भांगरभूंय | प्रतिनिधी
कर्नाटकांतली स्टार्ट अप कंपनीची सीईओ अटकेंत
-म्हापशें न्यायालया कडल्यान 6दिसांची पुलीस कोठी
-मानसीक तणावा खाला भुरग्यांचो खून केल्ल्याचो दुबाव
म्हापशेंः बंगळुरूंतल्या एका अार्टिफिशियल इटेलिजन्स (एआय) कंपनीची कार्यकारी अधिकारी (सीईओ) आशिल्ले बायलेन आपल्या चार वर्सांच्या भुरग्याचो खून करपाची घपकाे दिवपी घडणूक मुखार आयल्या. ते उपरांत ती बायल त्या भुरग्यांची कूड बॅगेंत घालून गोंयांतल्यांन कर्नाटकाक व्हरताली. पूण, पुलिसांनी वाटेरूच ते बायलेक अटक केल्या. सूचना सेठ (39 वर्सां) अशें अटक केल्ल्या बायलेचें नांव. ह्या खून प्रकरणांत अातां नवीनवीं म्हायती मुखार येत आसा.
आपल्याच भुरग्याचो सिकेरी-कांदोळेंतल्या एका हॉटेलांत खून केले उपरांत तिणें स्वताची नस कापून आत्महत्या करपाचो यत्न केलो. पूण तातूंत तिका येस मेळूंक ना. सूचना शेठ हिका म्हापशें पुलिसांनी न्यायालयांत हजर केले उपरांत न्यायालयान तिका मंगळारा 6 दिसांची पुलीस कोठयेंत दवरपाचो आदेश दिला.
कळंगूट पुलिसांनी म्हायतीच्या आदारान भादंसं आनी गोंय बाल कायदो कलम 302 (खून) आनी 201 (पुरावो नश्ट करप) खाला गुन्यांव दाखल केला. प्रकरणाची चवकशी केले उपरांत हत्ये फाटलो हेत स्पश्ट जातलो, अशें उत्तर गोंय पुलीस अधिक्षक निधीन वाल्सन हांणी स्पश्ट केले.
दुबावी सूचना सेठ हिका बुधवारा दनपारां गोंयांत हाडले उपरांत तिची वैजकी तपासणी केली. ते उपरांत तिका न्यायालयांत हजर केले तेन्ना न्यायालयान तिका 6 दीस पुलीस कोठयेंत दवरपाचो आदेश म्हापशें दिला.
भुरग्याक घुस्पटून मरण
सूचना हिचे कडल्यान भुरग्याची कूड कर्नाटक पुलिसांनी ताब्यांत घेतले उपरांत कुडीचो पोस्ट मार्टेम केलो. तातूंत सूचनान उशें वा हेर वस्तूचो वापर करून भुरग्याचो घुस्पटून खून केल्ल्याचे उक्तें जाल्लें. घुस्पटिल्ल्यान भुरग्याचो चेरो आनी छाती सुजिल्ली तशेंच नाकांतल्यान रगत व्हांवताले, अशी म्हायती डॉ. कुमार नायक हाणी दिली.
भुरग्याचो बापूय आशिल्लो इंडोनेशियेंत
भुरग्याच्या मरणाची बातमी मेळ्ळे उपरांत सूचना सेठ हिचो घोव व्यंकट रमण इंडोनेशियेंल्यान बेगोबेग कर्नाटकांत आयलाे. घोव-बायले मदल्या वादाक लागुनूच भुरग्याचो जीव घेतिल्ल्याचो दुबाव आशिल्ल्यान गोंय पुलिसां वरवीं व्यंकट रमण हांचीय चवकशी जावपाची शक्यताय आसा.
न्यायालयांत सूचना हिणें सांगलें?
-म्हापशें न्यालायांतले सुनावणे वेळार सध्या ती मानसीक तणावा खाला आशिल्ल्याचो दावो सूचनाच्या वकिलांनी केलो. सूचनाक उण्यांत उणी पुलीस कोठयेंत दवरपाची मागणी करून हे विशींची गरजेची वैजकी कागदपत्रां न्यायालयांत सादर करपाची हमी तिच्या वकिलांनी न्यायालयाक दिली.
-तुमी योग्य न्यायालयांत हे विशीं न्याय मागात. हे प्रकरण सान पिरायेच्या भुरग्या कडेन संबंदीत आसा. आपूण फक्त पुलीस कोठडी कितली दिवची हे विशीं निर्देश दिवपाक शकता, अशें न्यायाधिशांनी सूचनाच्या वकिलांक सांगलें.
-न्यायाधिशांनी सूचनाक ह्या प्रकरणांत कितें सांगपाचे आसा काय, अशें विचारले उपरांत पयलीं म्हाका म्हज्या वकिलां कडेन उलोवपाचे आसा. ते उपरांतूच आपूण न्यायालयांत बाजू मांडटले, अशी जाप दिली.
