भांगरभूंय | प्रतिनिधी
सामान्य नागरीक कांय करपाक शकना. विटून कोण जाब विचारपाक गेलोच जाल्यार मार खावन येवपाची भिरांत.
पर्यटन राज्य म्हणटकच हांगा देश- विदेशांतल्यान लाखांनी पर्यटक येतात. गोंयचें सैम (उरलां तें) पळोवपाक, नुस्तें खावपाक, सोरो, घुंवळे वखदां घेवपाक, मसाज बी करपाक. देवळां, चर्ची, दर्यावेळो, दर्या पळोवपाकूय लोक येतात. जात्रा, काले, दिवजां, फेस्तांकूय भायर स्थायीक जाल्ले मूळ गोंयकार गोंयां पावतात. आतां कसलीय परब म्हणली काय आवाज हो आयलोच आनी तो करपांत गोंयकार फाटीं नात. हांगा कसल्याय कारणाक लागून सावंडबाॅक्सां, फुनेलां लायतात. मागीर काळा- वेळाचो विसर पडटा. लोकांक त्रास जातलो, हाचेंय सुयेर- सुतक कोणाक लागना. खरें म्हणल्यार शांतिकाय हीच खरी उदरगत. शांत वातावरण ही निरोगी समाजाची वळख. सैमाक शांतताय आवडटा, देखून आमीय ती जपपाक जाय. गोंयांत आयज पर्यटन मोसमाचो थारावीक काळ उरूंक ना, आतां वर्साचे बाराय म्हयने, चोवीस वरां हांगा पर्यटक. उटंगाराच्या पावसाच्या दिसांनी पसून. हरकत ना. मात तांचें मनोरंजन करपाक गोंयकारांक दाव्याक बांदून आवाजाचें प्रदुशण करपाकूच जाय, अशें ना.
राज्यांत जावपी आवाजाचें प्रदुशण मतींत घेवन कानाचे पड्डे फोडपी संगीत, आवाज, बोवाळा आड नागरिकांक कागाळ करपाक मेळटली. प्रदुशण नियंत्रण मंडळान ते खातीर 89564 87938 हो नंबरूय दिला. लग्नांचे संगीत रातच्या 10 क बंद करचें पडटलें. हे कायदे देशभरांत लागू आसात, अशें मंडळाचे अध्यक्ष लेविन्सन मार्टीन हांणी सांगलें. मात, हाची खर अंमलबजावणी जावंक नाका? पोरूं बार्देसांतल्या कांय जागृत ज्येश्ठ नागरिकांनी आंदोलन केल्लें. एका रिसोर्टाचेर मोर्चोय व्हेल्लो. कांय राजकी पक्षाचे फुडारी थंय आयिल्ले. मात पुलिसांक भितर वचून तो आवाज बंद करपाक जमलें ना. उपरांत रागरंग पळोवन रिसोर्ट वेवस्थापकानूच आवाज बंद केलो. लायटी पालयल्यो. हो सगलो प्रकार सोशल मिडियाचेर लायव्ह चलतालो. हाचे वयल्यान सरकारी यंत्रणा आवाजाचें प्रदुशण करप्यांक सामील आसा, हें लोक उलयतात तें खरें दिसपाक लागता. आतांय प्रदुशण मंडळान कागाळ करपाक नंबर दिला. पूण ताचे परस ते पुलिसांचे, दंडाधिकाऱ्यांचे मजतीन घोळटो पंगड कित्याक सुरू करिनात? 2- 3 जिपी घेवन रातचे 12 उपरांत भोंवपाचे आनी आवाजाचें, हवेचें प्रदुशण करप्यांक शिटकावणी दिवपाची, नोटीस काडपाची. कांय दिसांनी थंय परत धाड घालपाची. हे फावट दोशी सांपडल्यार सरळ स म्हयन्यां खातीर रिसोर्ट, क्लब बंद! ही काळाची गरज. अर्थांत दोनूय वटेन ‘येणावळ’ बुडटली! सामान्य नागरीक कांय करपाक शकना. विटून कोण जाब विचारपाक गेलोच जाल्यार मार खावन येवपाची भिरांत. कारण आयज राज्यांत बावन्सराची समांतर पुलीस यंत्रणा चलता. न्यायालयाचो आवाज प्रदुशणा आड आदेशूच आसा. रातीं 10 ते सकाळीं 6 मेरेन आवाज करपाक मेळना. सणा- परबांच्या दिसांनी 12 मेरेन सूट दितात. हो नेम सगले पाळटाच अशें ना. नाजाल्यार दिवाळेची आदली रात, नव्या वर्साची रात अणभवची. गोंयचो आवाज म्हणल्यार कितें तें कळटलें!
स्वराज्य संस्थांनीय आवाजाच्या प्रदुशणाचेर कान दवरपाक जाय. कार्यावळी, पार्ट्यांक परवानगी दितना तांकां आवाजाच्या बंधना विशीं सांगूंक जाय. आवाज उणो करपाक सावंड प्रुफींग, नायट शिल्डींग, सावंड इन्स्युलेशन अशे विवीध उपाय घेवपाक जाय. आवाज वाडल्यार नागरीक कागाळ करतलेच, पूण तांचें नांव गुपीत दवरून सरकारी यंत्रणांक कारवाय करची पडटली. आवाजाक लागून मनशांकूच न्हय, तर सुकण्यां- सावदांक त्रास जातात. दर्यावेळांचेर येवपी कांसयांचे जिणेचेरूय परिणाम जाता, हाचोय विचार वेवसायिकांनी करपाक जाय. इयरबड वा हेर अत्याधुनीक यंत्रणां वापरून हो आवाज फक्त पर्यटकां पुरतोच मर्यादीत उरतलो हाची जतनाय घेवपाक मेळना?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
