भांगरभूंय | प्रतिनिधी
इफेर्न म्हणल्यार संवसारांत आसतना वायट करण्यो करतल्याक मेले उपरांत ख्यास्त वा दुख्खाची सुवात फावो जाता ती स्थिती. ती देवा पासून पयस आनी खर त्रासाची परिस्थिती
क्रिस्तांव धर्म हो नाझारेथच्या जेजूच्या जिविताचेर आनी शिकवणेचेर आदारिल्लो एकेश्वरवादी धर्म. जेजू देवाचो पूत आनी सोडवणदार अशें मानतात. तोच पातकांतल्यान मोक्ष दिता, सर्गार व्हरता, ह्या भावार्थाचेर जगतना जिव्यां आनी मेल्ल्यांचें नातें बांदून दवरुंकूय कांय चाली-रिती घालून दिल्ल्यो आसात, तांतूंतली एक म्हणल्यार आल्मांचो दीस समारंभणी. हो दीस नोव्हेंबराचे पयलेर दनपारां सुरू जाता आनी दोन तारखेर दनपरां मेरेन चलता.
मनीस मरतकच ताची कूड शिमितेरींत मातयेक लायतात. शिमितेर म्हणल्यार क्रिस्ती लोकाचें सासणीक घर. क्रिस्ती भावार्थ सांगता, मेल्लो मनीस आपले झडटेक तयार जाता. ताचे झडटे उपरांत एक तर तो सर्गांत ना जाल्यार पुर्गोतोरींत ना जाल्यार इफेर्नांत (नरकांत) वता. बऱ्यो करण्यो करतल्याक सर्ग आनी वायट करण्यो करतल्याक इफेर्न. हांचे मदें उरतात ते पुर्गोतोरींत पावतात आनी तांकां एक ना एक दीस सर्गांत भितर सरपाची संद आसता.
सर्ग म्हणल्यार कितें?
सर्ग म्हणल्यार दैवीक जागो वा परिपूर्ण सुखाची अवस्था, जंय देव, देवदूत आनी सांत- भक्त रावतात. जायत्या धर्मांत ताका देवाचें निवासस्थान मानतात. ताचें खाशेलपण जावन आसा, थंय दुख्खाचो अभाव आसना, आसता सासणाची शांती, आनंद आनी देवा कडेन संबंद. सर्ग खंय आसा तें कोणाक खबर ना पूण आमी मळबाक बोट दाखोवन “सर्ग” मळबांत आसा अशें म्हणटात. हे शिवाय धर्तरेचेर सर्वोच्च सुखाची सुवात आशिल्ल्या जाग्याकूय आमी सर्ग म्हणटात.
इफेर्न म्हणल्यार कितें?
इफेर्न म्हणल्यार संवसारांत आसतना वायट करण्यो करतल्याक मेले उपरांत ख्यास्त वा दुख्खाची सुवात फावो जाता ती स्थिती. ती देवा पासून पयस आनी खर त्रासाची परिस्थिती. थंय ऑत्मे उज्यांत लासतात अशें म्हणटात. तांकां सर्गांत वचपाची मेकळीक ना. ताणीं अशेंच कश्टत रावपाचें. संवसारांत जो पातकांत जियेता तो इफेर्नांत पावता अशें सगळे धर्म सांगतात.
पुर्गोतोर म्हणल्यार कितें?
पुर्गोतोर म्हणल्यार मरणा उपरांत शुद्धीची मध्यवर्ती स्थिती, जंय आत्म्यांक सर्गांत प्रवेश करचे पयलीं आपल्या पातकांच्या लौकिक परिणामांतल्यान शुद्ध जावंक एक संद उपलब्ध आसता. रोमन कॅथोलीक धर्मशास्त्रांत ही सासणाची ख्यास्त न्हय, तर देवाचे कृपेन मेल्ल्या पूण अजून परिपूर्ण नाशिल्ल्या लोका खातीर तात्पुरती, वेदनादायक शुद्धीकरण प्रक्रिया. ही अवस्था ऑत्म्याक देवाचे परिपूर्ण उपस्थितिक तयार करता. क्रिस्ती भावार्थ अशेंय सांगता, हे पुर्गोतोरींत आशिल्ले ऑत्मे संवसारांत जियेतल्या मनशांच्या मागण्याक रावतात, देवान तांचीं पातकां भोगसून तांकां सर्गांत घेवंक, म्हण मागणें.
मनीसकुळाचेर एक नदर
मनीस ह्या संवसारांत येतकच, ताका खबर आसना आपूण खंयच्या धर्माचो, खंयचे जातिचो वा आनीक कोण तो. पूण ताका आपलीं आवय-बापूय कोण ते खबर आसता. तांचे छाये खाला तो वाडटा आनी आपलें परिपक्व जिवन जगपाचो यत्न करता. हे जिवनाचे यात्रेंत ताका बरे तशे वायट मनीस मेळटात. बऱ्यांचो सांगात घेतल्यार तो बरो जावन फुडें वता जाल्यार वायटांचो सांगात मेळ्ळ्यार वायट जावन फुडें वता. एक दीस ताचें लग्न जाता. ह्या लग्ना वरवीं तो वा तें नवो संवसार घडटा. हो नवो संवसार म्हणल्यारूय कांय फावटीं थोड्यांक सर्ग जाल्यार थोड्यांक नरक जाता. पूण जो मनीस देवाचेर भावार्थ दवरून चलता, ताका यश मेळटाच. हेंच यश ताका सदां बऱ्या कार्या वटेन फुडें व्हरता, ही सर्गाची बुनयाद.
