आव्हानांचे दोंगर मुखार….

भांगरभूंय | प्रतिनिधी

अखेरेक गोवा कोंकणी अकादेमीक अध्यक्ष मेळ्ळो. कवी, गायक, संगीतकार अशें अश्टताशी व्यक्तीमत्व आशिल्ले पूर्णानंद च्यारी हांची नेमणूक अध्यक्षपदाचेर जाल्या. पूर्णानंद कुशळ संघटक, धडपडी व्यक्तीमत्व. जायत्यो संघटना, संस्था, संमेलनां, महोत्सवांक तांणी योगदान दिलां. जायते फावटी पड्ड्या फाटल्यान रावन. तांची ही नेमणूक म्हणल्यार त्या कार्याची पावतीच. तांच्या भुजाचेर आतां व्हडली जापसालदारकी आयल्या…. आनी आव्हानांचे दोंगर हुपून ती ते आपल्या वांगड्यांच्या पालवान येसस्वीपणान सांबाळटले, हातूंत दुबावूच ना.
गोवा कोंकणी अकादेमी स्थापन जाली 1986 त. कोंकणी भाशा, साहित्य, संस्कृताय मुखार हाडप, उदरगत करप हें अकादेमीचें मुखेल कार्य. राजभास संचलनालया खाला ती चलता. भाशा, साहित्य, संस्कृती विशींचें संशोधन कार्य करप, पुस्तकां, नेमाळीं प्रकाशीत करप, नव्या लेखकांक उर्बा दिवप, सांस्कृतीक कार्यावळी, नाट्य महोत्सव आयोजीत करप, शब्दकोश आनी हेर तत्सम ग्रंथ उजवाडावप, कोंकणी भाशेची प्रमाणपत्र परिक्षा घेवप, पयल्या पुस्तकाक 75 टक्के अनुदान दिवन ताचीं 100 पुस्तकां विकत घेवप…. अशे साबार उपक्रम अकादेमीचे.
कोंकणीच्या मळाचेर उत्सवी कार्यावळी जावच्योच, पूण ताचे परस चड कोंकणी भाशेक सर्वार्थान फायदेशीर थारतल्यो अश्यो रचनात्मक (कन्स्ट्रक्टीव्ह) कार्यावळी, उपक्रम जावचे. कोंकणीक भाशेचो दर्जो मेळून वर्सूच जालां, अशें समजून सगल्यांनी कोंकणीचीं विवीध आंगां गिरेस्त, आनीक गिरेस्त करपा खातीर सदांच आपले परीन निसुवार्थीपणान झटपाची गरज आसा. बेगीन धादोशी जाल्यार तें कांय बाबतींत मारक थारता, अशें म्हणटात. तें कोंकणीचे बाबतींत जावचें न्हय. रचनात्मक काम करप्यांनी तर निमण्या स्वासा मेरेन अतृप्त आसप गरजेचें.
कोंकणी अकादेमी ‘पयलो चंवर’ येवजणे खाला पुस्तकां छापता. तीं व्याकरण शुद्ध आसचीं. नाजाल्यार फुडाराक कोंकणी शिकप्यांक खंयचें उतर, वाक्य सारकें तें कळप कठीण वचूं येता. अर्थांत शब्दकोश आसात. व्हडल्या प्रकाशन संस्थां कडेन संपादक मंडळ आसता. तांणी पाचवो बावटो दाखयलो जाल्यारुच तें पुस्तक छापपाक घेतात. तांचे व्याकरण तपासपीय आसतात. कोंकणी अकादेमीक हें सहज शक्य आसा. आयज अनुवादाची गरज आसा. साहित्य अकादेमी भशेन कोंकणी अकादेमीक हो वावर हातांत घेवप शक्य आसा? अकादमीचें घोळटें वाचपघर आशिल्लें. बस ना, तर निदान पिकअप घेवन गांवांनी हें वाचपघर व्हरूं येता. राज्यांतल्या दरेका वाचपघराक पुस्तकां दान करूं येतात. नाट्य, संगीत, लोककला महोत्सव, विवीध कार्याशाळा आयोजीत केल्यार कलाकारांक उर्बा मेळटली. कोंकणी अकादेमीचो एक फांटो मडगांव सुरू करुंक फावो. कारण मडगांव हें कोंकणीचें कुळार कशें. गोंय आनी गोंया भायले कोंकणीमोगीं कोंकणीच्या मळाचेर एकठांय वावुरतना दिसतात. अकादेमीन हो वावर वाडोवं येता.
