भांगरभूंय | प्रतिनिधी
आवयक 40 वर्सां बंदखणीची ख्यास्त, केरळ फास्ट ट्रॅक कोर्टाचो निर्णय
कोची, खबरां संस्था ः आपल्या इश्टाक सात वर्सां पिरायेचे आपलेच नेण्टे चलयेचेर बलात्कार करपाक परवानगी दिल्ल्यान एका बायलेक 40 वर्सां बंदखणीची ख्यास्त फर्मायल्या. तशेंच तिका 20 हजार रुपया दंड घाला. बायलेच्या इश्टान तिचे चलयेचेर बलात्कार केलो. मागीर लिंगीक अत्याचारूय केले. ह्या सगळ्याक आवयची संमती आशिल्ली. ह्या आरोपा वयल्यान न्यायालयान हे बायलेक ख्यास्त फर्मायल्या.
तिरुवनंतपुरमच्या फास्ट ट्रॅक न्यायालयाची न्यायाधीश आर. रेखा हांणी मार्च 2018 ते सप्टेंबर 2019 मेरेन घडिल्ल्या घडणुके संबंदी पिडेस्तीच्या आवयक 40 वर्सां बंदखणीची ख्यास्त फर्मायल्या.
न्या. रेखा हांणी सांगलें, ह्या प्रकरणांत आवयक मुखेल आरोपी म्हूण ख्यास्त फर्मायल्या. कारण बायलेच्या इश्टान खटल्या वेळार आत्महत्या केली. पिडेस्त चलयेचें भुरगेपण तिचे आवयन इबाडलें. चलयेची राखण करप ही जापसालदारकी आवयची आसता, पूण हे आवयन आपल्या इश्टाक आपल्या सात वर्सां पिरायेच्या चलयेचेर बलात्कार करपाची परवानगी दिली.
हे बायलेचो घोव मानसीक नदरेन थीर नाशिल्ल्यान ती घोवा वांगडा रावनाशिल्ली. उपरांत तिणें शिशुपालन नांवाच्या मनशा कडेन संबंद दवरलो. आनी ताणेंच हे बायलेच्या चलयेचेर बलात्कार केल्लो. 2018 ते 2019 ह्या काळांत शिशुपालनान पिडेस्त चलयेचेर जायते फावटीं बलात्कार आनी लैंगीक अत्याचार केल्लो.
पुलिसांनी दिल्ले म्हायती प्रमाण, पिडेस्त चलयेच्या 11 वर्सां पिरायेच्या सावत्र भयणीचेंय शोशण जालें. पिडेस्त चलयेक आनी तिच्या 11 वर्सां पिरायेचे भयणीक ओगी रावपाची धमकी दिली. तीं दोगांय कशीं तरी आपले आजयेच्या घरा पळून गेली आनी ही घडणूक उक्ती जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
