भांगरभूंय | प्रतिनिधी
क पटी मनीस दोळ्यां मुखार दिसलो म्हणटकच कुरुक्षेत्रा वेल्या दुर्योधनाची कोणाक याद जाले बगर रावची ना. आज लेगीत दुर्योधना सारके कितलेशेच कपटी मनीस हे धरतरेचेर पातळिल्ले आसात. ही गजाल भारतान पाकिस्तानाचेर ऑपरेशन सिंदूर ही सैन्य कारवाय सुरू केल्ल्या दिसा सावन आमकां पळोवंक आनी अणभवूंक मेळत आसा. कांय मनशांक आपल्या सुवार्था मुखार हेर कोणाचे सूख दुख्ख केन्ना दिसना म्हणटात तेंच खरें. आयज म्हाका याद जाता पितामह भीष्म हांची, ते सत्यवादी, परोपकारी, बळिश्ट झुजारी, इत्सामरणाचें देणें तांकां मेळिल्लें. अशें आसून लेगीत दुश्ट दुर्योधनाच्या पंगडाक आलाशिरो दिल्ल्या कारणान झुजामळार शरपंज्यर जावन 18 दीस पडून उरिल्ले. आनीक एक गजाल न विसरपा सारकी ती म्हणल्यार हस्तिनापुराच्या कल्याणा खातीर तांणी सोपूत घेतिल्लो. तो सोपूत ‘भीष्म प्रतिज्ञा’ म्हूण संवसारभर नामनेक पाविल्लो. अशें न्हय की तांणी दुर्योधनाक समजावपाचो यत्न करूंक नाशिल्लो. दुर्योधन जेन्ना जेन्ना पांडवा विरुध कारस्थान रचतालो पितामहा ताका समजावचो यत्न करतालो पूण ताका समजणी दिवंक वा ताका अद्दल घडोवंक तो केन्ना सफळ जालो ना. हस्तिनापुराची चिंता ताची न्हीद पिड्ड्यार करताली. पूण दुर्योधनाक ताचे मात लेगीत पडून वचूंक नाशिल्लें. तो साम, दाम दंड भेदसा रकिल्लीं आवतां वापरून पांडवांक नानपयत करूंक पळयतालो. युधिष्ठिराक द्युत खेळांत हारयले उपरांत कौरवांनी द्रौपदीच्यो भोयोभोयो केल्यो. तो प्रसंग पितामहा भीष्म थांबोवंक शकतलो आशिल्लो. अशें त्या सभेंत हाजीर आशिल्ल्या व्हडल्या व्हडल्या धर्मात्म्यांक दिसतालें आसत पूण भीष्मान खर प्रयत्न करूंक नाशिल्ल्यन दरबारांतले कोणूच तो वायट प्रसंग आडावंक शकले नात. ताकाच लागून खंय भीष्म आपले पुण्य व्हगडावन बशिल्लो. हरशीं तो पुण्यवान मनीस पूण म्हणटात न्हय मनशाच्या हातान कळत नकळत चुको घडटात म्हण.
अशीच एक चूक आदल्या जल्मांत भीष्मा कडल्यान घडिल्ली. एक दीस रानांतल्यान शिकार करून परततना मार्गा देगेरआशिल्ल्या रुखा वेल्यान एक सोरोप ताच्या घोड्यार पडलो. तो सोरोप तांणी बाणाच्या तोकान उखलून मार्गाचे देगेर उडयिल्लो. तो सोरोप मार्गा देगेर आशिल्ल्या कांटयार्या झिलिंनी पडिल्ल्यान ताचे फाटीक कांटें तोंपले. तो जितलो कांटें वाटावन भायर सरपाचो यत्न करतालो तितलेच नेटान कांटें ताचे फाटींत घुसत रावले. 18 दीस कांटें सोंशींत तो थंय पडून उरिल्लो निमाणें सोंसू नज जावन ताणें जीव सोडलो. मरतना ताणे भीष्माक स्राप दिलो, ‘भीष्म, तूं मरतना म्हजे सारकोच कांटें तोपून दुख्ख सोंशींत वळवळत मरतलो म्हण.’ इतिहास खंय परत घडचो न्हय अशें म्हणटात पूण कांय जणांचे बाबतींत तशें घडूं येता. भीष्म सारकिल्ल्या तेजवंत झुजारी फुडाऱ्याचे बाबतींत अशें घडूंक शकता जाल्यार फटींग आनी बेइमान मनशांचेर ही पाळी कित्याक येवची न्हय. तांकांय अद्दल घडोवंकच जाय नाजाल्यार ते दुश्ट संवसाराक पिडत रावतात.
