भांगरभूंय | प्रतिनिधी
5 जून हो पर्यावरण दीस म्हण पुराय विश्वांत मनयतात. सगळ्यात पयलीं 5 जून 1973 हो दीस मनयलो. आयच्या पर्यावरण दिसा निमतान विशेश.
माता भूमि: पुत्रोsहं पृथिव्या:|
भूंय आमची आवय आनी आमी सगलीं तिचीं भुरगीं. देखुनच भारतीय संस्कृतायेंत पर्यावरणाक मनशा परस चड म्हत्व दिलां. भुंयेन मनीस, जनावरां, सवणीं सगळ्यांक भरभरून दिलां. मनशाच्यो तीन मुळाव्यो गरजो अन्न, कपडे आनी आसरो सहजतायेन दिला. आमचें जिवित तिचे मायेन फुल्लां. अशें आसतना लेगीत आमीं तिचेर खुब अत्याचार करतां. आयज आमी तिचेर व्हड अरिश्टां हाडल्यांत. प्रदुशण, रानां तोडप, काँक्रिटाचें रान उबारप, रसायनिक उदक वा प्लास्टीक जळां- मळां उडोवप, आपली मनमानी करप अशीं जायती कामां अतिप्रमाणात आपसुवार्था खातीर करप मनश्यान आपणायलां. मनीस सुखी- समाधानी आसा तो आपले आवयभुंयेंक लागून. तिका राग आयल्यार, ती कोपल्यार दुर्गा रुप धारण करपाक कळाव लागचो ना.
आशिल्ल्याचें नाशिल्लें करपाक भुंयेंक कितलोसो वेळ लागत? भुंयकांप, ज्वालामुखी, हुंवार, वादळ मनशाक रडयता, संवसारांतल्यान उठयता हें मतींत धरून उदरगतीचीं सान पावलां पर्यावरण साबांळून मारपाक जाय. आयज ग्लोबल वॉर्मिग, ताचे परिणाम, उपाय योजना, खबरदारी हांचेर परिसंवाद खुब जातात, पुण प्रश्न वाडतच आसात न्ही?
सरकारी कार्यालयां भायर लेगीत घे कोयराच्यो पडून आशिल्ल्यो राशीं, रस्त्या कुशीक कोयर, घाणी आसुनय सरकारी मळार लेगीत पर्यावरणां विशीं बेसबरीं भाषणां दितात. खरें म्हळ्यार दर एक दीस पर्यावरण रक्षणाचोच आसपाक जाय. पर्यावरण दीस वर्सुकी वाडदीस कसो व्हडा उमेदीन एकच दीस मनयनासतना सदांच भुंयेंचे उपकार फेडून तिची जपणूक करपाची जापसालदारकी पार पाडपाक जाय. अशें केल्यारूच वर्तमानांतलीच न्हय तर भविष्यांतली पिळगीं आनी आमची भुंय माता सुखी समृद्ध जातली.
आयच्या पर्यावरण दिसा निमतान मना -काळजासावन पर्यावरण जतनाचो सोपुत घेवन प्रामाणिक यत्न करून मायामोगाची आवयभूंय फुडले पिळगे खातीर राखून दवरूया.
तेजस्वी अनिल कामत
ग्रंथपाल
श्री सरस्वती वाचनालय, थिवी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
