आवय – ऑफिसांत काय घरांत…

भांगरभूंय | प्रतिनिधी

चायल्ड स्पेशलिस्ट सांगता, त्या प्रमाणें जेन्ना भुरगें 6 म्हयन्यांचें जाता. तेन्ना आवय कडेन ताचो संबंध खूब अखंड आसता. पूण त्या वेळार भुरग्यांक आवयचो मोग मेळ्ळो ना जाल्यार त्या भुरग्यांचो मनार मोठो दुख्खी परिणाम जाता.

ह्या काळार आवयो ऑफिसांनी नोकरी करतात. तो आंकडो दिसान दीस वाडत आसा. घोवा परीं बायल ही ऑफिसांनी, फॅक्टरींनी, आदीं सुवातेर काम करता, ताका लागून घराब्याची अर्थीक परिश्थिती सुधारता, हातूंत दुबाव ना. भुरग्यांचो फुडार बरो करपाक आवयची कामांय फायद्यांक पडटात अशें जायते जाण म्हणटात. ते परीं आनीकय जायते लोक आसात. जे म्हणटात कीं आवयांनी ऑफिसांनी, फॅक्टरींनी, नोकरी करप हें सारकें न्हय. कित्याक,  भुरग्यांच्या फुडाराचेर वायट परिणाम जाता.

आदल्या काळार

आदल्या काळार सावन आवयो कसल्यो ना कसल्यो नोकरी करतात. तें विचित्र न्हय. आदल्या काळारुय आवयो तरेकवार वावर करताल्यो. आनी घोवाचे जोडयेर आपली खंय ना खंय पाकळी घालून घराब्याचे वाडीत आदार दिताली. पूण त्या काळार आवयो एका खेरीत वातावरणांत, चड करून दुसऱ्या अस्तुऱ्या बराबर, वावर करताल्यो. देखीक त्यो घरांतलें सगळें काम जशे परीं रांदप, सफाय करप, बांयचेर वचून उदक हाडप, बांयचे कुशीक घरांतल्यांचे कपडे धुंवप, जार्दीनांत वावर करप, शेतां – भाटांनी काम करप, रानांत वचून जळोव हाडप आदीं वावर करताल्यो. हो वावर दुसऱ्या अस्तुऱ्यांच्या सांगातान करप आसतालो. त्याच बराबर घरांत परामर्स करताल्यो. हो वावर करतना अस्तुऱ्यांक घरा भायर वचपाची संदी मेळटाली. दुसऱ्या सांगाताक वेळ सारून मनाक इल्लो विसव मेळटालो. हो वावर करूंक अस्तुऱ्यो घरांतल्यान भायर गेल्यो जाल्यार त्यो रोखड्योच परतून येताल्यो. भुरग्यांचेर कसलेंच दुर्लक्ष जावंक दिनासल्यो.

आयच्या काळार

पूण आयच्या काळार वातावरण सामकें बदल्लां. प्रत्येक घरांत आयज सगळें आसा जशे परीं कुजनांत वापरपाचीं सगळीं यंत्रां आसात. त्या भायर उदक हाडूंक बांयचेर वचपाची गरजूच ना. कित्याक, आतां पायपांतल्यान उदक येता. जळोव हाडूंक रानांत वचपाक पडना. कित्याक आमच्या कुजनांनी गॅस, रांदपाची मशिनां आसात. कपडे धुंवपाक बांयचेर वचपाक नाका. कित्याक, वॉशिंग मशीन आसा. इतलेंच न्हय पूण बश्यो धुंवपाक आनी आयेण वांटपाक पर्यांन इलेक्ट्रिक मशिनां आसात. आधुनीक काळांतल्या टॅक्नलाॅजिकल डिवेलप्मेन्टाक लागून घरदार चलोवपाक जीं यंत्रां जाय, तीं सगळीं आमच्या घरांनी आसात… आनी हाचो वायट परिणाम आयच्या अस्तुऱ्यांचेर जाता तें आमी विसरतांव.

