भांगरभूंय | प्रतिनिधी
सरकारी कर्मचारी संघटनेचे आदले अध्यक्ष नाझारेथ हांचो आरोप
भांगरभूंय । प्रतिनिधी
पणजीः गोंय आर्किटेक्चर महाविद्यालयांत रॅगिंग जाल्ल्याचें प्रकरण उक्ताडार आयलां. हे विशीं कागाळी दाखल जाल्यात, पूण त्यो फाटी घेवपा खातीर पिडेस्तांचेर चेपण हाडपाचो यत्न नेटान चालू आसात. हे विशीं कितल्योशोच कागाळी मुख्यमंत्री आनी कुलगुरूं कडेन केल्यात, पूण अजून मेरेन कसलीच कारवाय जायना, असो गंभीर आरोप गोंय सरकारी कर्मचारी संघटनेचे आदले अध्यक्ष जॉन नाझारेथ हांणी केलो.
पणजे घेतिल्ले पत्रकार परिशदेत जॉन नाझारेथ उलयताले. ह्या वेळार तांचे वांगडा कार्लुस लाॅरेन्स हाजीर आशिल्ले.
नाझारेथ हांणी सांगले, आर्किटेक्चर महाविद्यालयाच्या विद्यार्थ्यांचे रॅगिंग जालां हे विशींची कागाळ गोंय विद्यापीठाचे कुलगुरू, मुख्यमंत्री, मुखेल सचिव, शिक्षण सचिव, उत्तर गोंय जिल्लोधिकारी, तांत्रिकी शिक्षण संचालक आनी आर्किटेक्चर परिशदेचे अध्यक्ष हांचे कडेन दाखल केल्ली.
कागाळ नोंद करून लेगीत कसलीच कारवाय जायना म्हूण हे विशीं आरटीआय वरवीं म्हायती मागिल्ली, पूण ही मागणी कलम 8 सकयल भायरायली. हे विशीं हांवें म्हायती आयुक्ता कडे आव्हान दिलां. रॅगिंग म्हणटा ती गुन्यांवकारी घडणुक. जेन्ना कनिष्ठ भुरगें सिनियर आसता नवे भुरग्यांक रॅगिंक करतात तेन्ना तांचेर वायट परिणाम जाता. ताचे शिक्षणाचेर परिणाम आनी तांका मानसिक त्रास सोंसचे पडटात, अशें नाझरेथ हांणी सांगलें.
मेळिल्ले म्हायती प्रमाण, महाविद्यालयाच्या वरिष्ठ भुरग्यांनी नवे प्रवेश घेतिल्ले कनिष्ठ भुरग्यां खातीर फ्रेशर्स पार्टी दवरिल्ली. कॉलेजी भायर जाल्ले हे खाजगी पार्टीत तांचें रॅगिंक जालें. थंय महाविद्यालयाचो प्राध्यापक हजर आसलो. महाविद्यालयाचे अधिकारी वा प्राचार्याचे परवानगी बगर व्हिजिटींग प्राध्यापक खाजगी पार्टेंत हजर रावपाक शकनात. ते थंय वचत जाल्यार ती महाविद्यालयाची जापसालदारकी थारता, असो युक्तिवाद नाझारेथ हांणी केलो.
उपरांत नव्या विद्यार्थ्यांनी ह्या प्राध्यापकाक महाविद्यालया भितर घेवचे नात असो बोवाळ घाले उपरांत महाविद्यालयान ताचेर बंदी घाली. उपरांत ताणे राजीनामो दिलो. हे पुराय घडणुकेची म्हायती भायर पडले उपरांत वरिश्ठ विद्यार्थ्यांनी नव्या विद्यार्थ्यांची परत पिडणूक सुरू केल्या. कागाळ करचे ना अशें तांचे कडल्यान पत्र बरोवन घेवपा खातीर तांचेर चेपण हाडपाचे काम चल्ला, असो आरोप नाझारेथ हांणी केलो.
काय भुरग्यांनी कागाळ फाटीं घेतिल्ले कारणान हे घडणुकेची चवकशी बंद केल्या. पूण ह्यो कागाळी फाटीं कित्याक घेतल्यो आनी कोणी घेवपांक लायल्यो हाची चवकशी जावपाक जाय. हातूंत काय सान पिरायेचे विद्यार्थ्यांचो आस्पाव आशिल्ले कारणान ‘पोस्को’ कायदो लागू करचो. ह्या प्रकरणांची निवृत्त न्यायाधीश वा निवृत्त पुलीस अधिक्षक वरवीं निपक्ष चवकशी करची, अशी मागणी नाझारेथ हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
