आळूं खावप भलायकेक कितले फायद्याचें…?

भांगरभूंय | प्रतिनिधी

पावसांत खूबश्यो भाजयो पिकतात. ताळकिळो, कुड्डूकेची भाजी. तशेंच आळूं लेगीत ह्या हंगामात व्हड प्रमाणात पिकता. आळवा पसून वडयो वा भाजी करुं येता. आळवाच्या वडयो करपाक वेगळें आळूंं आनी भाजी करपाक वेगळें. श्रावणांत वा चवथीच्या दिसांनी आळूं हो जेवणांतलो एक मुखेल पदार्थ जावन आसा.

काळें आनी पाचवें आळूं

काळ्या पानांचें आळूं आनी पाचव्या पानांचें आळूं अशे दोन प्रकाराचें आळूं आसता. काळ्या आळवाच्या पानांनी 6.8 ग्राम आनी पाचव्या आळवाच्या पानांनी 3.9 ग्राम प्रथिन मेळटा. म्हत्वाचें म्हणल्यार आळवांतल्यांन मेळपी प्रथिन प्राणिज न्हय तर भाजीपालो आसता, जें प्राणिज प्रथिना परस भलायकेक खूब फायदेशीर आसता. काळ्या आळवांतल्यांन 460 मिलीग्राम आनी पाचव्या आळवांतल्यांन 227 मिलीग्राम कॅल्शियम मेळटा. जाल्यार 125 आनी 82 मिलीग्राम फॉस्फरस आनी 2.5 आनी 2.2 ग्राम खनिजां मेळटात.

सुकयिल्ल्या आळवांत चड प्रथिनां

आळूवाच्या पानांनी मॅग्नेशियम आनी क्लोरीन हीं खनिजां मेळटात. ताज्या पानां परस सुकयल्ल्या पानांनी चड प्रथिनां आसता तशेंच पोशणूय बरें मेळटा. आळूं वडयो सुक्या पानां पसून तयार केल्यार पोशण दुपेटी परस चड मेळटा. सुकयल्ल्या आळवाच्या पानां पसून 13.7 ग्राम प्रथिन आनी 1546 मिलीग्राम कॅल्शियम मेळटा. सुकयल्ल्या आळवाच्या पानांतलें खनिजांचें प्रमाण स पटींनी वाडून 12.6 ग्राम जाता. कुडीक फावो त्या प्रमाणांत जाय आशिल्ली खनिजां हेर खंयचेच भाजयेंत नासतात जितली ती आळवांच्या पानांनी आसतात.

काळ्या आळूं पसून 12000 यूजी आनी पाचव्या आळूं पसून 10278 यूजी जीवनसत्व अ मेळटा. जीवनसत्व बी 1 आनी बी 2 खूब उण्या प्रमाणांत मेळटात जाल्यार जीवनसत्व बी 3 1.9 आनी 1.1 एमजी इतल्या प्रमाणात मेळटा. हाचे भायर पावसाच्या दिसांनी कुडीक उर्जा आनी ती उर्जा दिवपी चरबी जाय पडटा ती चरबी 5.9 ग्राम सुक्या आळवाच्या पानां पसून मेळटा. प्राणिज चरबी कुडीक हानीकारक अशें म्हण्टात, पूण आळवांतली चरबी वनस्पत आशिल्ल्यान भलायकेक फायद्याची आसता.