भांगरभूंय | प्रतिनिधी
म्हजी आवय म्हणटाली मनशाची जीण सुर्याच्या उजवाडा वरी आसूंक जाय म्हूण. सूर्य जसो पुराय दीस उर्जेन भरिल्लो आसता. तेच उर्जेन तो संवसारार हांशें फांकयता. सैमांत चैतन्य निर्माण करून सृश्टीत सुंदरतायेची भर घालता. तशेंशें मनशांचे जिवीत आसपाक जाय. सूर्य उदेतना आनीक अस्ताक वतना लेगीत धरतरेच्या तोंडार हांशे फांकयता. ताचो सभावच तसो सैमांत सुंदरताय आनीक उर्जा पातळावपाचो. ताची देख घेवन मनशान स्वता खातीर जियेतना हेरांचोय विचार करूंक जाय आपले तांकी प्रमाण दुखेस्त, पिडेस्त, गरीब, दुबळ्यांची मजत करून आपली जापसालकी सिद्द करूंक जाय. असो कोणूय मनीस दिसत तर तिची ती उतरां म्हाका याद जाता. हांव मागीर फाटलो फुडलो विचार करिनासतना ताची मजत करूंक धांव मारतां. सादारणपणान आमी सगले मनीस स्वता तयार केल्ले फास्के भितर रावन वावुरतात. ते फास्के भायर वचपाचो यत्न कोणूच करूंक पळयनात. दरेक पालक आनीक शिक्षक भुरग्यांक ‘आवट ऑफ द बॉक्स’ विचार करात म्हूण सुचयतात. तो विचार कसो करूं येता तें विशीं तांकां कोणूच म्हायती दिवंक पळयनात. आता आधुनीक तंत्रज्ञानाक लागून खूब बरी म्हायती मेळटा हातूंत दुबाव ना. हाचो बरो लाव घेवन शिकपी भुरग्यांनी वेगळें पावल मारपाचो यत्न करचो अशें तांकां म्हाका सांगन दिसता.
खरें म्हणशात तर दरेकल्या मनशान आपले वागणुकीच्या उजवाडान सुंदर तेजस्वी समाज फुलोवचो यत्न करूंक जाय. हाचें कारण मनशाची जीण म्हणल्यार विचारांची खण कशी शी. हय, खणूच ती. आमी जितले खोलायेन विचार करूंक लागतले तितले नवे आनीक विकसीत विचार तकलेंत घोळपाक लागतले. जाचो उपेग विद्यार्थ्यांक मार्गदर्शन करूंक केरीत जाल्यार फुडाराक एक सुसंस्कृत पिळगी घडोवपाचें भाग्य आमी मेळोवंक शकतले. हें जरी सत आसलें तरी वास्तुस्थिती वेगळी आसा.
आयचे परिस्थितीचो विचार केल्यार समाजाची वागणूक नितीक धरून आसतलीच म्हणपाची शक्यताय खूब उणी जाल्ली पळोवंक मेळटली. अशा वेळार एक बरो गुरू मेळत तर समाज ह्या कठीण परिस्थितींतल्यान भायर सरूंक शकता. तो गुरू मागीर आवय बापायच्या रुपान, साधू संताच्या रुपान वा समाजसेवकाच्या रुपान आसूं येता. ताची जीण देखदिणी आसूंक जाय. हाचे पयलीं साधू संतानी फुडाकार घेवन समाजाक दिका दाखोवपाचो वावर खूब बरे तरेन केल्लो आमी पळयला. आतांय तसो वावर जायते कडेन जाल्लो पळोवंक मेळटा. अट एकूच ते ढोंगी आसूंक फावनात. तांच्यात आशिल्ले उर्जेक लागून ते हेरांक प्रेरीत करूंक शकतात. ते भायर तांचे गांठीक आशिल्ल्या अणभवांतल्यान ते मनशांचे मन वळोवंक शकतात. वायट मार्गा वेल्यान चलतल्यांक सत मार्गार हाडूंक ते वावरूंक शकतात. स्वामी विवेकानंद, संत कबीर, गुरू नानक हांचे विचार आयचे परिस्थितींत लेगीत तितलेच प्रभावी आसात जितले आदीं आशिल्ले.
