भांगरभूंय | प्रतिनिधी
एक काळ आसलो की दरेका कृतीक नैतिकता, विनयशील आनी संस्कृतीक मुल्यांच्या आदारार वळख मेळटाली. ह्या नेमां कडेन आडनदर करपी लोकांचो समाजीक निशेध जातालो. लिंगां मदल्या संवादाचेर बारीकसाणेन नदर दवरताले आनी लग्ना पयलींच्या मोगाचेर, लग्ना भायले संबंद वा मान्य केल्ल्या नैतिकतायेंतल्यान कसलेंय विचलन समाजाक स्विकार नासले. भुरग्यांची वाड काळजी, मोग शिस्तबद्ध पद्दतीन जाताली. कसलीय वागणूक बदल जाल्यार रोखडेंच पालकांचें लक्ष ओडटाले. शाळांनी नैतीक मानकांक पाळो दिलो, प्राचार्य आनी शिक्षकांनी आचरणाचेर बारीकसाणेन नदर दवरली आनी पालकांक घेवन विद्यार्थ्यांचे प्रस्न सोडोवपाक वावुरले. नियंत्रण सुनिश्चीत करपा खातीर शाळेच्या गेटींचेर लेगीत नजर दवरताले. नैतीकशास्त्र फकत अभ्यासक्रमांतलो विशय न्हय — तो शाळेच्या वातावरणांत आनी दिसपट्ट्या आचरणांत गुंतिल्लो आसता. अशें करून चरित्र विकास आनी वैयक्तीक जापसालदारकेचेर भर दिताले.
व्यक्तीं मदीं सैमीक आकर्शण सदांच आशिल्लें. पूण आदल्या काळांत मोगाक गंभीरतायेन घेताले आनी सादारणपणान ताचें रुपांतर लग्नांत जातालें. लग्न हें जापसालदारकेचें आनी परस्पर संबंद वाडपाचें बंधन म्हणून पळयताले. परंपरा, खास करून धर्मीक, विनयशीलताय तिगोवन दवरपाक आनी व्यक्ती आनी कुटुंब ह्या दोगांयची राखण करपाक मर्यादा घालपाक आदार दिताली. आव्हानांक एक भाग म्हूण पळोवन लोकांनी लग्नाच्या कर्तव्यांक मान दिवपाचें काम केलें. घटस्फोट घेवप दुर्मीळ आशिल्लें. शिक्षण आनी करिअर लग्ना उपरांत लेगीत चालूच आसतालें. समाजांतल्या जायत्या नामनेच्या व्यक्तींनी शाळे सावन पीएचडी पांवड्या मेरेन उच्च शिक्षण घेतलें, लग्न जाले उपरांत लेगीत ल्हान पिरायेचेर कितल्योश्योच पदवी घेवन फुडार घडयलो.
कांय प्रकरणांनी लग्नां पयलींच जातालीं, पूण दोनूय जोडीदार जापसालदारकी घेवपाक परिपक्व जाय मेरेन व्हंकलेक धाडपाक कळाव करताले. वचनबद्धतेचीं लक्षणां आसलीं. आधुनिकतेच्या काळांत मुल्यां आनी धारणा हातूंत बदल जालो. “कांयच बरें वा वायट ना, फकत विचारांक लागून तशें जाता” आनी “म्हजें जिवीत, म्हजे नेम” ‘जिंदगी ना मिलेगी दोबारा” सारकिले तत्वगिन्यान वर्चस्व गाजोवंक लागलें. वैयक्तीक स्वातंत्र्याचे कल्पनेचो अर्थ अशे तरेन केलो की विनयशीलताय आनी अविनय हांचे मदली रेखा धूसर जाली. एकदां अनैतिक मानताले कृत्यां सामान्य जालीं. चरित्र उबारपा परस वा समाजांत योगदान दिवपा परस चड पगाराची नोकरी मेळोवप हें शिक्षण सगले शिकपाक लागले.
