भांगरभूंय | प्रतिनिधी
ह्याच बोवाळांत कपेला लागसांरच्या वाड्यावेलो फ्रांसिक, सूर काडूंक गेल्ले कडेन माडावेल्यान पडलो. हात आनी पांया वांगडा ताच्या तकलेंक बरोच मार लगिल्लो.
लाझीयो निकतोच एकवीस वर्साचो जाल्लो. ताका आ.र.टी.ओ कडसून गाडी चलोवपाचे लीसेस लेगीत मेळिल्लें. “पाय तुवें म्हाका मोटरसायकल घेवन दिली ना, तर ताचे परिणाम वायट जातले. हांव जीव लेगीत दीन!!” लाझीयोन सांतानाक धमकायलो.
आपलो एकटोच पूत धमकी खरी करीत म्हण भिरांतेन, भावार्थी सांतानान ताका ती रोखडीच विकत घेवन दिली. हीच मोटरसायकल ह्या फुडें जीवघेणी थारतली अशें सांतानान सपनांत लेगीत चिंतूक नाशिल्लें. मेट्रिक लेगीत पास जावंक नाशिल्ल्या सांतानाक आपलो पूत मुखावेले शिकप करता हाचोच मोठो अभिमान दिसतालो.
रस्त्यावेलें पोरणें पुर्तुगाली तेंपावेंले अशीर आर्क येरादारीक सदांच आडखळ करतालें. सदचे भशेन त्या दिसा सांजवेळा आपली शिकवणी सोंपोवन परततना लाझीयोचो जीव घेवक तें कारण थारलें. आर्काक मोटरसायकल आपटून जाल्या भिरांकूळ अपघातांत लाझीयो आक्ताक सोंपलो. त्या घडणुकेच्यो यादीं पासत स्वताचे पयशे खर्चावन सांतानान त्या सरकारी आर्कांवेल्या धपको दिल्ल्या जाग्यार ल्हान खुरीस उबारल्लो. एक फावट कोणें तरी अडिल्ल्यान त्या आर्का खुरसाक आंगवण केली. ताणें मागिल्ली गजाल ताका मेळ्ळी. ताची आंगवण पुराय जाली ही गजाल फामाद जावंक वेळ लागलो ना. आंगवणीच्या भावार्ताचेर “आर्का खुरीस” सगळ्यां भितर रोखडोच नामवंत जालो. कांय दिसांनी तो खुरीस कपेलांत परीवर्तीत जालो. खुरसाच्या बांदावळीचो दीस त्या कपेलाचे फेस्त म्हण मनोवंक सुरू जालें. फेस्ताक गोंय भरचे भावीक थंय जमतात. त्या दिसा मुखेल रस्त्याच्या दोनूय अर्दांनी तरेकवार मांड आनी भाविकांनी उपाट भरिल्ल्या फेरयेंत मुयेक लेगीत चलूंक जागो नासता.
ह्याच बोवाळांत कपेला लागसांरच्या वाड्यावेलो फ्रांसिक, सूर काडूंक गेल्ले कडेन माडा वेल्यान पडलो. हात आनी पांया वांगडा ताच्या तकलेंक बरोच मार लगिल्लो. सरकारच्या सेवेंतली 108 गाडी ताका घेवन मुखेल जिल्लो हॉस्पिटलाच्या वाटेक लागली. जुस्त तो दीस “आर्का खुरीस” फेस्तांचो आशिल्लो. वाटेर गर्देंत आडावन उरिल्ल्या त्या अँम्बुलन्सीक वाट करुन दिवंक ट्रॅफिक पुलिसा वांगडा गांवचे आपवावुरपी कामाक लागिल्ले. वाट मेळूंक आनी कितलो कळाव जातलो कोणूच नकळो आशिल्ले. सतत भोंगो चालू आशिल्ल्या अँम्बुलन्सीत फ्रांसिकाचो जीव हापापतालो. इतल्यान कपेलांची घांट वाजूंक लागल्ली. आपल्या हातांत सलायनाची बाटली धरून फ्रांसिस्का लागसार बशिल्ल्या कितेरान ताच्या घरकान्नीन, वेळ काडीनासतना गाडयेंतच दिमी मारली. आनी थंय सावनूच भावार्थान “आर्का खुरिसाक” आंगवण केली. “आपलो घरकार हॉस्पिटलांतल्यान बरो जावन बेगीत घरा येवनी सायबा, आयज आसा त्या पोरस चड लोकांक एकठावन तुजे मोठें मीस कोरीन”. उपरांत गाडयेचो हारसो कुशीन करून भायर नदर मारली. अजून लेगीत रस्त्यार आपवावूरपी आनी पुलीसां मदीं अँम्बुलन्सीक गर्देतल्यान वाट काडपाचे काम चालूच आशिल्लें. भाविकांच्या गर्देंतलो मूस लेगीत हालूंक नाशिल्लो !!
दादा हेगडे
९५१८९४२२९८
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
