आल्तीन वाहन स्क्रॅप मेळाव्यांक व्हडा प्रमाणांत प्रतिसाद

भांगरभूंय | प्रतिनिधी

भांगरभूंय । प्रतिनिधी
पणजीः गोंय पुलीस राखीव दळाचे कचेरेंत गोंय कोयर वेवस्थापन म्हामंडळान घडोवन हाडिल्ल्या वाहन स्क्रॅप मेळाव्यांक लोकांचो व्हडा प्रमाणांत प्रतिसाद मेळ्ळो. ह्या मेळाव्यांत 170 वाहनांची पावणी जातली. 15 वर्सां पोरणीं वाहनां कावलांक काडटलें, जाल्यार 15 वर्सा सकयली वाहनां सामान्य लोकांक पावणेंत विकती घेवपाक मेळटली.
सुमार 32 सरकारी खातीं, म्हामंडळा आनी स्वायत्त संस्थाच्यो 170 कण्णम गाडयां मदल्यो 128 गाडयो 15 वर्सा पयलींचो आनी 42 गाडयो 15 वर्सा सकयलो आसात. ही 42 वाहनां सामान्य नागरीकां खातीर पावणेंत वांटेकार जावन चडांत चड पावणी लावन विकत्यो घेतल्यो.
पूण जी वाहनां 15 वर्सा पोरणीं आसात तांचो केंद्र सरकाराच्या स्क्रॅपींग धोरणा प्रमाण तांचो वापर करपाक मेळना आनी तांचो विलव लावचो पडटा. हे खातीर फक्त नोंदणीकृत वाहन स्क्रॅपींग सुविधा (आरव्हीएसएफ) आशिल्ले कंत्राटदारानी पावणी लायल्यो. देशभरातल्यांन स कंत्राटदार कण्णम जाल्ली वाहनां खातीर पावणी लावपाक हजर आशिल्लें.
ह्या वाहनांचेर लोट नंबर बरयल्लो तो नंबर बरोवन वाहनांचे थारयल्लें किमती परस चड बोली लावन सुवातेर दवरिल्ल्या निविदा पेटुलांत घालचीं. दनपारां 3.30 वरांचेर ही पावणी सोंपली. आतां निविदा पेटूल उक्ते जातले आनी ज्या मनशान चडांत चड पावणी लायल्या तांची निवड जातली आनी पयशे भरलें उपरांत त्याच दिसा वाहन त्याच्या ताब्यांत दितलें.
चडशो सामान्य प्रशासन खात्याचो 15 वर्सा सकयलो मोटारी जश्यो की टोयोटा इनोव्हा हांची 50 हजार ते देड लाख मेरेन कमीत कमी किंमत आसा, रेनोल्ट डस्टर हांची कमीत कमी किंमत 50 ते 60 हजार, होंडा सिटी, मारूती एस एक्स 4, फोल्क्सवेगन वेन्टो आनी फोर्ड फिएस्टा ह्यो 24 हजार ते 55 हजार जाल्यार दुचाकी स्प्लेंडर आनी पल्सर हांची 4 हजार मेरेन कमीत कमी किंमत आसा.
आदले मुख्यमंत्री लक्ष्मीकांत पार्सेकार हांची वैयक्तीक शासकीय मोटार महिंन्द्रा एक्सयुव्ही 300 ही गाडी पावणे खातीर काडल्या. जीए 11 जी 0645 ही मोटार सामान्य प्रशासन खात्यान शासकीय कामा खातीर लक्ष्मीकांत पार्सेकार हांका दिल्ली. ही मोटार 15 वर्सा सकयल आसा आनी सामान्य लोकांक ती पावणी लावन विकती घेवपाक मेळटा. ह्या मोटारीची कमीत कमी किंमत रु. 1.20 लाख आसा.