भांगरभूंय | प्रतिनिधी
दुसऱ्यांचो आदार घेतलो म्हण कांयच वायट ना. पूण आदार दितल्याचें मन आमी समजून घेतल्यार आमकांच बरें. आदार घेतल्या उपरांत उपकारी मन दाखोवप हें मनीसपण.
कांय वर्सां आदीं कोणें तरी म्हजी ईमेल आयडी हॅक केल्ली. म्हज्या नांवान जायत्या जाणांक ईमेल पावले. हांव स्पेनांत पावला आनी संकश्टांत पडला म्हूण सांगून दुडू एकठांय करपाचो धंदो सुरू जालो. साबार जाणांनी म्हाका फोन करून म्हजेशीं हुस्को दाखयलो. थोड्यांनी अजाप उक्तायलें. थोड्यांनी तर म्हाका धाडुंक दुडू एकठांय करपाची मांडणी काडली.
असल्यो साबार भानगडी घडटात म्हणून कांय जाणांनी आपलें मत उक्तायलें. ‘हॅक’ करप म्हणल्यार आमच्या वस्तुंनी दुसऱ्यांनी भितर सरप आनी आमचेर ताणीं जबरदस्ती चलोवप. ईमेल ‘हॅक’ करून आमचें कितेंय वैयक्तीक संदेश आसात ते जाणून घेवंक जातात. त्याच ईमेलांतल्यान आमच्यांनी दुसऱ्यां लागीं संपर्क करुंक जायना. ती वाटूच बंद जाता. त्या ईमेल आयडीचो धनी दुसरोच जालो.
ईमेल आयडी सोडूच. आमची जिणूय ‘हॅक’ जावंक जाता. जायते फावटी आमकां कळटां वा नकळटां आमचे जिणेंत दुसरो भितर सरुंक शकता. दुसरो आमच्या जिणेचो मालक जावंक शकता. असले परिस्थितींत आमची जीण दुसरोच चलोवंक फाटीं रावना. मागीर दुसऱ्यांच्या हातांत पपेट जावन जियेवपाची पाळी आमचेर येता.
जिणेंत आमी खयंचोय भेस वेंचून काडूं, जीण ‘हॅक’ जावपाची शक्यताय आसा. स्टीवन हो तरनाटो आपले गरीब परिस्थितीचें चिंतून एका राजकी फुडाऱ्याचो आदार घेवन एके सरकारी कचेरेंत वावरुंक लागलो. वेंचणुको लागीं पावल्यो तेन्ना तो फुडारी स्टीवना लागीं वचून आपल्या सांगाता रावूंक जाय म्हूण आग्रो धरुंक लागलो. खरें म्हणल्यार स्टीवनाक ताच्या सांगाता रावूंक नाका आसलें. त्या फुडाऱ्याचीं कर्तुबां ताका माननासलीं. पूण करतलो तरी कितें? आपल्याक आदार केलो म्हूण त्या राजकी फुडाऱ्याच्या चेपणा खाला रावचो पडलो. आपले जिणेंत त्या फुडाऱ्याक भितर सरुंक ताणें दिलें. ताची जीण ‘हॅक’ जाल्लेपरीं जाली.
आमची जीण केन्ना आनी कशी ‘हॅक’ जावं येता तें खूप म्हत्वाचें. आमी साबार फावटी दुसऱ्याचो आदार घेतात. एकमेकांचो आदार घेवनूच मनशान जियेवंक जाय. दुसऱ्यांचो आदार घेतलो म्हण कांयच वायट ना. पूण आदार दितल्याचें मन आमी समजून घेतल्यार आमकांच बरें. आदार घेतल्या उपरांत उपकारी मन दाखोवप हें मनीसपण. दुसरे वाटेन, आदार दितल्याक आमचे जिणेचो ताबो दिवप हें मनीसपण न्हय. आमी मनीस म्हणटच आमचे लागीं चुकी घडप हें सभावीक. जायते फावटी आमच्या फाटल्या जिवितांतल्यो चुकी आमचेच बरोबर आसपी आनी भोंवपी, उस्तूंक लागतात. आमचें नांव पिड्ड्यार जातलें म्हूण समजून आमी दुसऱ्यांक दसून रावतात. नांव पिड्ड्यार जाल्यार कितले दीस जातलें? पूण दुसऱ्यांनी आमची जीण चलोवप समा न्हय.
दुसऱ्यांक आमचे जिणेचेर ताबो आमींच दितात तेन्ना वा आमचे जिणेंत दुसरो बळान भितर सरता तेन्ना आमी तांचे गुलाम जावन जियेवंची पाळी आमचेर येता. तांच्याच हाता खाला रावून ताणीं सांगता तितलेंच करचें पडटा. असले परिस्थितींत आमची वाड जायना. ‘आमी जियेवंक जाय म्हूण जियेतात’ असलें वातावरण निर्माण जाता. खरें म्हणल्यार असली जीण जियेवंक आमकां कोणाकूच नाका. पूण आमचेर आयलली परिस्थिती आमची जीण दूसऱ्यांनी ‘हॅक’ करुंक आदाराची जाता. असली जीण आमी कितलो काळ मेरेन जियेतलीं? जीण जियेलीं म्हूण जायना, आमी ती अर्थाभरीत करपाची जापसालदारकी घेवंक जाय. दिसना तुमकां?
– जॉन एम्. आल्फोंसो, कार्मेलीत,
(लोलयें) 76665 19837
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
