भांगरभूंय | प्रतिनिधी
मंदार सुर्लकार खून प्रकरण
पणजी: वास्को हांगाचो डीजे मंदार सुर्लकार खून प्रकरणांत जल्मठेपेची ख्यास्त भोगपी आरोपी रोहन पै धुंगट हाका मुजती पयलीं सोडपाक सरकारान न्हयकारान दिला. ह्या आदेशाक धुंगट हाणें गोंय स्थीत मुंबय उच्च न्यायालयांत आव्हान दिलां. मजगतीं, ह्या प्रकरणांत मंदाराचे बापूय दीपक सुर्लकार हांणी हस्तक्षेप अर्जूय न्यायालयांत दाखल केला. ह्या प्रकरणाची फुडली सुनावणी 16 फेब्रुवारीक जातली.
वास्कोच्या मंदार सुर्लकाराचें 14 ऑगस्ट 2006 दिसा अपहरण केलें. ताच्या बापाय कडल्यान 50 लाख रुपया खंडणी खातीर उकळपाचो कट आरोपी रोहन पै धुंगट, नफियाज शेख, शंकर तिवारी, जोविता रायन पिंटो आनी अल सलेटा बेग हांणी आंखिल्लो. उपरांत मंदाराचे हातपांय बांदिल्ले अवस्थेंत कूड फोंड्यां आर्ला-केरी हांगा सांपडिल्ली. ह्या प्रकरणांत तेन्नाचे पुलीस निरिक्षक महेश गांवकार हांणी गुन्यांव दाखल करून आरोपींक अटक करून बाल न्यायालयांत आरोपपत्र दाखल केल्लें.
बाल न्यायालयान 23 जून 2014 दिसा रोहन पै धुंगट, शंकर तिवारी, नफियाज शेख, आनी जोविता रायन पिंटो ह्या चार आरोपींक भादंसं कलम 120 (बी), 364 (ए), 302 आनी गोंय बाल कायद्या खाला दरेकी तिट्टे जल्मठेपेची ख्यास्त आनी दंड दिल्लो. जाल्यार अल सलेटा बेग हो माफीचो साक्षिदार जाल्ल्यान ताका ख्यास्त जावंक नाशिल्ली. आरोपींनी हे ख्यास्तीक गोंय स्थीत मुंबय उच्च न्यायालयांत अव्हान दिल्लें. पूण न्यायालयान 4 मार्च 2019 दिसा तांची तिट्टी जल्मठेपेची ख्यास्त कायम दवरिल्ली.
मजगतीं, 18 सप्टेंबर 2020 दिसा जाल्ले बसकेंत गोंय ख्यास्त पुनरावलोकन मंडळान ह्या आरोपींची बेगीन सुटका करपा खातीर मंजुरी दिवन गोंय सरकारा कडेन प्रस्ताव धाडिल्लो. उपरांत गोंय सरकारान बाल न्यायालयाचें मत आनी हेर मुद्यांची दखल घेवन 20 ऑगस्ट 2025 दिसा आदेश जारी करून आरोपींची बेगीन सुटका करपाक न्हयकार दिल्लो.
ह्या आदेशाक रोहनान उच्च न्यायालयांत आव्हान दिले उपरांत न्यायालयान सरकाराक सगले वटेनची बाजू आयकून परतून निर्णय घेवपाक सांगिल्लें. ते प्रमाण सरकारान परतून प्रस्ताव भायरायलो. हाका रोहनान न्यायालयांत अव्हान दिलां. ताका मंदाराच्या बापायन हस्तक्षेप अर्ज दाखल केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
