आर्ट पार्क

भांगरभूंय | प्रतिनिधी

हो पार्क विंगड विंगड प्राण्यांच्या कलाकृतीन सजिल्लो आसून ल्हान भुरग्यांक तो भोव आवडटा. ह्या पार्कांत पावल दवरलें की मन प्रसन्न जाता.

नामनेचे साहित्यीक सर्गेस्त पु. ल. देशपांडे हांणी म्हळां की, पोटापाण्याचे उद्देग मनशाक जगपाक मजत करतलो पूण साहित्य, चित्र, संगीत, नाटक हांचे कडेन जोडिल्लें नातें जगप कशें हें शिकयतलो. देखून मनशांचे जिणेंत कलेचें म्हत्व अनन्यसादारण आसा.
पर्वरेची आयज सर्वांगी उदरगत जाल्या. पर्वरी कडेन आयज शिक्षणीक आनी अर्थीक केंद्र म्हूण सगले जाण पळयतात.पर्वरे नाना- नानी पार्क, दिव्यारंजन पार्क, योगा पार्क अशे तरेतरेचे नाविन्यपूर्ण प्रकल्प अस्तित्वांत आयल्यात, आनी पर्वरी टावन स्क्वेर सारके नवे प्रकल्प येत आसात. असोच एक नाविन्यपूर्ण आनी देखणो प्रकल्प म्हळ्यार आर्ट पार्क म्हळ्यार कला उद्यान. हें पार्क पर्वरेच्या मध्यवर्ती सुवातेर उबें आसा आनी ते पणजे शारा पसून सुमार पांच किलोमिटर अंतराचेर आसा. पर्वरीचे आमदार तशेंच पर्यटन मंत्री रोहन अशोक खंवटे हांच्या संकल्पनेंतल्यान हें पार्क उबें जालां.
आर्ट पार्क हें पर्वरेंतली एक खाशेली सुवात आसा. हांगा वण्टीचेर रंगयिल्ल्यो कलाकृती, चित्रां आनी शिल्पां मनाक धादोसकाय दितात. एका उक्त्या सुवातीचो कसो बरो उपेग करूं येता हाचें बरें उदाहरण म्हळ्यार हें पार्क. सर्वसादारण लोक उक्त्या सुवातांचेर उद्यानां उबारपाक सोदतात. पूण पर्यटन मंत्री रोहन खंवटे हाणी परंपरीक उद्याना परस वेगळें किेतें तरी करपाचो निर्णय घेतलो आनी तातूंतल्यान अत्याधुनीक आर्ट पार्क ही संकल्पना जल्माक आयली. ह्या आर्ट पार्काची बुन्यादी ऑक्टोबर 2018 वर्सा घाल्ली आनी 2021 वर्सा ताचें लोकार्पण जालें.
हें आर्ट पार्क गोंय सरकारच्या गोंय पर्यटन आनी उदरगत म्हामंडळान उबारलां आनी तें राष्ट्रीयपणची- म्हापशें म्हामार्गा सावन फक्त एक किलोमिटराच्या अंतराचेर आसा. प्रतिभावंत कलाकारांनी तयार केल्लीं चित्रां आनी शिल्पां ह्या आर्ट पार्काचें आकर्शण आसा. तेभायर ह्या पार्कांत कार्यावळी करपा खातीर माची आसा. हे माचयेर विंगड विंगड मनरिजवणेच्यो तशेंच हेर कार्यावळी जातात. हांगासर लोकांक बसपाची वेवस्था लेगीत केल्ली आसा. शेंकड्यांनी लोक हांगा बसून कार्यावळींचो आस्वाद घेवंक शकतात.
ह्या पार्कांत वचपा खातीर फी आकारना. हो पार्क सगल्यां खातीर उक्तो आसा. हो पार्क जरी आकारान ल्हान आसलो तरी तो नितळ दवरिल्लो आसा. देखून ह्या पार्कांत परतून परतून वचन दिसता. ह्या पार्कांत वॉशरुमाची सोय केल्या. देखून लोकांक कसलीच अडचण येना. भुरग्यांक तर हो पार्क भोव आवडटा. तांकां जाय तश्या सोबीत वातावरणांत खेळपाक मेळटा. ह्या पार्का भोंवतणचो वाठार खूब सोबीत आसा. खेरीज गाडयो पार्क करपाची बरी वेवस्था आसा.
ह्या पार्कांत जेन्ना मनरिजवणेची कार्यावळ आसता तेन्ना आपसेवी गटाच्यो बायलो प्रदर्शन घडोवन आसतात आनी आपल्या खाद्यपदार्थांची व स्वता तयार केल्ल्या वस्तुंची विक्री करतात. ह्या प्रदर्शनाक लोकांचो बरो प्रतिसाद मेळटा. हो पार्क बायलांच्या आपसेवी गटांक तांच्या खाद्यपदार्थांची विक्री करपाक बरी सुवात मेळ्ळ्या.
आर्ट पार्कांत एक फावंण्टन आसा आनी सांजेच्या वेळार जेन्ना हो फावंण्टन चालू करतात तेन्ना रंगबेरंगी दिव्याच्या उजवाडांत कारंजी नाचतात. हें द़ृश्य पळोवन मन प्रसन्न जाता आनी पार्कांतल्यान घरा परतून वचन दिसना. पर्वरेतले हें आर्ट पार्क थळाव्या लोकां खातीर आनी विशेश करून ल्हान भुरग्यां खातीर तशेंच पर्यटकां खातीर आर्कशणाचें केंद्र थारलां. पार्कांत एक टॉवर उबारिल्लो आसा आनी ह्या टॉवराचेर एक एलइडी स्क्रीन बसयिल्ली आसा. ह्या स्क्रिीनीचेर फुटबॉलाच्यो आनी क्रिकेटच्यो मॅची पळोवंक मेळटात. तशेंच ह्या पार्कात विंगड विंगड सांस्कृतीक कार्यावळी आनी प्रदर्शनां जातात. देखून पर्वरीवासियांक आर्ट पार्क एक मनरिजवणेंचे केंद्र जालां. ह्या पार्काची देखभाल करपा खातीर एका सेक्युरिटी गार्डाची नेमणूक केल्या. सांजेच्या वेळार थळावे लोक कलाकृतींनी सजयिल्लें पार्क पळोवपा खातीर आपल्या भुरग्यांक घेवन ह्या आर्ट पार्कांत पासय मारतात आनी आपलो वेळ सारतात.
हो पार्क विंगड विंगड प्राण्यांच्या कलाकृतीन सजिल्लो आसून ल्हान भुरग्यांक तो भोव आवडटा. ह्या पार्कांत पावल दवरलें की मन प्रसन्न जाता. अशे तरेचीं कला उद्याना गोंयांत दर एका गांवांनी आनी शारांनी उबारूंक जाय. ताका लागून त्या गांवांची आनी शारांची सोबा वाडटली हातूंत दुबाव ना.

अनिल कामत शंखवाळकार
9763718518