भांगरभूंय | प्रतिनिधी
वसय (मुंबय), खबरां संस्था ः अनाथ आश्रमांतल्या 8 वर्सां पिरायेच्या भुरग्यान बांयंत उडकी मारुन आत्महत्या केल्ल्याची धक्को दिवपी घडणूक उजवाडाक आयल्या. ती भायंदराच्या उत्तन वाठारांतल्या अनाथ आश्रमात घडल्या.
मजगतीं, हे घडणुके विशीं मेळिल्ले म्हायती प्रमाण, उत्तन वाठारांत केयरींग हँड्स सेवा कुटीर नांवाची संस्था आसा. ती अनाथ भुरग्यांक पोसपाचे आनी तांची जतनाय घेवपाचें काम करता. ही संस्था देड वर्सां आदीं सुरू जाल्ली आनी हे संस्थेंत 21 अनाथ भुरगीं आसात.
सुमार ३ म्हयन्यां आदीं नालासोपारा रावपी एके बायलेन आपलो पूत अरमान अब्दुल सय्यद (८) हाका हे संस्थेंत घालो आनी तिने दुसरें लग्न केलें.
फाटल्या म्हयन्यांत ताची आवय ताका मेळपाक आयली तेन्ना तो आवयक सांगतालो की ‘म्हाका व्हर, म्हाका हांगा रावपाचे ना’. पूण दुसरें लग्न करुन ती नालासोपाराक रावताली म्हणून तिणें भुरग्याक वांगडा दवरपाक न्हयकार दिलो. हाका लागून अरमान खूब दुख्खी आनी निराश जालो. अरमान हो तिचो पयल्या घोवाचो पूत.
सोमारा रातीं सगळी भुरगीं न्हिदले उपरांत लागसारच्या बांयंत उडी मारून अरमानान आपलें जिवीत सोंपयलें. मंगळारा सकाळीं अरमानाची कूड बांयंत मेळ्ळी. पोस्टमार्टम अहवालांत अरमानाक बुडून मरण आयिल्ल्याचें स्पश्ट जालां.
अरमानाक घराची याद येताली, ताका घरां वचपाचें आशिल्लें. देखून तो आवयक आपणाक घरा व्हर अशें ती येता तेन्ना सांगतालो. पूण ताचे आवयन ताका व्हरूंक ना. ताका आवयचें हें वागणे आंवडूक ना आनी ताका लागून ताणें आत्महत्या केली अशें उत्तन सागरी पुलीस स्टेशनाचे उपनिरिक्षक लक्ष्मण बदादे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