सूचनाक कशी केली अटक…
– भुरग्याचो खून केले उपरांत सूचनान स्वताय आत्महत्या करपाचो यत्न केलो. पूण तातूंत ती येसस्वी जावंक ना. ते उपरांत तिणें भुरग्याची कूड बॅगेंत भरली आनी गोंयांतल्यान पळून वचपाचो यत्न केलो.
– आपणाक ताकतिकेन रस्तो मार्गान बंगळुरूंक वचपाचे आशिल्ल्याचे सांगून हॉटेल वेवस्थापाक मोटार उपलब्ध करून दिवपाक सांगलें.
-सूचनाचे विनवणे उपरांत हॉटेल वेवस्थानान तिका मोटार उपलब्ध करून दिली. मोटार चालकान पयलीं तिका 35 हजार रुपया भाडें सांगलें. पूण उपरांत उणें करून 30 हजार भाडें निश्चीत केले. ते उपरांत तिणें हॉटेल कर्मचाऱ्याक आपले सामान मोटारींत भरपाक लायले.
-हॉटेल सोडतना तिचे वांगडा तिचो भुरगो नाशिल्ल्याचे हॉटेल वेवस्थापनाच्या लक्षांत आयले. तशेंच तिचे रावपाचे कुडींत रगत मेळिल्ले. ताका लागून हॉटेल वेवस्थापनाक दुबाय आयलो. सूचनान हाताची नस कापपाचो यत्न केलो. त्या वेळार हे रगत पडिल्ल्याचो पुलिसांचो दुबाव आसा.
-भुरग्याची कूड घेवन सूचनान गोंयची शिम हुपली. पूण हॉटेलांतल्या कर्मचाऱ्यांचे सादरतायेक लागून कुडींत खून जाल्ल्याचे पुलिसां मेरेन कळ्ळे. पुलिसांनी फुडली चवकशी सुरू करून सूचना जे मोटारीन वताली, त्या मोटार चालकाक फोन केलो.
-सूचनाक हे विशीं कितें समजूचें न्हय, हे खातीर कळंगूट पुलीस निरिक्षक परेश नायक हांणी मोटार चालका कडेन कोंकणी भाशेंत संवाद सादलो आनी मोटार लागसारच्या पुलीस स्टेशनांत व्हरपाक सांगलें.
-पुलिसांचे सुचोवणे प्रमाण, चालकान मोटार चित्रदुर्गांतल्या आयमंगला पुलीस स्टेशनात व्हेली. पुलिसांनी तिका भुरग्या विशीं विचारले. पूण तांच्या प्रस्नांची ती जाप दितना गडबडली. ते खातीर पुलिसांनी तिच्या सामानाचो तपास केलो, तेन्ना मोटारींतले बॅगेंत भुरग्याची कूड मेळ्ळी.
भुरग्याचो खून करपा फाटले कारण कितें?
-सूचना सेठ मेळची पश्चिम बंगालांतली आसून तिचो घोवा केरळचो आसा. सध्या तिचो घोव जकार्ता (इंडोनेशिया) आशिल्लो.
– 2010 वर्सा दोगांयचें लग्न जाल्लें. 2019 त भुरग्याचो जल्म जालो. उपरांत तांचें मदीं वाद जालो. तातूंतल्यान 2020 वर्सां परिस्थिती हाता भायर गेल्ल्यान दोगांयनी घटस्फोटा खातीर अर्ज केलो.
-घटस्फोटा उपरांत सूचनान सगले लक्ष आपल्या अार्टिफिशियल इंटेलिजन्स स्टार्टअप कडेन दवरले. 2021 त तिका जगभरांतल्या ‘100 ब्रिलियंट’ बायलांचे वळेरेंत तिचो आस्पाव जाल्लो.
-खाजगी जिणेंतल्या अपेसा कडेन लडत रावत तिणें आपलो वेवसायीक फुडार तेंगशेर व्हेलो. ते उपरांतूय तांचे मदीं घटस्फोटाची प्रक्रिया सुरूच आशिल्ली. फाटल्या दोन वर्सां पसून ते एकामेका कडेन उलयनाशिले.
-घटस्फोटाचे प्रक्रियेंत भुरग्याची कस्टडी कोणा कडेन आसची, असो प्रस्न आशिल्लो. ताचेर तत्पुरतो उपाय म्हूण न्यायालयात दर आयतारा भुरग्याचो ताबो बापाय कडेन दिवचो, अशी घट घातिल्ली.
-भुरग्याच्या कस्टडी संदर्भांतलो निवाडो बुधवार 10 जानेवारीक बंगळुरूंतल्या कुटुंबीक न्यायालयांत जावपाचो आशिल्लो.
-भुरग्याचो ताबो आपले कडल्यान ताच्या बापाय कडेन वतलो, हेच भिरांतीन तिणें आयतारा रातीं भुरग्याचो खून केलो अासुये अशी शक्यताय पुलिसांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
