भांगरभूंय | प्रतिनिधी
वेंचणूक लागीं पावली काय आतांचे, आदले आमदार उंचाबळ जातात. तातूंत आमदार जावंक सोदपी आदले, नवे उमेदवारुय आसतात. ते जागे जातात आनी एकमेकांचेर आरोप- प्रत्यारोपांच्यो नाळी सोडीत रावतात. हातूंत कांय गुन्यांवा कडेन संबंदीत आरोप आसतात, थोडे काना वयल्यान गेल्ले, पूण पुरावो नाशिल्ले, तर थोडे सरळ सुरय फटास पद्दतीचे. मेंदवाचो वापर करपी मतदार फक्त करमणूक म्हूण हाचे कडेन पळयतात, तर थोड्यांक ते खरेच दिसतात. हाचो उमेदवाराच्या वेंचणुकेंतल्या फुडाराचेर परिणाम जावंक शकता. एकेकदां जाताय बी! पूण अशे हवेंत फार पेटोवचे परस आरोप करप्यांनी पुरावे दिवपाक जाय. हातूंतल्यान पक्ष, राज्य, मतदार सगल्यांचेंच नांव घाणावता, हे ते कशे विसरतात? राजकारण म्हणजे ‘उखल्ली जीभ लायली ताळ्याक’ हें जरी सत्य आसलें, तरी लोकप्रतिनिधींनी इल्लें तरी तारतम्य बाळगूंक नाका?
पेडणेंचे आमदार प्रवीण आर्लेकार आनी आदले आमदार मनोहर आजगांवकार हांचे मदीं काल- पयरूच ‘उतरां झूज’ चलिल्लें. उपरांत सगलेच भितर पडले. पत्रकार परिशदोय जाल्ल्यो. कारवाय जायना जाल्यार पुलिशेंत वतले, अश्यो घोशणाय जाल्यो. त्योय बी अश्योच वयलेचाराक आसुं येतात. पक्षाची शिस्त मोडची न्हय, पुरावे आसल्यार कागाळ करची, अशें भाजपाध्यक्षान म्हणिल्लें. हें पुराय प्रकरण तीन दिसां उपरांत थंड जाल्ले सारकें दिसता. घडये वेंचणूक लागीं येतकच आरोपांचो चिखलकालो परत रंगतलो. पूण, ह्या प्रकरणांत ड्रग्स विक्री समस्ये कडेन सगल्यांचीच आडनदर जाल्या वा कोणाकूच तिका हात लावपाचो ना, अशें दिसले बगर रावना.
भाजपाच्या एका गटा भितरलो हो वाद हें ताचें सुरवातीचें स्वरुप. पूण घुंवळे वखदांच्या मुद्द्याक लागून ताचो तपास जावंक जाय. कायदेशीर कारवायेचे दिशेनूय तो वचपाक जाय. राजकारण आनी समाजकारण नितळ करपाक ड्रग्साच्या ह्या राकेसाचो वध हो जावंकूच जाय. आर्लेकार- आजगांवकार हांणी एकमेकांचेर ड्रग्स विक्रेचे आरोप केल्यात. कोण पबांत ड्रग्स विकता, असो दावोय केला. एकलो म्हणटा, चवकशेक आपूण तयार आसा. खरें म्हणल्यार उतरां झूज करपा परस तांणी एकमेकां आड पुरावे दिवंक जाय आशिल्ले. इस्पिकांनी खेळटना, जैताक तेंकिल्लो खेळगडो एकेक पत्तो ‘हो घे, हो पळय’ अशें आड्डत जमनीर मोखता, तशे दोगाय राजकी खेळगड्यांनी पुरावे सादर करुन हें प्रकरण सोंपोवचें. ओगीच पत्रकारां मुखार एकमेकांचेर आरोप करून कितें साध्य जातलें? विरोधी पक्ष म्हणटा, आमकां हें खबर आशिल्लें. मागीर तांणी कागाळ करुन, तपास तडीक लागतलो हे खातीर यत्न कित्याक केले नात?
गोंयांतल्या घुंवळे वखदांच्या धंद्यांत कांय राजकी फुडाऱ्यांची, तांच्या चल्यांचीं नांवां हाचे पयलीं आयल्यांत. मात, कोणाकूच तांचे आड पुरावे मेळूंक नात. ह्या पाब्लो एस्कोबारांक (कोलंबियन ड्रग्स किंग आनी राजकी फुडारी) अटक जावपाची शक्यताय तशी उणीच. मात ह्या प्रकरणाक लागून पेडणेंच्या मतदारांच्या स्वाभिमानाक धक्को बसला. जांकां ते वेंचून दितात, ते ड्रग्साच्या धंद्यांत आसात, ही तांचे खातीर लजेची गजाल जाली ना? बरें हो आरोप कोणे केला, तर तांच्याच दोन फुडाऱ्यांनी. गोंय ही ड्रग्साची राजधानी जावचे पयलीं दर्यादेगां वयले ड्रग्स वेव्हार बंद करपाक पावलां उखलचीं. पोरूं 188 जाणांक अटक जाल्ली. करोडांनी रुपयांचें ड्रग्स धरिल्लें. पेडणेंच्या दोगाय लोकप्रतिनिधींच्या आरोपांची चवकशी जावंक जाय. तांचे कडेन एकमेकां आड पुरावे आसतलेच. विरोधांत आसलो काय समेस्त तपास यंत्रणां फाटीक लागतात, मात सत्ता आसल्यार गंभीर आरोपां कडेन पसून आडनदर जाता. अशें जावंक फावना. पेडणेच्या ह्या उतरां झुजान सध्या विसव घेतला. आतां तें परत सुरू जावचे पयलींच तपास यंत्रणांनी तपासाचो शंखनाद करून झूज सोंपोवचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
