भांगरभूंय | प्रतिनिधी
शाळा, कॉलेज वा सर्त परिक्षांची तयारी करपी लाखांनी विद्यार्थी ऑनलायन कॉचींग घेतात. पूण, आतां खेळांनी लेगीत ऑनलायन कॉचींग सुरू जातली. पाकिस्तानी मिडिया रिपोर्टा प्रमाण पाकिस्तान क्रिकेट मंडळान मिकी आर्थराची आपल्या पंगडाचो ऑनलायन प्रशिक्षक म्हणून नेमणूक करपाक शकता. तशें घडलें जाल्यार मिकी आर्थर संवसारांतलो पयलो ऑनलायन मुख्य प्रशिक्षक आसतलो.
सध्या तरी आपूण ऑनलायन उपलब्ध आसलो तरी अंदूं भारतांत जावपी संवसारीक सर्ती खातीर तो पाकिस्तान पंगडांत सामील जातलो अशें आर्थरान पाकिस्तान क्रिकेट मंडळाक सांगलें.
आर्थर सध्या क्रिकेटीचे मुखेली म्हणून डर्बीशायर कडेन जुळिल्ले आसा. मिकीन 2025 मेरेन ही कबलात केल्या. डर्बीशायरांत वचपा खातीर आर्थरान 2021त श्रीलंकेच्या पंगडाचें मुख्य प्रशिक्षकपद सोडिल्लें.
पाकिस्तानाक प्रशिक्षक दितना आसतना तो डर्बीशायर कावण्टी वांगडा काम करीत रावतलो. 2017त पाकिस्तानान चॅम्पियन्स ट्रॉफी जिखिल्ली, त्या पंगडाचो आर्थर मुखेल प्रशिक्षक आशिल्लो.
पूण पाकिस्तानाच्या क्रिकेट मंडळाच्या ह्या निर्णयाचेर पाकिस्तानाचो आदलो मुखेली शाहिद आफ्रिदीन खर टिका केल्या. आर्थराक ऑनलायन प्रशिक्षक करपाच्या निर्णयाचेर आफ्रिदीन साबार प्रस्न उपस्थीत केल्या.
राष्ट्रीय पंगडा खातीर विदेशी प्रशिक्षकाची ऑनलायन कोचींग ही संकल्पना आपल्याक समजना अशें आफ्रिदीन म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
