आवयभाशेंतल्यान शिक्षण ही काळाची गरज

भांगरभूंय | प्रतिनिधी

दरेक मनशाच्या जिवितांत माय, माती, आवयभास आनी आवयभूंय हांकां खाशेलें म्हत्व आसा. माय जल्म दिता, माती पोशण दिता, आवयभूंय आलाशिरो, सुरक्षीतताय दिता आनी आवयभास योग्य संस्कार.

आमी जायतीं वर्सां शिक्षणाची भास खंयची आसूंक जाय, हाचेर विचार करीत आयल्यात. हे विशीं फकत समाजांतच
न्हय तर घरांतय चर्चा चालू आसा. आवय- बापूय, सोयरे, शेजारी हांचे मदीं ह्या विशयाचेर मतभेद आसात, मतभेद कसले वाद विवादूच म्हणल्यार जाता.
शिक्षणांत खंयचें माध्यम वापरचें हाचेर तर्कशास्त्र वापरूंक नाशिल्ल्यान मध्यमवर्ग आनी तांचे सकयल्या वर्गाचो गोंदळ जालो. खास करून इंग्लीश माध्यमांतल्यो शाळा वाडपाक लागल्यो, तेन्ना हो गोंदळ वाडूंक लागलो. इंग्लीश शाळांच्या ग्लॅमराक भुलून सामान्य लोकांनी लेगीत आपल्या भुरग्यांची इंग्लीश शाळांनी नांव नोंदणी करपाक सुरवात केली. पयलीं शारां पुरतें आशिल्लें हें फॅड आतां गांवगिऱ्या वाठारांनीय पातळ्ळां. गांवांनी तशेंच शारांतले गरीब, कश्ट करपी पालक रीण घेवन आनी लाखांनी रुपया देणगी दिवन आपल्या भुरग्यांची इंग्लीश माध्यमांतल्या शाळांनी नांव नोंदणी करतात. मुळांतूच इंग्लीश शिकप आनी इंग्लीश शिक्षणाचें माध्यम म्हणून वेंचून काडप हाचो पालकां मदीं गोंदळ जाता. खरेंच इंग्लीश शिकपा खातीर इंग्लीश माध्यम निवडप गरजेचें? इंग्लीश शिकपाक पुराय शिक्षण इंग्लीशींत घेवप योग्य? आवय- बापूय हाचो विचार करिनात. आवयभाशेंतल्यान शिकून लेगीत बरी इंग्लीश शिकूं येता हें पालक विसरपाक लागल्यात.
आवयभाशेंतल्यान शिक्षण हीच शिकपाची सैमीक पद्दत. आवयभास ही खऱ्या अर्थान गिन्यानाची भास. भुरगें आवयच्या पोटांत आसतना सावन ती भास आयकता. आवयभाशेंतलें शिक्षण भुरग्याची मानसीक वाड परिपूर्ण करता. कारण भुरगो ज्या वातावरणाचो भाग आसा ताचें प्रतिबिंब ताका आवयभाशेंत दिसता. ताकाच लागून आवयभाशेंतल्यान शिक्षण ही शिकपाची आदर्श पद्दत.
सांस्कृतीक आनी समाजीक मुल्यां फकत आवयभाशेंतल्यानच रुजोवंक मेळटात. दरेक मनशाच्या जिवितांत माय, माती, आवयभास आनी आवयभूंय हांकां खाशेलें म्हत्व आसा. माय जल्म दिता, माती पोशण दिता, आवयभूंय आलाशिरो, सुरक्षीतताय दिता आनी आवयभास योग्य संस्कार. तांच्या आदाराचेरूच दरेका मनशाचें जिवीत सुखी आनी समृद्ध जाता. ताकाच लागून जायते भाशाशास्त्रज्ञ, समाजशास्त्रज्ञ, मानसशास्त्रज्ञ तशेंच समाजीक, शिक्षणीक मळार वावुरपी राश्ट्रीय, जागतीक संघटना मुळाव्या आनी माध्यमीक पांवड्यार तरी शिक्षणाचें माध्यम आवयभास आसूंक जाय अशें आड्डून सांगीत आसात.
