भांगरभूंय | प्रतिनिधी
इंडीयन प्रिमीयर लीग 2025चे सर्तीचे पावणेंत काल सोमारा फास्ट बॉलरांक भाव मेळत आशिल्ल्याचें दिसून आयलें. सुरवातीक स्टार बॅट्समन आनी अश्टतासांचे खेळगडे अनसोल्ड उरल्या उपरांत फास्ट बॉलरांनी मात भाव घाल्लो.
हे पावणेच्या पयल्याच दिसा सगल्याच फ्रॅंचायजींनी व्हडा प्रमाणांत पयसो खर्च केल्लो. ताका लागून दुसऱ्या दिसा फ्रॅंचायजी सांबाळून पयशे वापरतना दिसले. तातूंत फास्ट बॉलरां खातीर मात फ्रॅंचायजींनी पयशांची तिजोरी उगडली.
भारताचो अणभवी फास्ट बॉलर भुवनेश्वर कुमाराक व्हड मागणी दिसून आयली. ताचे खातीर मुंबय इंडियन्स आनी लखनौ सुपर जायण्ट्स हांचे मदीं व्हडा प्रमाणांत सर्त पळोवपाक मेळ्ळी. तांणी ताचे खातीर 10.50 कोटी खर्च करपाची तयारी दाखयली. अखेरेक रॉयल चॅलेंजर्स बंगळुरून येस मेळयलें आनी भुवनेश्वर कुमाराक 10.75 कोटी रुपयांनी खरेदी केलो. ताका लागून भुवनेश्वर कुमार आतां रॉयल चॅलेंजर्स बंगळुरू वतीन खेळटना दिसतलो.
हाचे खेरीत दीपक चाहर, मुकेश कुमार, आकाश दीप, तुषार देशपांडे अशा साबार फास्ट बॉलरांचेर व्हड बोली लागल्यो. दीपक चाहरा खातीर सुरवातीक मुंबय इंडियन्स आनी पंजाब किंग्स हांचे मदीं चुरस पळोवपाक मेळ्ळी. उपरांत चेन्नय सुपरकिंग्सान 8 कोटींची बोली लावन तातूंत उडी घेतली. पूण, मुंबय इंडियन्सान 9.25 कोटींची बोली लावन दीपकाक आपल्या पंगडांत घेतलो.
मुकेश कुमारा खातीर चेन्नय सुपर किंग्स आनी दिल्ली कॅपिटल्स हांचे मदीं चुरस आशिल्ली. पंजाबान ताचे खातीर 6.50 कोटींची बोली लायली. पूण, दिल्लीन आरटीएम कार्डाचो वापर केलो. पंजाबान ताची बोली 8 कोटी मेरेन व्हेली. पूण, दिल्लीन हे खातीर हयकार दिवन मुकेशाक परतून पंगडांत घेतलो.
आकाश दीप हाचे खातीर चेन्नय, लखनौ सुपर जायण्ट्स आनी पंजाब हांचे मदीं चुरस पळोवपाक मेळ्ळी. अखेरेक लखनौन 8 कोटींनी ताका आपल्या पंगडांत घेतलो.
तुषार देशपांडे खातीर राजस्थान रॉयल्सान 6.50 कोटींची बोली लायली. गेराल्ड कोएत्झीक गुजरात टायटन्सान 2.40 कोटी खर्च करून आपल्या पंगडांत घेतलो. लॉकी फर्ग्युसनाक पंजाब किंग्सान 2 कोटींक खरेदी केलो.
हाचे खेरीत स्टार बॅट्समन नितीश राणाक पंगडांत घेवपाक चेन्नय सुपर किंग्स, रॉयल चॅलेंजर्स बंगळुरू आनी राजस्थान रॉयल्स हांचे मदीं सर्त लागली. तो बॉलिंगेंत लेगीत योगदान दिवपाक शकता, ताका लागून ताका मागणी आशिल्ल्याचें दिसलें. अखेरेक राजस्थान रॉयल्सान 4.20 कोटी खर्च करून ताका विकत घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
