आनी यांग जोडयेक खेळ सोडचो पडलो. 1961 उपरांत आशियाई बँडमिंटन सर्तीचे दोट्टींत प्रवेश करपी सात्विक-चिराग पयली भारतीय जोडी थारल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
