भांगरभूंय | प्रतिनिधी
खबरां संस्था
मुंबयः गुवाहाटी- आसामच्या तामूलपूर खेळां संकुलांत जाल्ले चवथे आशियाई खो खो सर्तींत भारताच्या दादल्यांच्या आनी बायलांच्या पंगडांनी नेपाळाच्या पंगडांचेर जैत मेळोवन सर्तीतलें वस्तादपण मेळय़लें.
बायलांच्या पंगडांत नेपाळाच्या पंगडान बरी कामगिरी केली. मात भारतीय पंगडांत अणभवी आनी दर्जेदार खेळगडींचो आसपाव आशिल्ल्यान मॅच एकतर्फी जाली.. भारतान नेपाळाक 49-16 अशें एक डाव आनी 33 गुणांनी हारयलें. भारता वतीन गौरी शिंदे (नाबाद 1.15 मिनटा राखण आनी 2 गुण), दीपिका चौधरी, मिनू,, प्रियांका इंगळे, अपेक्षा सुतार हांणी बरो खेळ करून जैतांक म्हत्वाचें योगदान दिलें. नेपाळा वतीन बिनू तानंनगा, पुजा ओद सोडल्यार बाकीच्या खेळगडींनी व्हडलीशी कामगिरी केली ना.
भारताच्या दादल्यांच्या पंगडान फायनलींत नेपाळाक 38-32 अशें हारयलें. एक डाव आनी 6 गुणांनी भारताक जैत मेळ्ळें. भारताच्या धारदार आक्रमणा सामकार नेपाळाचो बचाव तिगलो ना. कॅप्टन अक्षय भांगरे, अनिकेत पोटे, अक्षय गणपुले, अमीत हांणी सामको बरो खेळ केलो. नेपाळा वतीन धर्मा, बिकामा, बिश्वा हांणी बरो खेळ केलो.
आशियाई सर्तीचे तिसऱ्या नंबराचो पुरस्कार श्रीलंका आनी बांगलादेशाक फावो जालें. आसामाचे राज्यपाल गुलाबचंद कटेरिया हांचे हस्तुकीं जालें. ह्या वेळार बोरॉलॅण्डाचे मुखेली प्रमोद बोरा, खो खो फेडरेशनाचे अध्यक्ष सुधांशु मित्तल, सचीव एम त्यागी हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