सुरवेक आवयभाशेंत मुळावें शिक्षण घेतकच, मागीर गरजे प्रमाण इंग्लीश वा हेर परकी भास केळोवपाक, परिस्थिती प्रमाण वापरपाक कोणाकूच हरकत आसपाचें कारण ना. शिक्षण अशे तरेन दिवचें की ताका आपूण रावता त्या प्रदेशाच्या वातावरणाची जाणविकाय आसतली, ताका राश्ट्रीय निश्ठा, देशभक्ती आनी राश्ट्रीय जापसालदारकेची जाणविकाय आसतली आनी देशांत आशिल्ल्यो समस्या आनी आव्हानां वळखून तो तांकां तोंड दिवपाक सशक्त जातलो.
युनेस्को ही युएनओची शिक्षणीक उपसंस्था. युनेस्कोन केल्ल्या संशोधनांतल्यान, आवयभाशेंतल्यान शिक्षण घेतिल्ल्या विद्यार्थ्यांची समजूत आनी दर्जो बिगर आवयभाशेच्या माध्यमांतल्यान शिक्षण घेतिल्ल्या विद्यार्थ्यां परस खूब बरो आसता, अशें दिसून आयलां. आवयभास हें शिक्षणाचें योग्य माध्यम अशें महात्मा गांधीन म्हणलां. फकत आवयभाशेंतल्यान भुरग्यांची भावनीक आनी समाजीक उदरगत जावंक शकता. सांस्कृतीक आनी समाजीक मुल्यां फकत आवयभाशेंतल्यान पेरूंक मेळटात. वरिश्ठ शास्त्रज्ञ डॉ. अनिल काकोडकार म्हणटात, मायभासूच भुरग्यांचें सभावीक शिक्षणाचें माध्यम आसा. तेच भाशेंतल्यान ताचो सर्वांगी विकास जावपाक शकता.
इंग्लीश माध्यमाचो विचार करता तेन्ना इंग्लीश ही आंतरराश्ट्रीय भास. इंग्लीश माध्यमांतल्यान शिकपी भुरग्यांक सगळ्या मळार संद मेळटली अशें मानून पालक आपल्या भुरग्यांक इंग्लीश शाळांनी धाडटात हें मान्य आसलें तरी इंग्लीश शाळांनी शिकपी सगळ्याच भुरग्यांक यश मेळना. उरफाटें आयज उंचेल्या पदांचेर पाविल्ले दोतोर आसूं, अभियंते, वकील, शिक्षक, प्राध्यापक, लेखक, शास्त्रज्ञ, उद्देजक, फुडारी, नट आसूं सगळेच माय भाशेंतल्यान शिकिल्ले आसात. देशांतल्या आयएएस, आयपीएस, आयएफएस हांची वळेरी पळयल्यार 95 टक्के अधिकारी आवयभाशेंतल्यान शिकल्यात. फाटल्या कांय वर्सांत स्पर्धात्मक परिक्षेंत यश मेळिल्ल्या विद्यार्थ्यां मदीं सगळ्यांत चड आवयभाशेंतल्यान शिकपी विद्यार्थी आसात.
इंग्लंड, अमेरिकेंत, फ्रांस, जर्मनी, चीन, जपान, रशिया ह्या प्रगत देशांनी लेगीत फकत आवयभाशेंतल्यान शिक्षण दितात. ह्या देशांतले पालक जाणीवपूर्वक हें काम करतात. फिनलॅंड सारको देश, ज्या देशाची शिक्षण पद्दत विकसीत देशांनी चालीक लायल्या, तोय देश आवयभाशेंतल्यान शिकयता. भुरग्यांक इंग्लीशीचो डोस दिलो जाल्यार प्रादेशीक भाशांचें गिरेस्त दायज ना जातलें. भुरग्यां मदीं आवयभासूच राश्ट्रीय अभिमान, राश्ट्रीय एकचार, बरे शिश्टाचार रुजपाक आदार करतली. शिक्षणांत आवयभाशेक लागून व्यक्तीमत्वाची सर्वांगीण उदरगत शक्य जाता. आवयभास हो संस्कृताय आनी परंपरेचो केंद्रबिंदू. भुरगें जशें सहजपणान आवयभाशेंतल्यान शिकता तशें इंग्लिशींतल्यान शिकना म्हणून आवयभाशेंतल्यान शिक्षण हें खरेंच शिक्षण.

श्याम ठाणेदार
9922546295