भांगरभूंय | प्रतिनिधी
ग्रॅण्डमास्टर आर प्रज्ञानंदान नॅदरलॅण्डांत जाल्ले उमळशीक वाडोवपी टायब्रेकरांत संवसारीक बुद्दीबळ वस्ताद डी गुकेशाक हारोवन टाटा स्टील मास्टर्स सर्त जिखली.
ही सर्त जिखपी प्रज्ञानंद भारताचो दुसरो ग्रॅण्डमास्टर थारलो. ताचे आदीं म्हणल्यार 2006त विश्वनाथन आनंदान ही सर्त जिखिल्ली. टायब्रेकरांत प्रज्ञानंदान गुकेशा आड 2-1 अशा फरकान जैत जोडलें.
13वी फेरी सोंपल्या उपरांत दोगांयचे दरेकी 8.5 गूण आशिल्ले. अखेरचे फेरये मेरेन सर्त उमळशीक वाडोवपी थारली. अखेरचे फेरये मेरेन गुकेशान एकूय मॅच व्हगडावंक नाशिल्ली. पूण, निमाणे फेरयेंत तो भारताच्याच अर्जुन इरिगसी आड 31वे चालींत हारलो. संवसारीक वस्तादपण मेळयल्या उपरांत गुकेशाची ही पयलीच हार आशिल्ली. जाल्यार प्रज्ञानंदाक निमाणे फेरयेंत व्हिन्सेंट किमरा आड हार घेवची पडिल्ली. गुकेश आनी प्रज्ञानंद हांचे समान गूण आशिल्ल्यान जैतिवंत थारावपाक टायब्रेकराचो आदार घेवचो पडलो. गुकेशान दोन गेमीच्या ब्लिट्झ टायब्रकेराची पयली मॅच जिखली. वस्तादपण जोडपाक गुकेशाक दुसरी मॅच फकत बादाबाद दवरपाची गरज आशिल्ली. पूण, प्रज्ञानंदान उत्कृश्ट रितीन पुनरागमन केलें. ताणें उरिल्ल्यो दोनूय ब्लिट्स गेमी जिखून वस्तादपण जोडलें.
गुकेशान सर्तींत जबरदस्त प्रदर्शन केल्ल्यान अर्जुन ताका हारोवपाक शकतलो हें आपल्याक अखेर मेरेन दिसूंक नाशिल्लें. पूण, तांचे मॅचीचो निकाल पळयलो आनी आपल्याक अजाप जालें. पूण, ते पयलींच आपणेन किमरा आड चूक केल्ली. गुकेशा आड आपूण खूब कठीण परिस्थितींत आशिल्लो. आपणेन फकत बचाव करपाचेंच थारायिल्लें अशें प्रज्ञानंदान पत्रकारां कडेन उलयतना सांगलें.
हे सर्तींत वांटो घेवपाक आपूण हांगा आयिल्लो, त्या वेळार आपल्याक सर्त जिखपाची आशिल्ली. पूण, सर्त सामकी कठीण जाली. हें पळोवन वस्तादपणाचो विचार आपणेन सोडून दिल्लो अशें ताणें मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