मनशाचें कृत्रीम जिवीत
संवसार आधुनीक जाला. म्हणून आमच्या जिवितांत आधुनिकतायेच्या नांवान दुडवांचो वा पोखळ सभावाचो देवाचार भितर सरला. हो देवचार जायते पावटीं मनशाक पातकी जिविता वटेन व्हरता. मनीस ताका भुलता आनी पातकांत जियेता. मेले म्हणटच ह्या पातकांची झडटी दिवंक जाय म्हण विसरता आनी मनशाचें जिवीत पातकांचो एक सांपळो जावंक पावता. मेलो तो गेलो, हें तत्व घड्ये मरतल्याचें आसत, पूण मेल्ल्या फाटल्यान आशिल्ल्या कुटुंबाचें कितें? ताचे फाटल्यान कोण मरना, पूण हाल-उपद्रे सोंसपाचें टाळूंक जाता? म्हण क्रिस्ती धर्मांत ह्या मेल्ल्यांचे यादी खातीर आल्मांचो दीस रचिल्लो आसा.
आल्मां दीस म्हणल्यार कितें?
आल्मां दीस म्हणल्यार आपल्या मेल्ल्यां खातीर मागणें करप आनी तांच्या संवसारी जिवितांतल्या कसल्याय पातकाक लागून जर आजून तांकां सर्ग-सूख मेळूंक ना जाल्यार तें बेगीनूच मेळचें हे खातीर देवाक गाराणें घालप. आल्मां दीस हो क्रिस्तांवांक उत्सव कसो जंय लोक मिसाक हाजीर रावतात, शिमितेरीक भेट दिवन मागणें करतात आनी मरण आनी परलोकाचेर चिंतन करतात. पुर्गोतोरींत आशिल्ल्या ऑत्म्यांक ह्या दिसाचें मागणें खूब फायदेशीर, तें तांकां पवित्रतायेक पावयता अशें मानतात.
कित्याक हो दीस पाळटात?
क्रिस्ती भावार्था प्रमाणें आपल्या कुटुंबांतल्या वा इश्ट-परिवारांतल्या मेल्ल्या मनशांचो उगडास करपाची ही चाल. संवसारांत आसतना कितल्या मोगान जियेले वा रागार जियेले, हें कित्याक उपकारना, कित्याक तो आयज आमचे मदीं ना. मरणा उपरांत तो सर्गांत खुशाल, देवाच्या गोपांत आसचो ही अपेक्षा धरून तांचे खातीर मागणें करतात. कोणाक खबर आसना, मेला तो सर्गांत आसा वा पुर्गोतोरींत आसा वा इफेर्नांत आसा तें. जे कोण सांत जातात, तांचीच खात्री जाता ते सर्गार देवा फुड्यांत आसात म्हण. तरी, मेला तो संवसारांत बरें जिवीत जियेला हें आमी जाणांत तांकां लौकीक सांत म्हण मानतात आनी तांचे खातीर नोव्हेंबराचे पयलेर सकाळीं मिसाभेटेंतल्यान खासा मागणीं उभारतात आनी ‘सगळ्या सांतांचो दीस’ पाळटात.
सोंपयतना…
आस्तीक मनीस सर्गाचेर विस्वास दवरता आनी मेले उपरांत सर्गूच आपली सुवात जावंची अशी ताची अपेक्षा आसता. हे दिशेन जायते जण वावुरतात आनी सरळ देवा फुड्यांत जागो मेळयतात. पूण चडावंत लोकाच्या नशिबांत हें ना. हे खातीर दोनूय तरांच्या लोका खातीर पवित्र सभेन दीस राखून दवरल्यात. 1 नोव्हेंबराक देवा वांगडा आशिल्ल्यांक मान दितात जाल्यार 2 नोव्हेंबराक सगळ्या मरून गेल्ल्यांक मान दितात, तांचो उगडास मनयतात. क्रिस्ती धर्मांत ही समारंभणी जाल्यार पासून सगळे धर्मीय आपल्या मरून गेल्ल्यांक मानतात आनी तांकां सर्गार सुगूर जागो आसचो हाचेर विस्वास दवरतात. तेन्ना ह्या आल्मांच्या दिसा निमतान आमच्या सगळ्या मेल्ल्यांक देवान माफ करुंक प्रार्थन उभारुंया आनी कांय ऑत्मे सांडल्यात, भटकल्यात, इफेर्नांत वा पुर्गोतोरींत आसात, ताका पुरायपणान भोगसणें दिवन वैकुंठाचें सूख दिवंक प्रार्थुंया.
—-
– विन्सी क्वाद्रूस, राय, साश्ट
मो. – 98225 87498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