एकसुरेंपण

व्हडांतलो व्हड वायट परिणाम म्हणल्यार एकसुरेंपण. घोव सकाळीं फुडें आपले नोकरेक वता. भुरगीं शाळेंत वता. युनीट फामिलींचो आंकडो वाडिल्ल्या कारणान घोव आनी भुरगीं घरांतलीं भायर सरून गेलीं म्हणटकच बायल घरांत एकलीच उरता. बायलेक घरा भायर संदी मेळना. कित्याक? घर चलोवपाक वस्तू जाय, जीं यंत्रां जाय तीं सगळीं घरांत आसा. बायल ह्यो यंत्रांच्या आदारान घरांतलें सगळें काम करता, पूण तिका घरा भायर सरपाक संदी मेळना. आदल्या अस्तुऱ्या परीं तिका बांयचेर उदक हाडूंक वतना, कपडे धुतना, रानांत जळोव हाडूंक वतना वा शेतां- भाटांनी वावर करतना दुसऱ्या अस्तुऱ्यांचो सांगात मेळटालो तो आतां बिल्कुल मेळना. त्या खातीर घरांतूच  रावतना तिका वाज येता. एकसुरेंपणांत ती बेजार  जाता आनी दुडू जाय जाल्यार तिका घोवाचेर पातयेवन रावचें पडटा. दिसान दीस म्हारगाय वाडत आसा. ताका लागून बायलेन घोवाचे जोडींत भर घालप, ह्या काळार फायद्याचें अशें दिसता. ह्याच खातीर आयच्यो बायलो नोकरी करपाक फुडें सरतात. जेरूल घोवा परीं बायलेन नोकरी केल्यार घराब्याचीं अर्थीक परिस्थिती सुदारता, बायलेचें एकसुरेंपण ना नपयत जाता. तिका मानसीक धाडसपण मेळटा. पूण भुरग्यांचेर फुडाराचेर कसलो परिणाम जाता काय?

वायट परिणाम

जेन्ना आवय आनी बापूय दोगांय नोकरी करतात, तेन्ना घरांत भुरग्यांचो सांबाळ करूंक कोणाक पूण परक्या मनशाक दवरचें पडटाच. चायल्ड स्पेशलिस्ट सांगतात त्या प्रमाण, जेन्ना भुरगें 6 म्हयन्याचें जाता तेन्ना आवय कडेन ताचो संबंध खूब अखंड आसता. पूण त्या वेळार भुरग्यांक आवयचो मोग मेळ्ळो ना. जाल्यार त्या भुरग्यांच्या मनार मोठो परिणाम जाता. जाणकारांचेर अशें मत आसा, कीं भुरग्यांक जो आवय- बापायचो मोग जाय आसता. तो दुसऱ्यांनी कसोच दिवंक जायना. हाकाच लागून जायते फावट भुरगीं अनेक तरांनी प्रभावीत जाता. तांच्या जिविताचेर वायट परिणाम घडून येता.

आयची गरज

पूण आयच्या काळावेल्यो गरजो पळयल्यो जाल्यार, आयचे वाडचे म्हारगायेचो नियाळ केलो जाल्यार आनी भुरग्यांचें शिक्षण फावो तशें करपाचो विचार केलो जाल्यार, घोवाच्या पागामेंतान घराब्याची फावो तशी देखभाल जावंक कठीण जाता. त्या खातीर बायलेन नोकरी करप एके भशेन सक्तीचें जालां. अशें आसा जाल्यार आवयांनी नोकरी करची वा ना करची हो प्रस्न आमी आवयांचेर सोडूंक जाय. कित्याक, आपल्या भुरग्यांक कितें बरें आनी कितें वायट ताची सगल्या परस अदीक म्हायती आवयांक आसा. आयच्या अस्तुऱ्यांक दादल्या परीं एकसारकेपणान जियेवंक जाय.

तिका अर्थीक स्वतंत्राय  जाय आनी  आनी मनाचें धाडसपण जाय.  हें तिका कशें मेळूं येता. ऑफिसांत नोकरी करून वा घरांतलीं कामां करून हाचेर तितलेच निर्णय घेवंक जाय. घरांतलीं कामां करून पर्यांन  जर आवय आपल्या भुरग्यांक फावो तो वेळ दिवंक पावलीं ना जाल्यार, भुरग्यांचेर फुडार सुखी जावचोना आनी ऑफिसान वावर करून आवयो आपलो चडान चड  मेकळो वेळ भुरग्यांक दिलो जाल्यार भुरग्यांचो फुडार धाडशी जावं. त्या खातीर आवय ऑफिसांत आसची वा घरांत आसची हाचेर आवयच निर्णय घेतल्यार बेस बरें जातलें…

लिप्यांतरः विशाल सिनाय खांडेपारकार, 8080622370

तोमाझिन कार्दोज

9822170102