भांगरभूंय | प्रतिनिधी
पुणे, खबरां संस्था: पुणे लागसारच्या देवाच्या आळंदीची फाटलीं तीन-चार वर्सां सावन ‘लग्नाचो गांव’ अशी वळख निर्माण जाल्या. हांगा लग्ना खातीर मुहूर्त पळयनात. फकत दिसाचेंच न्हय तर रातच्या वेळारूय हांगा रोखडेंच लग्न लावन दितात. देखून ह्या शाराची अर्थवेवस्था लग्नाच्या वेवसायाचेर आदारून आसा.
आळंदींत ४० हजार लो रावतात. ५५० परस चड धर्मशाळा आनी मंगल कार्यालयां आसात. हंगामांत हांगा दर दिसा १,२०० वयर लग्नां जातात आनी हेर दिसांनी २५० ते ३०० लग्नां लागतात. तातूंत पुरयत ते फोटोग्राफर ते सजावट मेरेनच्यो सगळ्यो पॅकेजी एकाच पांख्या खाला उपलब्ध जातात. देखून ही सुवात मोगान लग्न जावपी, खासा करून पळून वचपी जोडप्यांक खूब आवडटा. लग्ना उपरांत लग्न प्रमाणपत्र, लग्नाचे फोटो, प्रतिज्ञापत्रूय हांगा दितात, चलयेन खंयच्याय वेळार आपलें मत बदलचें न्हय तिचें सोपूत पत्र हांगच्यानूच दितात. इतलेंच न्हय, घरांतल्यान वा आंतरजातीय लग्नांतल्यान पळून गेल्ल्या जोडप्यांक पुलीस संरक्षण दिवपाची ‘सुविधा’ ह्या जाग्यार आसा. देखून आळंदीक उण्या खर्चाचें अधिकृत लग्नांचें केंद्र म्हणून चड नामना मेळ्ळ्या.
आळंदीत एकीकडेन संत ज्ञानेश्वर माऊलींचो गजर सुरू आसतना गल्लींतलीं मंगल कार्यालयां आनी धर्मशाळांनी मंगलाश्टकांचे आवाज येतात. शांरांत पावला पावलाचेर लग्नाच्या एजंटाचीं नांवां आसात. एकाद्रें जोडपें भायच्या गांवांतल्यान आयलें काय पुरयत, फोटोग्राफर, नोंदणी प्रमाणपत्रा पसून कार्यालया मेरेनची सगळी वेवस्था एजंट करतात. हाका लागूनच प्रेमविवाह, आंतरजातीय लग्न आनी उण्या खर्चांतल्यान लग्न करपा खातीर हांगा कायम गर्दी आसता.
लग्नांचेर ७५ टक्के अर्थवेवस्था
आळंदी शाराची ७५% अर्थवेवस्था लग्नाचेर आदारून आसा. चड करून शंबर सोयरे हाजीर आशिल्ल्या लग्नांत २५ जाणांक रोजगार मेळटा. कोरोनाच्या काळांत उण्या सोयर्यांनी लग्नांक परवानगी आशिल्ली. ह्या काळांत हांगा खुबशीं लग्ना लागलीं. कोरोना सोंपल्या उपरांत लग्नांचो आंकडो वाडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
