भांगरभूंय | प्रतिनिधी
म्हापशें, प्रतिनिधी : आवयनूच आपल्या पुताचो खून केल्ल्याची बातमी पातळिल्ल्यान कालच्यान गोंयकार अस्वस्थ आसात. ही काळजाक पीळ घालपी घडणूक काल सिकेरी-कांदोळेच्या एका हॉटेलांत घडली. थंय राविल्ले एके बायलेन आपल्या ४ वर्सां पिरायेच्या चल्याचो खून केलो. हॉटेलाच्या हाऊजकीपिंग डिपार्टमेंटाच्या शिटूकपणाक लागून ती उक्ताडार आयली.
सुचना सेठ अशें हे बायलेचें नांव. ती बंगळूरचे आर्टिफिशियल इंटेलिजन्स स्टार्टअप ‘माइंडफुल’ हे कंपनीची संस्थापक आनी सीइओ. २०२१ वर्सा तिका ‘१०० ब्रीलियंट वूमन इन एआय एथीक्स लिस्ट २०२१’ चो सन्मान मेळिल्लो.
कांय वर्सां पयलीं मूळ अस्तंत बंगालच्या ह्या सूचना सेठचें लग्न केरळच्या एका उद्देगपती कडेन जाल्लें. तांकां एक चलो जालो. उपरांत लग्न- करियर- व्यक्तीगत जिणेचो ताळमेळ बसना जाल्ल्यान घोव- बायले मदीं सदांच झगडीं जावंक लागलीं. ताका वाजेवन त्या दोगांयनी वेगळें जावपाचो निर्णय घेतलो. पूण तांच्या ४ वर्सां पिरायेच्या चल्याची कस्टडी कोणा कडेन वतली, होय प्रस्न आशिल्लो. ताचे वयल्यानूय घोवा- बायले मदीं परत पेटपाक लागलें.
ह्या सदच्या झगड्यांक वाजेवन दोन दीस गोंयांत शांतीकायेन सारतली अशें चिंतून सुचना आपल्या चल्याक घेवन गोंयांत आयली. गोंयांत येवन परदेसांत कामा निमतान गेल्ल्या घोवा वांगडा फोनाचेर सुचनाचें परत वाद जालो. हातूंत सुचनाचें मानसीक संतूलन इबाडलें. रागाच्या भरान सुचनान खाटीर खेळपी आपल्या पुताच्या तोंडार कुशीक आशिल्ले उशें दाबून ताचो जीव घेतलो. जेन्ना ती भानार आयली तेन्ना तिणें कुशीकच्या मेजार आशिल्ल्या बटरनायफान स्वताच्या हाताचीच शीर कापून आत्महत्त्येचो यत्न केलो. पूण सुरयेक धार नाशिल्ल्यान तिका घावो जालो. घाव्यांतल्यान सगळें रगत जमनीर पडलें. उपरांत तिणें आपली बॅग पॅक केली आनी रुमांतल्यान चेक आवट केलें. सकाळीं तिणें खासा टॅक्सी केली. तिणें हॉटेल सोडलें तेन्ना तिच्या वांगडा तिचो पूत नाशिल्लो.
हावजकिपींग विभागाचे कामगार जेन्ना रूम नितळ करपा खातीर कुडींत गेल्ले तेन्ना तांकां जमनीर रगत दिसलें. तांणी फ्रंट ऑफिसाक हे विशीं म्हायती दिली. उपरांत तांणी कळंगुटे पुलिशेंत कळयलें. पुलिसांनी येवन तपासणी केली तेन्ना कुडींत रगताचे थेंबे दिसले. रोखडीच पुलिसांनी त्या टॅक्सी चालकाची चवकशी केली तेन्ना ती खंय देंवल्या हाची म्हायती मेळ्ळी.
कळंगूट पुलिसांनी संबंदीत टॅक्सीकाराक फोन करून सुचना कडेन तिच्या चल्या विशीं विचारपाक सांगलें. तेन्ना तिणें ताका मडगांवां एके इश्टीणी कडेन दवरला अशें सांगलें. जेन्ना तिचे इश्टीणीक पुलिसांनी फोन करपाचो यत्न केलो तेन्ना तिचो फोन लागना जालो. पुलिसांक आनीक दुबाव आयलो. देखून त्या ड्रायव्हराक लागींच्या पुलीस स्टेशना कडेन गाडी व्हरपाक सांगली.
मजगतीं, चित्रदुर्ग पुलिसांक सगळी म्हायती मेळटाच तांणी सुचना सेठ हिका ताब्यांत घेतली. तिचे बॅगेंत तपासणी केली तेन्ना चार पिरायेच्या चल्याची कूड तातूंत सांपडली. उपरांत हाची म्हायती कळंगूट पुलिसांक दिली. चित्रदुर्ग पुलीस त्या चल्याचे कुडीचें पोस्टमार्टेम करतले.
सुचनाक स दीस पुलीस बंदखण
मजगतीं, खून प्रकरणांत दुबावीत सुचना शेठ हिका स दीस पुलीस बंदखणींत दवरपाचो म्हापशें न्यायालयान आदेश दिला.
दरम्यान, कागाळदार गगन सुभाष गंभीर (रा. वेस्ट पटेलनगर सेंट्रल दिल्ली) हांणी नोंद केल्ले फिर्यादी प्रमाण ’हॉटेल सोल बनयान कांदोळी’ च्या कूड नंबर ४०४ त सुचनान चेक इन केलें. आपल्या ४ पिरायेच्या पुताचो खून करून, ताची कूड बॅगेंत घालून नोव्हा टॅक्सी GA-03-AH-5253 तल्यान ती थंयच्यान पळ्ळी. ताका लागून पुराव्यांची वाट लागली. ह्या प्रकरणांत सुचना हिचे आड भा. दं. वि.संच्या कलम ३०२ , २०१ आनी हेर कलमां खाला गुन्यांव नोंद केला. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
