भांगरभूंय | प्रतिनिधी
हरिद्वार, खबरां संस्था ः अंधश्रद्धा सोंपोवपाचे कितलेय यत्न जाले तरी अजूनय जायत्या प्रकारचे अंधश्रद्धेचेर कांय लोकांचो खूब विस्वास आसा. अशेच एके अंधश्रद्धेक लागून एके आवयन आपल्या पुताक बरोच वेळ गंगे न्हंयेंत बुडोवन दवरलो. अशें केल्ल्यार पुताचें दुयेंस बरें जातलें अशें ताच्या आवय-बापायक दिसलें. पूण बरोच वेळ उदकांत उरिल्ल्यान ह्या भुरग्याक मरण आयलें. ही दुर्दैवी घडणूक हरिद्वारांतल्या हर की पौरी घांटाचेर घडली. हे घडणुकेचो व्हिडियो सोशल मिडियाचेर व्हायरल जाला आनी ताचेर नेटिझन्सान तिडक उक्तायल्या.
नेमकें कितें घडलें?
बुधवारा हरिद्वारातलो एक धक्को दिवपी व्हिडियो सोशल मिडियाचेर व्हायरल जावपाक लागलो. तातूंत एक बायल आपल्या भुरग्या वांगडा गंगे न्हंयेंच्या उदकांत भितर देंविल्ल्याचें दिसता. भोंवतणच्या लोकांक पयलीं ही एक सदचीच गजाल कशी दिसली. हरिद्वार हांगा लाखांनी भक्त गंगे न्हंयेंत न्हातात. पूण हे बायलेन बरोच वेळ भुरग्याक उदकांतल्यान भायर काडूंक नाशिल्ल्यान लागसारच्या लोकां मदीं बोवाळ सुरू जालो. मागीर जेन्ना कांय लेकांनी मुखार वचून विचारपाक सुरवात केली तेन्ना खरी परिस्थिती उक्ती जाली.
आपल्या पुताचें गंभीर दुयेंस बरें करपा खातीर गंगेच्या पवित्र उदकांत ताका दवरल्यार तो बरो जातलो असो ते बायलेचो विस्वास आशिल्लो. तिणें 5 वर्सां पिरायेच्या आपल्या पुताक गंगे न्हंयेंत बुडयलो. थंयच्या एका मनशान फुडाकार घेतलो आनी जोडप्यां कडेन वाद घालपाक लागलो. ताणें हट्टानूच बायलेच्या हातांतल्यान भुरग्याक काडून घेतलो आनी ताका उदकांतल्यान भायर काडलो. उरफाटें ती बायल त्या मनशा कडेन वाद घालपाक लागली. निमाणें पुलिसांक आपयले. पुलिसांनी भुरग्याक हॉस्पिटलांत दाखल केलो. पूण तेन्ना ताका मरण आयिल्ल्याचे दोतोरान सांगलें.
भुरग्याक रगताचो कॅन्सर जाल्लो…
पुलिसांच्या म्हणण्या प्रमाण, भुरग्याक रगताचो कॅन्सर आशिल्लो. तांकां गंगा न्हंयेचेर सोडपी टॅक्सी ड्रायव्हरानय प्रवासांत ते भुरग्याचे दुयेंस आनी गंगे न्हंयेंत न्हावपा विशीं चर्चा करताले अशी म्हायती दिली. गंगे न्हंयेंत येवचे पयलीं ह्या जोडप्यान भुरग्याक हॉस्पिटलांतय व्हेल्लो. पूण ताची स्थिती गंभीर आशिल्ल्याचें दोतोरान सांगलें. उपरांत ह्या जोडप्यान अंधश्रद्धेचेर विस्वास दवरलो आनी भुरग्यान गंगेंत न्हाण घेतलें जाल्यार दुयेंस बरें जातलें अशें तांकां दिसलें आनी वयलो प्रकार घडलो. हे घडणुकेक लागून वाठारांत दुख्ख पाताळलां. ह्या प्रकरणांत पुलिसांनी गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
