भांगरभूंय | प्रतिनिधी
खबरां संस्था
नवी दिल्लीः सध्या सुरू आशिल्ले आशियाई खेळां सर्तींत वांटेकार जावपा खातीर भारताचो दादल्यांचो क्रिकेट पंगड चीनात पावला. ऋतुराज गायकवाडाच्या फुडारपणा खाला पंगड बिरेस्तार सकाळी मुंबयच्यान हांगझूला वचपाक भायर सरलो. भारतीय पंगड 3 ऑक्टोबराच्यान मॅची खेळपाक सुरवात करतलो.
टी-20 क्रमवारींत बरे स्थितीक लागून भारतीय पंगडाक चीनांत चड मॅची खेळच्यो पडच्यो नात. भारतीय पंगड सरळ उपांत्यपूर्व मॅचींत खेळटलो. हे फेरयेंत पाकिस्तान, अफगाणिस्तान आनी बांगलादेशाचो आसपाव आसा. हांगझूला पावतगीर जावेलीन थ्रोतलो ऑलिम्पीक भांगरा पदक जैतिवंत नीरज चोप्रा भारतीय क्रिकेट खेळगड्यां वांगडा दिसलो. आयपीएलांतलो आक्रमक बॅट्समन रिंकू सिंगान ताच्या इन्स्टाग्राम अकांवटाचेर नीरजाचो फोटो शॅर केला. ह्या फोट्यांत रिंकू सयत आवेश खान, रवी बिश्णोय, जितेश शर्मा आनी अर्शदीप सिंग हांचो आसपाव आसा.
भारतीय पंगडः ऋतुराज गायकवाड (कॅप्टन ), मुकेश कुमार, शिवम मावी, शिवम दुबे, प्रभासिमरन सिंग (विकेटकीपर), यशस्वी जैस्वाल, राहुल त्रिपाठी, टिळक वर्मा, रिंकू सिंग, जितेश शर्मा (विकेटकीपर), वॉशिंग्टन सुंदर, शाहबाज अहमद, रवी बिश्नोई, अव्वल खान आनी अर्शदीप सिंग.
नीरजाची कामगिरी 4 ऑक्टोबरच्यान
जाकार्ता हांगा जाल्ले आशियाई खेळां सर्तींत नीरज चोप्रान भारताक जावेलीनांतलें भांगरा पदक जिखून दिल्ले. 4 ऑक्टोबराच्यान तो आपली कुशळताय दाखयतोलो. हांगझूला एशियाडांत तो आपले हे कामगिरीची पुनरावृत्ती करतोलो अशी दरेकल्याची अपेक्षा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