लिव्ह इन रीलेशनशीप आनी हेर गजालींक लागून लग्नां टाळपाचे प्रकार वाडपाक लागले. कांय जाण लग्नाक आवटडेटेड मानतात. तर कांय जाण सुसंगतीची “परिक्षा” करिनासतना बेगीन लग्न जाल्ल्यान लग्ना तिगचीं नात असो भंय दवरतात. तरी दीर्घकाळाच्या संबंदा उपरांत लेगीत जायत्या जाणांक संबंदान अपेस मेळटा. मागीर हो प्रस्न उप्रासता: चांचणी केल्ल्या वा ना केल्ल्या संबंदांक वा बेगीन आनी उसरां केल्या लग्नाचो खऱ्यांनीच वेगवेगळे परिणाम मेळटात काय?
लग्न संबंदान ‘Extra Marital Affairs’ पळोवपाक मेळटात. लग्नांत आव्हानांक तोंड दिवचें पडटा तेन्ना लग्नाच्या भायल्या संबंदाक “पर्याय” म्हूण कांय जाण पळयतात. लांब न्यायालयीन कार्यवाही, पोटगी आनी मालमत्तेच्या वादांचो भंय कांय जाणांक घटस्फोट मागचे परस बेकायदेशीर संबंदा कडेन व्हरता. हाका लागून कुटुंबाची रचणूक दुबळी जाता, अशा संघांतल्यान जल्मल्ल्या निरपराधी भुरग्यांक हानी जाता आनी समाजाच्या नैतीक कापडाक लुकसाण जाता.
पालक केन्नाकेन्नाय लग्नाच्या कायदेशीर बंधनाक स्वता खातीर आनी भुरग्यां खातीर भार मानतात. तरी लेगीत भुरगीं ल्हान पिरायेचेर जायत्या, निमण्या संबंदांत – जी नैतीक आनी मनीसपणाची मर्यादा हुंपपी आसता – त्या संबंदांक जेन्ना बळी पडटात तेन्ना ते मान्य करतात. अशे तात्पुरतें नातें भावनीक संकश्ट निर्माण करता आनी फकत वैयक्तीक वाडीक न्हय तर पुराय समाजाच्या वाडीक आडमेळीं निर्माण करता.
अनैतिक प्रकाशनां, अश्लील चित्रपट, सोरो, ड्रग्स, काय क्लब हावस हीं सगळीं आधुनिकता, उदरगत, मनरिजवण हांचो भाग मानप सुरू जालां. आयज जायते सिनेमा आधुनीक आदर्शांक चालना दिवपा खातीर तयार केल्ले दिसतात, जी तरणाट्यांक फँटसींत रमयतात आनी वास्तव, खऱ्या उद्देशा पासून पयस व्हरतात. अशे तरणाटे सत्या पसून पयस वचून ते समाजसुदारक जावचे बदला भ्रश्टाचार आनी अशोभनीयता पातळावपाची सोंपी साधनां जातात. अधिकारी आनी सत्तेर आशिल्ले लोक सेंसरशिप टाळून हाका परवानगी दितात, अशें दिसता. आधुनिकता ही स्वभावीकपणान चुकीची न्हय. ताचे गूण वेंचून काडिल्ले आनी चुकीचे मार्गान आपणावप हातूंत मुद्दो आसा. नॅशनल क्रायम रेकॉर्ड ब्युरोच्या आंकड्या प्रमाण, गुन्यांवांचे प्रमाण खूब वाडत आसा. दिसपट्ट्या दिसाळ्यांनी थोडो वेळ पळयल्यार लेगीत हो त्रासदायक प्रवृत्ती पुष्टी जाता. अणभवांतल्यान दिसून येता की जायत्या जाणांक नैतीक लग्नांत प्रवेश केल्या उपरांत करिअरांत आनी जिणेंत खरी प्रेरणा, स्थिरताय आनी प्रगती मेळटा. जेन्ना संबंद आपल्या जोडीदार आनी भुरग्यां कडेन आशिल्ल्या खऱ्या मोगाचेर उबारतात तेन्ना तातूंतल्यान परिपक्वता आनी जिणेंतल्या उद्देशाची खोलायेन जाणविकाय जाता.
