भांगरभूंय | प्रतिनिधी
अावाजाचें प्रदुशण ही घासून घासून गुळगुळीत जाल्ली समस्या. दरवर्सा ताचेर लेख, अग्रलेख, बातम्यो येतात. कोर्टाचे आदेश येतात. पूण, आवाज वाडोवन पार्टी करप चालूच आसा. पयर गोंय प्रदुशण मंडळान 11 ते 19 आॅगस्ट मेरेन वझरांत- वागातोरा पार्ट्यो जावपाक दिवच्यो न्हय, अशें हणजूण पुलिसांक कळयलां. हांगाचीं कांय आस्थापनां उच्च न्यायालयाच्या आदेशा प्रमाण सील केल्लीं. पूण, थंय गुपचूप पार्टेचें आयोजन जाता आसतलें. देखून एका नागरिकान मंडळा कडेन कागाळ केल्ली. ते प्रमाण पुलिसांक हो आदेश दिला. मात, आतां थंय खरेंच पार्ट्यो जावच्यो नात, काय प्रदुशण मंडळाक किंकोत करून त्यो जातात, तें पळोवपाचें. ह्या निर्णयान हणजूण पुलिसांचेर मात चेपण आयलां आसतलें.
गोंय हें पर्यटन केंद्र. म्हणटकच हांगां सोमारा सकाळीं 6 ते दुसरे दीस मंगळारा सकाळीं 6 मेरेन व्हडल्या व्हडल्यान लावडस्पीकर लावपाची इत्सा खूब वेवसायीकांक आसा. कायदो ताका परवानगी दिना तरी व्हडल्या आवाजान पार्ट्यो वाजतात. ताचो दुसऱ्यांक त्रास जाता, ताचें कोणाक पडून गेल्लें ना. म्हाका दुडू मेळ्ळो काय जालो, बाकीचे मारूं झक, ही चडश्यांची वृत्ती. न्यायालयान कायद्यान घालून दिल्ले मर्यादे भायर रातीं 10 ते सकाळीं 6 मेरेन आवाज करपाक मनाय आसा. पूण कितलो आवाज तें थारावप कोणे? बरें कागाळ करपाक गेलो जाल्यार पुलीस आयकतले हाची खात्री कितें? आयोजक तरी पुलिसांचें खंय आयकतात?….. आनी ही सगली गजाल त्या आवाज करप्याच्या कानार पडली जाल्यार? ही भिरांत सामान्य मनशाक आसता. पार्टी आयोजीत करप्याची राखण करपाक बावंन्सर आसतात, ते तिडकल्यार कागाळ करपी खंय ‘बावन्स’ जायत हें ताचें ताकाच कळचेंना.
दर्यादेगांचेर ‘आवाजी पार्ट्यां’ चें प्रमाण खूबच वाडलां. आदल्या तेंपार शेनवार- आयतार वा डिसेंबरांत त्यो जाताल्यो. मात आतां सणा- परबांक, राष्ट्रीय सुटयांक पार्ट्यो जातात. कांय हाय- फाय क्लब पसून आतां ओल्यो पार्ट्यो करतात खंय? गोंयांत पर्यटक येतात, ते मजा करपाक. म्हणटकच पार्टी तो बनती है…. पूण ती करतना हुयेली मारपाकूच जाय अशें ना. कोणाक त्रास जायना अशें संगीत लावन रातभरूच न्हय, तर सेगीत दोन दीस पसून नाचल्यार कोण हरकत घेवचो ना. किळच्यो मारपी संगीत जायच जाल्यार इयरफोन वापरचे. आयज आमचें तंत्रज्ञान तितलें आधुनीक जालां. मुंबय नवरात्रां वेळार इयरफोनांतल्या एकाच वेळार सगल्यांक एकूच पद आयकूंक येतलें, असो प्रयोग जाल्लो. मात लोकांकूच जर बोवाळ जाय, जाल्यार तंत्रज्ञान तरी कितें करतलें? नाचप्यांक तें पसंत पडूंक ना. गोंयांत आतां 11 मेरेन लोक जागे आसतात, ताचे उपरांत तरी आवाजाचेर मर्यादा जाय. दुयेंती, ल्हान भुरगीं, जाण्टे, मोनजात हांकां सगल्यांक आवाजाचो त्रास जाता. मुखेल गजाल म्हणल्यार भलायकेचेर ताचो परिणाम जाता.
दर्यादेग वाठार पट्ट्यांत रातभर संगीत वाजोवंक दिवचें असो एक विचार सरकार करता. म्हणल्यार गोंयांत मनोरंजन विभाग करपाचो आनी थंय रातभर संगीत वाजोवपाक दिवचें. हेर कडेन मात 10 उपरांत व्हडलो आवाज करपाक कायद्यान बंदी. हाचेर आतां केंद्र सरकार निर्णय घेतलें. गोंय हें पर्यटन राज्य म्हणटकच दर्यादेगांचेर खंयच्याय खिणाक रातभर संगीत वाजोवपाक परवानगी मेळपाक शकता. तशें जाल्यार मात आवाज प्रदुशणा आड कोणाक आवाज काडपाक मेळचो ना.
रातच्या वेळार आवाज येतकच नेमकें कितें जाता, तें पेडणेंचे लोक बरे तरेन सांगपाक शकतले. कारण जांकां भोगता, तांकां कळटा. रातच्या थंड वेळार 7- 8 किलोमिटर पयस मेरेन आवाज स्पश्ट आयकूंक येता. मागीर 200 मिटरांचेर रावपी मनशांचें कितें जाता आसतलें? हो आवाज प्रदुशणाचो विशय तसो सामको पोरणों. कितलींशीच वर्सां लोक ताचे आड निवेदनां सादर करीत आसात. आंदोलनां पसून जालीं, मात व्हडलोसो फरक पडूंक ना. म्हणटकच हो हाचे मुखार तो जिविताचो वेगळांव नजं असो वांटो जावंक शकता. कारण संगीत आनी ताच्या वांगडा ‘खाओ, पिओ, मजा करो’ ना जाल्यार पर्यटनाचेर परिणाम जांव येता, हो भंय पार्टीवाले उक्तायतात आनी तांकां परवानगी दिवप्यांक मागीर मारतें घेवचें पडटा. पूण तें कितेंय जालें, तरी मनीसपणाचे नदरेन ह्या आवाज प्रदुशणाचेर कितें तरी मार्ग काडपाक जायच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
