भांगरभूंय | प्रतिनिधी
खबरां संस्था
नवी दिल्लीः आशियाई खेळाचे कुस्तीचे चांचणी मॅचींत आयतार व्हडलो उलटफेर पळोवपाक मेळ्ळो. ऑलिम्पीक रुप्या पदक जिखपी दिग्गज मल्ल रवी दहियाचें आशियाई खेळां सर्तींत खेळपाचें सपन सपनूय उरलें. 57 किलो वजनाच्या गटांत रवी दहियाक महाराष्ट्राच्या आतिश तोडकारान हारयलें. आतिशान दिल्लीच्या इंदिरा गांधी स्टेडियमांत दहियाक हारोवन सगल्यांक अजपाचो धपको दिलो. रवी दहिया हालींच भारतीय कुस्ती म्हासंघाचो आदलो अध्यक्ष ब्रिजभूषण शऱण सिंह आनी प्रशिक्षकां आड कुस्तीगिरांच्या आंदोनलांत वांटेकार जाल्लो.
आतिश तोडकरान 57 किलो वजनी गटांत 20-8 अशी आघाडी घेवंन ऑलिम्पीक रुप्या पदक जैतिवंताक हारयलें. दहियाक कुशळताय आनी तग धऱपा खातीर ‘द मशिन’ अशें पाचारतात. मात महाराष्ट्राच्या तोडकरा सामकार ताचें कांय चल्लें ना. तोडकारा कडल्यान अशे तरेच्या प्रतिकाराची आस्त नाशिल्ली. जांणी दहियाची कुस्ती पळयल्या तांका दहिया कडल्यान दोन गुण लेगीत घेवप कुस्तार अशें दिसता. मात आतिश तोडकरान अशी काय कामगिरी केली की ताणे ऑलिम्पीक जैतिवंत खेळगड्याक हारयलें. दर्जेदार चाली करून गुणच मेळयले ना जाल्यार व्हडल्या फरकान जैत मेळयलें. उजव्या धोपराक दुखापत जाल्ल्यान रवी दहियान अंदू खंयचेच सर्तींत वांटो घेवंक नाशिल्लो. एसील (एंटेरिअर क्रूसिएट लिगामेंट) आनी एमसीएल (मेडियल कोलवॅटर लिंगामेंट) दुयेंसाक लागून ताणे खेळनाशिल्लो. चांचणी कुस्तींत जैताच्या आस्तेन तो देंवल्लो पूण ताका हार खावची पडली.
रवी दहियान टोकियो ऑलिम्पिकांत रुप्या पदक मेळयल्लें. 2019चे संवसारीक चॅम्पियन सर्तींत ताकां कांस्या पदत मेळल्लें. 2022 च्या राष्ट्रकुल सर्तींत भांगरा पदक जिखपाक तो येसस्वी थारल्लो. आशियाई खेळां सर्तींत ताका अजून पदक मेळोवपाक जमलें ना. अंदूंय ताचें तें सपन पुराय जावचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