फकत कायदे सदांच प्रभावी नासतात; कांय प्रकरणांनी ते फायद्या परस चड वजें जावंक शकतात. देखीक- लग्न जाले उपरांत मालमत्तेच्या मालकी संबंदीचे कायदे जोडप्यांक, खास करून पयलींच मालमत्ता आशिल्ल्या जोडप्यांक अडचणी निर्माण करपाक शकतात. जोडप्याक मालमत्तेंत भागधारक करपाचो निर्णय जोडीदाराच्या विस्वासाचेर आदारून आसूंक जाय, कायद्यान सक्तीचो न्हय. लग्न गिरेस्तकायेचे बुन्यादीचेर न्हय, तर परस्पर आदर आनी समजुतीचेर आदारून आसूंक जाय. वैयक्तीक गजालींचेर कायदे करचे पयलीं सरकारान पुराय आनी प्रामाणीक सर्वेक्षण करून समाजाची खरी गरज समजून घेवची. अश्लीलताय, अविनय आनी व्यभिचाराक चालना दिवपी चित्रपटांचें नियंत्रण करपाक सेंसरशिप मंडळांनी सक्रीय भुमिका घेवची. अश्लील संकेतथळांचेर पुरायपणान बंदी घालची आनी सोशल मिडिया प्लॅटफॉर्मांचेर नियंत्रण दवरून लज्जास्पद सामुग्री बेगोबेग वळखून काडून उडोवपाक जाय.
शिक्षणांत विद्यार्थ्यांक राष्ट्रनिर्माण प्रक्रियेंत योगदान दिवपाक नैतिकता आनी बरें चरित्र तयार करपाचें प्रशिक्षण दिवचें. नैतीक शिक्षण सगळ्या विशयांत एकठांय करपाक जाय, जाचो मुखेल ध्येय विद्यार्थ्यांक जबाबदार नागरिकांक आकार दिवप आसचो. शाळेंतल्या भुरग्यांच्या वैयक्तीक आनी सामुहीक वागणुकेंत नैतिक शिक्षणांतल्यान शिकयल्ल्या मुल्यांचें प्रतिबिंब दिसूंक जाय. पालकांनी मार्गदर्शक म्हूण भुमिका पुराय करची पडटली. फकत भुरग्यां कडेन इश्टागत करची न्हय तर मोग आनी आदार, शिस्त आनी देखरेख हांचो संगम जावुंक जाय . आयच्या नेटान बदलपी संवसारांत आव्हानात्मक आसतना लेगीत पालकांनी तरणाट्या पिळगेक दोशपूर्ण अशें म्हणचे परस भुरग्यांक योग्य मार्गाचेर मार्गदर्शन चालू दवरचें. तरणाट्यांक केन्ना केन्ना वाट चुकप सभावीक, पूण बुद्धी आनी अणभव वांटून घेवन तांकां
आपली दिका सोदून काडपाक आदार
करप ही जाण्टे, परिपक्व पिळगेची जापसालदारकी.
देवान दरेका मनशाक बऱ्या- वायटाची, नैतिकता आनी अनैतिकतायेची समजूत दिल्या. आमच्या भितर शारिरीक इत्सा आनी नैतिक आचरणाच्या तत्वां मदीं सतत संघर्श आसा. दरेके व्यक्तीन आत्मजागृताय करची पडटली आनी जाणीवपूर्वक कितें योग्य तें वेंचून काडचें पडटलें. ‘जिंदगी ना मिलेगी दोबारा’ (तुमी फकत एकदांच जियेतात) ह्या वाक्यांचो अर्थ जिवीत फकत मजे खातीर आनी भोगविलास खातीर अशें ना. निसर्गांत दिसपी प्रतेक जीव एका खास उद्देशा खातीर सृश्टीकर्त्यान रचिल्लो आसा अशे हाचेर नजर मारल्यार दिसून येता. तर मनीसजात एक अर्थपूर्ण उद्देशा खातीर रचल्या अशेंय हें दाखयता- फकत स्वार्थी इत्सा फाटल्यान
जिवीत फुकट घालपा खातीर ना. देवा वयलो खर विस्वास आनी ताका जापसालदार आसपाची जाणविकाय हीं बळिश्ट शक्ती जी हो हेतू पुराय करपाक आदार करता. हांगाच धर्माची म्हत्वाची भुमिका आसता. देवाची मार्गदर्शक जिणे पद्दत पाळून दरेक व्यक्ती आत्मजागृताय वाडोवंक शकता आनी अर्थपूर्ण जिवीत जगूंक शकता.
नझराना दरवेश
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
