भांगरभूंय | प्रतिनिधी
शिलॉंग, खबरां संस्था: देशांतली नितळसाण आनी सैमाची जतनाय घेवपी गांवांक केंद्र सरकार खाशेलो पुरस्कार भेटयता. भारतांत अशे जायते ल्हान व्हड गांव आसात. पूण देशांत एक गांव आसा जो भारतांतच न्हय तर पुराय आशियांत सगळ्यांत नितळ आनी सोबीत मानतात. ह्या गांवांतल्या दरेका घरांत शौचालय आसा. हांगा प्लास्टीकचेरूय पुरायेन बंदी घाल्या. इतलेंच न्हय तर गांवांत जायत्यो येवजण्यो चालीक लायल्यात.
ह्या गांवाक ‘देवची बाग’ (God’s Own Garden ) अशेंय म्हणटात. ह्या गांवाचें नांव मॉलिनॉन्ग. मेघालय राज्यांतलो हो सोबीत गांव (Mawlynnong village, Meghalaya) पळोवपाक हजारांनी पर्यटक येतात. मेघालयाची राजधानी शिलॉंग सावन ७८ किमी. अंतराचेर मॉलिनॉन्ग हो गांव आसा. ह्या गांवाक आशियांतलो ‘सगल्यांत नितळ गांव’ हो पुरस्कार २०२३ वर्सा ‘डिस्कवर इंडिया’ कडल्यान मेळ्ळा. ह्या गांवांत नितळसाण खरपणान पाळटा. ‘मॉलिनॉन्ग’ ह्या गांवांत खासी जमातीचे लोक रावतात.
दरेका घरांत शौचालय
मोलिनोंग गांवांत साक्षरतेचें प्रमाण शंबर टक्के आसा. ह्या गांवांत २००७ वर्सा सावन दरेका घरांत शौचालय आसा. हांगा उक्ताडार शौच करिनात. गांवच्या दरेका कोनशाक बेतकाठयेचे कोयराचे डबे दवरल्यात. तशेंच व्हड व्हड कोयराचे डबे झाडां पोंदाक दवरल्यात. जाका लागून झाडांवयलीं सुकिल्लीं पानां ह्या डब्यांनी पडटात. ह्या गांवांत कोणूच पान खावन रस्त्यार थुकना. तशेंच प्लास्टीक पोतयो वापरनात. हांगा शंबर टक्के प्लास्टीकचेर बंदी घाल्या. पर्यावरण प्रदुशीत जावचें न्हय हे खातीर ह्या गांवांत सिगरेटाचेरूय बंदी घाल्या. हो नेम हांगचे लोक खरपणान पाळटात. नेम मोडल्यार ख्यास्त दिवपाचीय तजवीज केल्या.
स्वावलंबी गांव
‘मॉलिनॉंग’ ह्या गांवाचें आनीक एक खाशेलपण म्हळ्यार हो गांव पुरायपणान स्वावलंबी आसा. गांवकारांक भायल्या लोकांचेर आदारून रावपाची गरज ना. हांगाचे लोक शेतवडी खातीर स्वताचें सारें तयार करतात. कोयरांतल्यान कंपोज्ड तयार करपाचो प्रयोग ताणें येसस्वीपणान दाखयला. शेतालागीं व्हड व्हड खड्डे करून गांवचो सगळो कोयर तातूंत उडयतात, उपरांत ताचेर प्रक्रिया करून शेण तयार करतात. लोक फकत घर नितळ दवरपूच न्हय तर दर दिसा आपल्या घरा मुखारचो रस्तोय झाडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