राज्यांतल्या दरेका तालुक्यांत कोंकणी सेवा केंद्र जावचें. कांय कडेन आसात. केंद्रांचो आनी तांच्या वांगड्यांचो आंकडो वाडल्यार ताचो फायदो कोंकणी चळवळीक जातलो, हें कोणें सांगपाक नाका. थळाव्या वाठारांतले साहित्यकार, कलाकार, जाणकार अश्या सगल्यांक एकठांय हाडून तांच्या गिन्यानाचो लाव घेवपाचो, नव्यांक माची दिवपाचो मोलादीक वावर हीं सेवा केंद्रां करपाक शकतात. भुरग्याचे पांय पाळण्यांत दिसतात, अशी एक म्हण आसा. तसले कोण भुरगे, तरणाटे आसात, जाल्यार तांकां मुखार हाडपाचो, विकसीत करपाचो यत्न सेवा केंद्रां, कोंकणी अकादेमीन चुकनासतना करूंक जाय. काळाची ही गरज.
गोवा कोंकणी अकादमीन 10 वर्सांची मोख दवरून कार्यावळी, उपक्रम चालीक लावंक जाय. चड भर 25 वर्सां सकयल्या कोंकणी भाशकांचेर दिवचो. 15 वर्सां सकयलीं भुरगीं हीं लक्ष्य दवरून काम केल्यार सामकें बरें. कोंकणी भाशा मंडळ ते नदरेन बरो वावर करता. दर्जो, अणभव आशिल्ल्यांक साहित्य, संस्कृतीक उपक्रमांत पयलें प्राधान्य मेळटा. ते खातीर हातपांय बडोवन थकिल्ले नवोदीत मागीर नकळटां फाटीं फाटीं रावतात. अकादेमीन सगल्यां मळांचेर ह्या नवोदितांक पयली संद दिवची. देखीक येवकार गीत, सुत्रसंचालन, उपकार, देशभरांतल्यो साहित्यीक, संस्कृतीक कार्यावळी. भोंवड्यो….. थंय नवे- नवे तरणाटे गेल्यार तांकांय उर्बा, उमेद येतली. हातूंतले 30 टक्के पसून तरणाटे कोंकणी साहित्यकार, कलाकार, संघटक जाले, जाल्यार तें केदें व्हडलें कार्य!!
कोंकणी इंटरनेटाचेर गेल्या. थंय तिचे आनीकूय बावटे हुबपाक जाय. पत्रकारितेच्या मळाचेर नवे तरणाटे येवंक जाय. पूर्णानंद च्यारी हांणी अकादेमी वरवीं शिक्षणीक मळाचेर कार्य करतलों अशें म्हणलां. दरेका तालुक्यांत कोंकणी मुळाव्यो शाळा सुरू जावच्यो. प्रत्येक शाळा, हायस्कूलांत कोंकणी विशय शिकोवंचो. हे खातीर तांकां सरकारा कडेन फाटपुरवण करची पडटली. राजभाशा कायदो प्रशासनांत लागू करपाक वावुरचें पडटलें. कोंकणी अकादेमीन धडाधड कामां हातांत घेतलीं आनी तीं ‘पूर्ण’ जालीं जाल्यार कोंकणी भाशकांक कितलो ‘आनंद’ जातलो, ताची कल्पना करपाक येवचीना. कोंकणी अकादेमीचेर नेमणूक जाल्ल्या सगल्यांक परबीं.