केन्ना केन्ना समाजाच्या घडणुकी निमतान दुबळ्या घटकांचें सोशण जाल्लें आसता. जाका लागून मनमानी करप्यांचो आंकडो वाडूंक लागता. हाचो फटको तरणाटे पिळगेक बसता. शाळा कॉलेजींनी शिकयतात त्यो बर्यो गजाली, आवय बापूय दितात त्यो देखी आनीक समाजांत ज्यो घडणुको घडटात तांचे खंयच ताळमेळ बसना तें पळोवन तरणाट्यांचो घालमेल जावं येता. असो हो विरोधाभास तांकां पचोवंक जड जाल्ल्यान तेवूय मागीर भरकटत वचूंक लागतात. ही पाळी ह्या तरणाटे पिळगेर येवची न्हय म्हूण पालक ह्या नात्यान आमी सादूर रावंक जाय.
भुरगें स्वता विचार करूंक लागत तर कठीण परिस्थितींत लेगीत तें अचूक उपाय सोदूंक पावता. वेगळेवेगळे मार्ग तांचे मुखार उबे रावंक शकतात. आवय बापायन फक्त वेगळे तरेन विचार करात म्हणचे परस आपूण जावन तांचे बराबर बसून चिंतनमनन करीत जाल्यार तांच्या विचारांचें चक्र आपसूक घुंवपाक लागतलें.
आमचे पैकीं कितले लोक समाजा खातीर वावुरतात आसतले काय ? वेळ आसा व्हय कोणाक? वेगळो विचार करूंक वेळ जाय पडटा. सतत विचारांचें चक्र चालू दवरचें पडटा. कारण नवे तरेन विचार करतले जाल्यार जे परिस्थितीक तोंड दिवचें आसता ते परिस्थितिचो खोलायेन अभ्यास करून आपले विचार मांडचे आसता. पोरणे पद्दतीन उपाय सोदचे परस एक वेगळे नदरेंतल्यान ते परिस्थितीची फोडणी केले उपरांतूच नवे पद्दतीन ताचेर उपाय काडूंक शकतले.
आमी जेन्ना वेगळो विचार करून वावर करपाक सोदतात तेन्ना खंयचेय परिस्थितींत आपूण त्यो शिमो पार करून मुखार वतलोच ही जिद्द दवरून मुखार वचूंक जाय. कोण कितें म्हणटलो हो प्रस्न जाका म्हत्वाचो दिसता तो वेगळो विचार करूंक पावना. म्हणटकच दोळे उक्ते आनी कान बंद दवरून वावरत तर वयल्या पांवड्यार पावप सोंपें जातलें. वयर म्हणिल्ल्या प्रमाण आमची जीण एके तरेचे फास्केंत बंद आसा. ते फास्केंतल्यान भायर सरून नवी जीण जगपाचो यत्न करचो पडटलो तेन्नाच आमचे जिणेंत बदल घडून येतलो. अशे विचार मनांत रोखडे घोळनात कारण आमी मनीस तशे तरेचे विचार करपाचें म्हत्व समजून घेवंक फाटीं पडटात. एकदां फास्की सोडून विचार करूंक लागत तर नव्यो नव्यो पद्दती दोळ्या मुखार घुंवूंक लागतल्यो इतलें मात खरें. फास्केंत रावन जीण जगप जरी सोंपें तरी तातूंत तेंच तेंचपण आसता. नवें कांय आसना नवें कितेंय अणभवचें आसत तर वेगळो विचार करचोच पडटलो. हाची देख आमी भुरग्यांक दिवची पडटली.
वेगळो विचार करप म्हणल्यार आव्हानां पेलप गरजेचें जावन पडटलें. शिकपी भुरग्यांक तांची आवड मतींत दवरून दिल्ले परिस्थितींतल्यान मार्ग सोदून काडूंक लावंक जाय. अशे तरेचे प्रकल्प सोडयतना तांचे बुद्दिचो विकास तर जातलोच ताचे बरोबर एक वेगळो अणभव तांकां घेवंक मेळटलो.
एच. मनोज
9822441417
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