ऑपरेशन सिंदूर वरवीं भारतीय सैन्यान तेंच केलां. आमचें सैन्य दळ बळिश्ट, कुशळ, हुशार, दुरदुश्टी आशिल्लें खंयचेय परिस्थितींत दुस्मानांक दाळाक लावपाची तांक दवरता. हाचे पुरावे पुराय संवसारा मुखार दवरून तांणी आपली शक्त, संयम आनी धिटाय सगल्यांक दाखोवन दिली. तांच्या ह्या विलक्षण कामगिरीक लागून तांचे फाटीर हात दवरून पीएम मोदीन तांकां शाबासकीय दिली. जाची तोखणाय जावपाकच जाय. एक सक्षम फुडारपण आसले बगर अशे तरेचें जैत मेळना. आमची फौज जशी निबर हड्ड्याची आसा तसोच पीएम मोदीचो पंगड घटमूट आसा. देशा खातीर जुस्त आनीक कडक निर्णय घेवंक सरकार तत्पर आसा. हाचोय अणभव पुराय संवसाराक आयला आसतलोच हातूंत दुबाव ना. पितामहा भीष्म बळिश्ट आनी देशभिमानी आशिल्लो पूण तो हस्तिनापुर वाटावंक कडक निर्णय घेवंक शकलो ना. हाचे दुख्ख त्या काळार भौसाक जाले बगर रावंक ना आसतलें इतलें खरें.
आयज नव्या भारताचे घडणुकेत हेर राज्यां वरीं गोंयच्या तरणाट्यांनी लेगीत आपखोशयेन वांटेकार जावंक जाय. ते खातीर बरेच कश्ट घेवन स्पर्धा परिक्षेची तयारी करूंक जाय. गोंय राज्या खातीर वेगळें कितें करपाची मोख दवरून तयारी करीत जाल्यार यश मेळूं येत. गोंयच्या तरणाट्यांक IPS, भारतीय पुलीस सेवा, IAS, भारतीय प्रशासनीक सेवा आनी IFS, भारतीय रान सेवा. ह्या म्हत्वपूर्ण फांट्यांनी आपले पांय दवरचें अशें दिसना काय ? ते भायर UPSC केंद्रीय लोकसेवा आयोग आनीक GPSC गोंय लोक सेवा आयोग ह्या दोन फांट्यांचोय तरणाट्यांनी विचार करून पावल मारचो यत्न करूंक जाय. आनीक एक म्हत्वपूर्ण क्षेत्र भारतीय सशस्त्र दळ जाचे तीन फांटे आसात. भारतीय सेना, भारतीय नौदळ आनी हवाई दळ. हाचे खेरीत CAPF केंद्रीय सशस्त्र पुलीस दळ आनी भारतीय तटरक्षक दळ. ह्या सगल्या फांट्यांत गोंयकार तरणाट्यांक आकर्शीत करचे खातीर गोंय सरकारान उपाय सोदूंक जाय. नौदळ फाट्यांत इलेक्ट्रिकल इंजिनियरींग, शिक्षण, कायदो आनी कार्यकारी शासन अशा विवीध फांट्यांत वेगळ्या वेगळ्या पदां खातीर गोंयकारांनी आपली तयारी करूंक जाय. हीं पदां मेळोवंक कठीण पूण भरपूर तयारी करीत तर अश्यक्य अशें कांय नासता हिवूय गजाल तितलीच खरी.
गोंयच्या तरणाट्यां मुखार अनेक आव्हानां आसात पूण तांकां आपली कुशळटाय सिद्द करून तीं आव्हानां पेलचीं पडटलीं. आपल्या आवडीच्या क्षेत्रांत पांय दवरतले जाल्यार कश्ट घेवचेंच पडटले नाजाल्यार ह्या स्पर्धात्मक युगांत फाटीं पडत रावतले. जांकां स्वताचो उद्देग वेवसाय करचो आसा तांकां मेक इन इंडिया हें एक प्लेटफार्म जांव येता. सरकारच्यो खंयच्यो येवजण्यो आपल्याक लागू पडटा हाचो अभ्यास करून तरणाट्यांनी हाचो लाव घेवपाचो प्रयत्न जरूर करचो. इत्सा आसत तर बंद आशिल्ले मार्ग लेगीत आपसूक उक्ते जातात खंय. आव्हानां पेलपाची मोख आसत तर वयर उल्लेख केल्लीं क्षेत्रां तुमची वाट पळयतात. चलात उठात आनी आपलो फुडार घडोवपाचे तयारेक लागात.
एच मनोज
9822441417
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
