भांगरभूंय | प्रतिनिधी
मुख्य आरोपीची तांबडी मोटार मेळ्ळी, देशभर स्फोट करपाचो आशिल्लो प्लानखबरां संस्था दिल्ली स्फोटांत आस्पाव आशिल्ल्या आतंकवाद्यां कडेन एक न्हय, जाल्यार दोन मोटारी आशिल्ल्यो, असो दुबाव पुलिसांक आसा. ह्या तांबड्या रंगाच्या फोर्ड इकोस्पोर्ट गाडयेचो नोंदणी क्रमांक डीएल10- सीके-0458 आसा. बुधवारा दिल्ली पुलिसांनी दिल्ली आनी शेजारच्या उत्तर प्रदेश, हरियाणा राज्यांनी ताचो सोद घेवपा खातीर अलर्ट जारी केल्लो.
नवी दिल्लीः दिल्लींत स्फोट करपी आतंकवाद्यांचो पंगड फरीदाबादांतल्या अल फलाह विद्यापिठा कडेन संबंदीत आसा. म्हायती प्रमाण जानेवारी सावन स्फोटांचो प्लान सुरू आशिल्लो. फरीदाबादांत अटक केल्ल्या डॉ. शाहीन शाहिद हांणी फाटलीं दोन वर्सां स्फोटक पदार्थ सांठोवन दवरताले अशें तपास यंत्रणेंत उक्तडार आयलें.
शाहीन आनी तिचे वांगडी आशिल्ले व्हायट कॉलर आतंकवाद्यांचे मॉड्यूल तयार जालें. ह्या मॉड्यूलांत वेवसायीकांचो आस्पाव आशिल्लो. हातूंत आस्पाव आशिल्ले आतंकवादी जैश-ए-महंमद, अंसार गजवात-उल-हिंद ह्या संघटणा कडेन संबंदीत आशिल्ले.
दिल्लींत स्फोट करपी आतंकवाद्यांनी देशभरांत 200 आयईडी वापरून 26/11 सारको व्हड हल्लो करपाची येवजण आंखिल्ली. म्हायती प्रमाण लाल किल्लो, इंडिया गेट, कंस्टीट्यूशन क्लब, दिल्लींतले गौरीशंकर मंदीर ह्या सारक्या सुवातींनी हे स्फोट करपाचे आशिल्ले. आतंकवाद्यांच्या लक्ष्यांत गुरुग्राम आनी फरीदाबाद तशेंच देशभरांतलीं रेल्वे स्टेशनां आनी मुखेल मॉल हांचो आस्पाव आशिल्लो. धर्मीक थळांचेर हल्लो करून देशांत तणाव पातळावपाचो आशिल्लो कट अशें तपास एजन्सी सांगतात. हे खातीर तांणी काश्मीरांतल्या पुलवामा, शोपियन, अनंतनाग हांगाच्या दोतोरांक लक्ष्य केलें, जाका लागून तांकां मुक्तपणान हालचाल करपाक मेळटाली.
हरियाणाच्या खंडावली गांव लागसार बुधवारा सांजवेळार, अलर्ट जारी जाले उपरांत ही मोटार मेळ्ळी. ही बोटार डॉ उमर उन नबी हांच्या नांवान नोंद जाल्या.—————–
स्फोटांतल्या जखमींक पळोवपाक प्रधानमंत्री हॉस्पिटलांत
प्रधानमंत्री नरेंद्र मोदी बुधवारा दनपारां भूतानांतल्यान अायले. विमानतळा वयल्यान ते थेट एलएनजेपी हॉस्पिटलांत गेले. थंय ताणें दिल्ली स्फोटांत जखमींच्या उपचाराचो नियाळ घेतलो आनी दोतोरां कडेन उलोवणी केली. ह्या कटाच्या फाटल्यान आशिल्ल्यांक कशेंयच सोडचें नात अशें प्रधानमंत्र्यानी सांगलें.
जम्मू-काश्मीरांत आनीक एका दोतोराक अटक
दिल्लींत मोटार बॉम्बस्फोटा विशीं जम्मू-काश्मीर पुलिसांनी आनीक एका दोतोराक ताब्यांत घेतला. ताचें नांव डॉ. जहूर अहमद नायकू आसा.
मुख्य दुबाविताची लांबड्या रंगाची मोटार पुलिसांक मेळ्ळी
नवी दिल्लीः दिल्लीच्या लाल किल्ल्या वाठारांतल्या स्फोटाची चवकशी करपी एजन्सींक व्हड यश मेळ्ळां. फरीदाबाद पुलिसांनी तांबड्या रंगाची फोर्ड इकोस्पोर्ट मेटार जप्त केल्या. डीएल 10 सीके 0458 क्रमांकाची ही मोटार खंडावली गांवा लागसार मेळ्ळी. ही मोटार दिसल्यार बेगोबेग म्हायती दिवची अशें आवाहन दिल्ली पुलिसांनी लोकां कडेन केल्लें. आतां ही मोटार पुलिसांक मेळ्ळ्या.
पुलिसांनी ही माेटार जप्त करून फॉरेन्सीक तपासणे खातीर धाडल्या. ही मोटार दिल्लीच्या राजौरी गार्डन आरटीओंत 22 नोव्हेंबर 2017 दिसा नोंद जाल्ली. ही मोटार उमर उन नबी उर्फ उमर मोहम्मद हांच्या नांवान विकत घेतिल्ली अशें दिसून आयलां. दिल्ली स्फोटाच्या मुखेल दुबावितां मदीं उमर हांचो आस्पाव जाता.
26 जानेवारीक हल्लो करपाचो आशिल्लो प्लान
दिल्लींत लाल किल्ल्या लागसार जाल्ल्या स्फोटा संबंदीं म्हत्वाची म्हायती उजवाडाक आयल्या. 10 नोव्हेंबराक जाल्लो हल्लो 26 जानेवारीकच जावपाचो आशिल्लो अशी म्हायती पुलीस आनी तपास एजन्सींक मेळ्ळ्या. दिल्ली स्फोटांत आत्मघाती बॉम्बस्फोट करपी दुबावीत डॉ. उमर नबी आनी ताचो सहकारी डॉ. मुजम्मिल शकील गनी ह्या दोगांच्या मोबाईल फोनातल्या डंप डेटाच्या विश्लेशणांतल्यान ही म्हायती मेळ्ळा. फरीदाबाद व्हायट कॉलर टेरर मॉड्यूला कडल्यान ही चवकशी सुरू आसा. मुझम्मील हो ह्या प्रकरणांतलो मुखेल दुबावीत आसून ताका अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
