भांगरभूंय | प्रतिनिधी
कायद्यान निर्बंध, पूण अंमलबजवणी ना; रान अधिकाऱ्यांची पेडणें पुलिशेंत कागाळ
भांगरभूंय । प्रतिनिधी
पेडणें: मोरजी आश्वें मांद्रें ह्या दर्यादेग वाठारांत कांसय संवर्धन मोहीम हातांत घेतल्या. ह्या वाठारांत रातीर- मध्यानरातीर व्हड आवाजान संगीत चालू आसता. ताचो परिणाम कांसयांक आनी तांच्या तांतयांचेर जाता हें रान अधिकाऱ्यांच्या लक्षांत आयले उपरांत मोरजी विभागीय रान अधिकाऱ्यांनी पेडणें पुलिशेंत कागाळ केल्या.
आश्व्यां परतून परतून आवाजाचें प्रदुशण जाता. तशेंच मोरजी, मांद्रें, हरमल ह्या वाठारांतूय कान फुट्टा अशा आवाजांतल्या संगिताचो कांसयांचेर परिणाम जाता, अशें कागाळेंत म्हणलां. 26 फेब्रुवारीक ही कागाळ दाखल केल्या.
उच्च न्यायालयाच्या आदेशा प्रमाण रातच्या 10 परांत कसलेच तरेचें संगीत मेकळे सुवातेचेर लावपाक निर्बंध घातल्यात. जर हो प्रकार असोच चालू उरलो जाल्यार ताची जापसालदारकी त्या त्या वाठारांतल्या पुलीस आनी उपजिल्होधिकाऱ्याचेर आसतलो आनी त्या अधिकाऱ्याचेर कारवाय करपाचे संकेत उच्च न्यायालयान दिल्ले. पूण ताची अंमलबजावणी आयज मेरेन जावंक ना. फाटल्या तीन म्हयन्यां सावन सेगीत तीन दीस आश्वें मांद्रेंच्या एका क्लबांत रातच्या 10 उपरांत सुरू जाल्ली पार्टी फांतोडेर 6 वरां मेरेन चलता. थळाव्यांकूच ताचो खूब त्रास जाता. ते भायर मुख्य रस्त्याचेर पावला पावलाचेर येरादारीची कोयंडी करून सर्वसामान्यांचो जीव धोक्यांत घालपाचें कानूय तें रिसॉर्ट करता. येरादारी पुलीस लेगीत हे गजाली कडेन आडनदर करता, अशें थळाव्या लोकांचें म्हणणें आसा. 26 फेब्रुवारीक त्याच रिसोर्टांत रातच्या 9.30 वरांचेर संगीत चालू आसतना आवाज प्रदुशण नियंत्रण समितीचे वांगडी प्रसाद शहापूरकार हांणी स्वता थंय वचून ते पार्टी विशीं पुलिसांक म्हायती दिली, पूण पुलिसांनी कसलीच कारवाय करूंक ना.
पुलिशेंत लेखी कागाळ दितलोः प्रसाद शहापूरकार
रातीर- मध्यानरातीर व्हड प्रमाणांत आवाजाचें प्रदुशण चालू आशिल्ल्याच्यो वाडट्यो कागाळी आपले कडेन आयिल्ल्यो. आपणे स्वता 26 फेब्रुवारीक राती वेळार थंय वचून पळोवणी केली. थंय व्हड आवाजान संगीत चलतालें. हे विशीं पुलिशेक म्हायती दिली, पूण ते थंय पावलेच ना. ते उपरांत आपणे स्वता ती पार्टी बंद केली. हे पार्टी आड आपूण पेडणें पुलिशेंत लेखी कागाळ दितलों, अशें प्रसाद शहापूरकार हांणी सांगलें.
कारवाये विशीं वरिश्ठां कडेन चर्चा करतलों: रावत
आपले कडेन कागाळ आयल्या. पूण जर थंय आवाजाचें प्रदुशण जाता जाल्यार दोनूय प्रदुशण म्हामंडळांक आपोवन थंय आवाजाची तांक मिटरा वरवीं तपासून ताचो अहवाल कागाळेक जोडप गरजेचें आशिल्लें. पूण तशें कांयच करूंक नाशिल्ल्यान कारवाय करूंक ना. फुडें कशे तरेन कारवाय करची हाचेर वरिश्ठां कडेन चर्चा करतलों, अशी म्हायती पेडणें पुलीस निरिक्षक दत्ताराम रावत हांणी दिली.
कायदेशीर कारवाय करतलेः विश्वजीत राणे
मोरजी आश्वें मांद्रें दर्यादेग वाठारांत कांसय संवर्धन मोहीम चालीक लायल्या. ते मोहिमेक कोणूय आडखळ हाडली जाल्यार रान खात्या खाला जी कायदेशीर कारवाय आसा ती करतले, अशें रानमंत्री विश्वजीत राणे हांणी सांगलें. दर्यांतल्या कांसयांक सुरक्षा दिवपा खातीर कायदो आसा. ते कायद्या प्रमाणूच कांसयांक सुरक्षा दितले. आपूण कोणाचेरूय वैयक्तीक कारवाय करिना. मोरजी आश्वें हरमल ह्या दर्यादेग वाठारांत व्हड प्रमाणांत पर्यटन मोसमांत आवाजाच्या प्रदुशणाच्यो कागाळी वाडत आसात. जाल्यार दुसरे वटेन ह्या प्रदुशणांतूय अंदूं देड म्हयन्याच्या काळांत दर्यांतल्या 35 कांसयांनी हे दर्यादेगेर 2900 तांतयां घातल्यांत. मोरजी आश्वें मांद्रें दर्यादेग वाठारांत कांसयांची तांतयांक सुरक्षा दिल्या. आवाजाच्या प्रदुशणाचो त्रास त्या तांतयांकूय जाता, हाची गंभीर दखल घेतल्या, अशेंय मंत्री राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
